Enviado por: crisanto o Sábado, 20 de Xuño de 2009 - 09:58:20 (CET)

Esther, "Esthercilla" para fillos, nesta mensaxe do 6/04/09 pedía axuda para atopar a súa familia de Galicia, en Ortigueira (A Coruña). O noso membro de fillos, "Pepetorneiro" alá se puxo a pescudar e atopou ós parentes que Esther estaba a buscar. A cousa debeu de ir axiña pois xa para o día 24 de abril Esther mandaba outra mensaxe de agradecemento e louvanza a José Díaz, "Pepetorneiro" pola súa axuda.O día 10 deste mes volveu mandar outra mensaxe de agradecemento a fillos. O reencontro xa tivera lugar, xa contactara por correo cun curmán do seu pai.

Grazas tamén a ti, Esther; xente coma ti é a que lle da sentido a esta Comunidade Virtual Fillos de Galicia. Facéndenos ver que o noso traballo non queda baleiro e que reencontros coma o teu énchennos de ledicia e dannos forzas para seguir traballando nesta obra que é Fillos.org

Enviado por: CoordFillos o Sábado, 20 de Xuño de 2009 - 09:55:13 (CET)

Como consecuencia da nova configuración do servidor adicado que temos contratado con Dinahosting, e os problemas de seguridade asociados a esta nova configuración e que nos levan producido tantos quebradeiros de cabeza tanto a nós como a eles, tomamos a decisión de realizarmos un masivo proxecto de migración que suporá o abandono progresivo pero urxente de todos os portais baseados no CMS PostNuke e o paso a novos sistemas máis seguros. Onte mesmo realizamos a parte máis grosa da migracion de Galeguidade.net, un dos portais que máis se viña vendo afectado polos ataques de crackers, e nos vindeiros días han seguir outros tanto nosos como de clientes de RedeGalega. Lamentamos as molestias e fallos que temporalmente se han producir no acceso aos diversos portais, pero pagará a pena polo que imos gañar en seguridade e mesmo en novas funcións que poderemos desenvolver nas novas plataformas. Grazas pola comprensión e a paciencia a todos os nosos usuarios e clientes!

Enviado por: CoordFillos o Martes, 16 de Xuño de 2009 - 18:24:28 (CET)

Hoxe nace para manter informados a todos os interesados un blog que irá sendo mantido polo administrador e polo dinamizador dos galeuros, de tal xeito que toda a actualidade e evolución do proxecto estea reunida nel. Visitádeo en http://galeuros.com/blog/

Enviado por: CoordFillos o Luns, 15 de Xuño de 2009 - 16:35:00 (CET)

Os nosos socios tamén aprobaron estes días o noso apoio oficial e adhesión ao Manifesto proposto polo Foro Galego da Inmigración e do que xa viñamos falando no noso Taboleiro.

Enviado por: CoordFillos o Luns, 15 de Xuño de 2009 - 16:29:33 (CET)

Por votación dos socios da nosa Asociación expresamos o noso apoio oficial ao Manifesto Básico pola defensa da RadioTV de Galicia - Contra a censura e a marxinación da música galega publicado por Komunikando.net e invitamos a todos os nosos membros e visitantes a expresaren tamén de xeito individual a súa adhesión.

Enviado por: CoordFillos o Mércores, 03 de Xuño de 2009 - 17:45:37 (CET)

Dada a gran cantidade de incidencias que se levan producido a consecuencia da actualización realizada polo noso fornecedor de servidor web na noite do 28 ao 29/05/2009, consideramos que era mellor reunirmos toda a súa relación cronoxólica nunha soa páxina que permitese facer o seguimento conxunto dos problemas e das solucións, ofrecendo unha referencia única de consulta para os usuarios afectados e mais para o noso rexistro. Velaquí a listaxe de indicencias de máis antiga a máis recente, a cal menteremos actualizada mentres persistan as incidencias salientables...

Enviado por: CoordFillos o Luns, 01 de Xuño de 2009 - 20:50:10 (CET)

Velaquí publicamos con permiso dos autores, os textos que Mini e Mero leron na Casa de Museo de Rosalía en Padrón o pasado 24 de Maio, no acto no que lles foi entregado o galardón "Pedrón de Ouro" na súa edición de 2009. Grazas tamén a David Otero Fernández (do que tamén incluimos o seu discurso no mesmo acto polo gran interese que na nosa opinión ten) por nos ter feito chegar os textos. Sumamos a esta homenaxe que desde Fillos de Galicia lles rendemos, a publicación dunha das cancións que este dúo gravaron para o espectáculo teatral "Pan. Catro propostas arredor da malla".

Enviado por: CoordFillos o Xoves, 28 de Maio de 2009 - 16:20:48 (CET)

Queremos avisar aos nosos usuarios de que esta noite desde as 24 horas ata as 3 AM de mañá venres (hora española peninsular) non estarán accesibles nin este portal (Fillos.org) nin ningún outro dos nosos webs nin servizos por estar previsto un mantemento técnico. Pregamos desculpedes as molestias e esperamos estar de novo convosco mañá sen ningún contratempo.

Enviado por: CoordFillos o Venres, 22 de Maio de 2009 - 17:30:55 (CET)

Temos unha nova ledicia para toda a nosa Comunidade Virtual, pois ao nomeamento hai poucos días de Crisanto como novo Responsable do Atopadoiro, agora vimos de sumar unha nova socia que se vai facer cargo dun área que levaba tempo sen unha persoa encargada: será Silvine quen se encargará dos temas relacionados con Lingua e Cultura neste portal e noutros relacionados da nosa asociación. Terá a axuda entroutras persoas de Axav, outro importante colaborador, e de todo o resto dos voluntarios interesados en achegar nesta vital área do noso traballo. Parabéns e moita sorte, Silvia!

Enviado por: CoordFillos o Xoves, 21 de Maio de 2009 - 18:09:50 (CET)

Como unha maneira de axudarmos a Crisanto, o noso novo Responsable do Atopadoiro, a realizar con maior efectividade as buscas e poder coordinar mellor o equipo de voluntarios que se prestan a axudar neste traballo que tan boas recompensas nos dá a todos, vimos de crear unha sección especial da Roga (o noso Taboleiro de acceso restrinxido aos voluntarios). Se ti es un/ha voluntario/a que quere axudar nas buscas familiares que fai Fillos, non deixes de entrar e deixar a túa mensaxe ofrecendo a túa axuda. Esperamos que isto axude e que de contado teñamos moitos máis reencontros!

Enviado por: CoordFillos o Martes, 19 de Maio de 2009 - 17:29:36 (CET)

Seguindo coa nosa reorganización e consolidación dunha nova estrutura operativa tras a IX Asemblea Xeral da nosa Asociación, entre os diversos candidatos que se ofreceran para se responsabilizaren da área das procuras familiares, ao final concordaron en que Crisanto era a persoa idónea. Polo tanto nos vindeiros días o noso estimado Fernando, artífice de moitos dos últimos reecontros familiares producidos en Fillos de Galicia, irá tomando todos os aspectos desta nova responsabilidade, que se suma á que xa ostentaba de Responsable da sección de Gastronomía. Nos vindeiros días tamén esperamos ter un/ha Responsable de Cultura e así poderemos potenciar por fin dúas das nosas principais áreas de actuación, un tanto paradas ate o de agora pola falta de encargados.

Seguro que Crisanto exercerá este cargo con tanta ou máis eficacia que Marisalvar, a nosa anterior responsable. Grazas, Fernando e moita sorte!! ...E grazas tamén aos outros dous socios que se ofreceran para este cargo, que seguro han contribuír co seu esforzo e tempo ao mesmo obxectivo.

Enviado por: CoordFillos o Xoves, 14 de Maio de 2009 - 17:16:41 (CET)

Desde hoxe pódense volver mercar parcelas no noso proxecto Parcelaria Virtual pola Cultura Galega, e con importantes novidades. A primeira é que, aplicando as posibilidades da nova etapa dos Galeuros, agora algunhas entidades e os nosos socios poderán mercar estes orixinais espazos para a súa publicidade, sen diñeiro en efectivo. Poderán crear o seu propio diñeiro en forma de galeuros, para así financiaren a adquisición ate Febreiro de 2010 de tantas parceliñas como queiran.

Ademais o custo de cada unha, dado que tivemos que esperar a sincronizar esta nova oportunidade de compra co lanzamenteo da II Etapa dos Galeuros, é menor (cando antes eran 12 meses por 38,168 euros ou galeuros, agora serán 7,5 meses por 23,855 euros ou galeuros). Non esperes máis e reserva o teu espazo: 10x10 pixeles por menos de 24 euros, para apoiar as actividades de Fillos de Galicia, e promocionar o teu web persoal, de empresa ou do que ti queiras!

Elixe xa as túas parcelas e merca online mediante a nosa tenda electrónica! (Os socios que a quieran mercar creando os seus propios galeuros deberán poñerse antes en contacto con galeuros ARROBA galeuros PUNTO com para solicitalo).

Enviado por: CoordFillos o Mércores, 13 de Maio de 2009 - 18:45:49 (CET)

A nosa Rede Semántica para o contacto entre galegos, o eTIqueTAL, tamén se quere unir ás celebracións e reivindicacións do Día das Letras cunha leria especial e animando a todos os seus usuarios a engadiren as etiquetas 17 de maio e a nosa lingua. Ti aínda non es usuario/a? A que esperas para participar?

Enviado por: CoordFillos o Mércores, 13 de Maio de 2009 - 16:24:10 (CET)

Atallamos de contado o problema que mencionabamos onte e xa volven funcionar con normalidade as listas de todos os dominios do servidor. Por sorte non se perderon mensaxes e simplemente estaban atrancadas sen ser distribuídas. Por outra banda tamén parece que Hotmail volve aceptar mensaxes do noso servidor.

Enviado por: CoordFillos o Martes, 12 de Maio de 2009 - 18:54:27 (CET)

Cando aínda non demos co problema que provocou o baneo de Hotmail aos correos procedentes do noso servidor, hoxe vimos de detectar outro grave problema: as listas de correo de todos os dominios ubicados no noso servidor non están a trasmitir as mensaxes que lles chegan. Estamos en contacto co noso fornecedor para que o amañen o antes posible. Pregamos desculpedes este novo problema técnico! :-(

Enviado por: CoordFillos o Martes, 12 de Maio de 2009 - 18:35:39 (CET)

Tras a prórroga que demos para dar tempo a que se coñecese a campaña en Galiza (cousa que non acadamos), finalizou a campaña Que che gustaría facer en Fillos. Entra no Taboleiro para coñecer a nosa avaliación da mesma.