O pasado día 28 de xullo concluiu a asemblea de socios da Asociación Cultural Fillos de Galicia na que, tras varios anos de inactividade da mesma, se decidiu por unanimidade a disolución da asociación. Esta foi xa comunicada ao Rexistro Nacional de Asociacións para que a rexistre oficialmente.
Na mesma asemblea nomeouse unha Comisión Liquidadora que procedeu a procurar un destino para o patrimonio da asociación, conforme á lexislación vixente en materia de asociacións e segundo os estatutos da propia asociación.
Esta comisión ven de decidir entregar os diversos sitios webs e dominios propiedade da asociación, a outra entidade sen ánimo de lucro, a Asociación Touda, quen nos viña ofrecendo o aloxamento desde 2018, e quen xenerosamente tamén viña renovando este hosting e os correspondentes dominios de maneira gratuíta en canto a A. C. Fillos de Galicia quedou sen recursos económicos para facer fronte a estes gastos.
Touda comprométese a protexer o legato de Fillos de Galicia mediante o seu servizo LegadoWeb, pensado precisamente, para acoller contidos de interese histórico e cultural cando as organizacións responsables dos mesmos cesan na súa actividade, algo que xa veu facendo con outros contidos históricos da Internet galega. Así pois, nas vindeiras semanas procederase ás mudanzas técnicas e rexistrais precisas para que os contidos dos sitios web que viña ofrecendo a nosa asociación pasen á súa nova ubicación, onde se converterán en contidos estáticos (non actualizables).
Así, hase preservar do esquecemento boa parte do labor feito durante os 28 anos desde a creación da comunidade virtual Fillos de Galicia (1997), 25 dos cales foi fornecida pola asociación cultural do mesmo nome.
Roberto, Manuel, Amador e Daniel, a vixésima e derradeira xunta directiva da asociación, queremos dar as grazas aos centos de persoas que teñen feito posible esta longa andaina, comezando polas persoas que ao longo destes anos formaron parte da asociación como socios e socias. Por suposto, tamén aos diversos mecenas que axudaron á continuidade, sempre dificultosa e case sempre sen recoñecemento institucional, do labor feito; moitos puxeron cartos, moitos puxeron libros e outros obxectos para a nosa diáspora. Non podemos tampouco esquecer o noso voluntariado, que de maneira desinteresada e dedicándolle un número incalculable de horas —de tempo das súas vidas— levou cultura, información e sentimento galego a milleiros de galegos e descendentes por toda a Galeguidade, por toda a Nación Mundial Galega. Non queremos mencionar a ningún en concreto porque sería inxusto esquecernos dos demais, e foron tantos..! Nas nosas páxinas seguirán estando recoñecidos os seus nomes para os anos por viren.
Tamén damos as grazas a D. Manuel Luis Rodríguez, quen fora Secretario Xeral de Emigración durante o goberno bipartito da Xunta de Galicia (2005-2009), por ser o único responsable político que recoñeceu o noso labor, promovendo o recoñecemento de Fillos de Galicia como centro colaborador da Secretaría Xeral. Non podemos agradecer, porén, aos diversos responsables de Emigración do Partido Popular, que puxeron todos os atrancos posibles para a nosa subsistencia e non só non nos recoñeceron nunca, senón que, apenas volveron ao poder, retiraron de maneira ilexítima o devandito recoñecemento oficial de centro colaborador, reducindo así enormemente as posibilidades de nos financiar e provocando unha crise de recursos da que Fillos de Galicia nunca se puido recuperar.
Así e todo, contra vento e marea, demos feito un mundo de cousas, e demos reconectado familias separadas pola emigración, axudando a recuperar a nacionalidade a moitos descendentes da nosa diáspora, poñendo en contacto a persoas afastadas por milleiros de quilómetros a quen só unía a orixe galega e que viraron amigos de por vida… ou mesmo parellas! O noso legato quedará nestas páxinas e nos libros que seguirán, grazas a Touda, voando polo mundo até onde houber una galega, un galego. Pero sobre todo, quedará na memoria e na vida da xente á que lle achegamos algo de todo isto.
Cando non había redes sociais online, xa estaba Fillos de Galicia: unha auténtica comunidade, mostrando ao mundo que Internet pode e debe ser usada para manter a cultura e identidade galegas no mundo.
Grazas e até sempre!
Estes webs, tras o seu traslado aínda precisarán algúns axustes, algúns dos cales estaba mesmo pendente desde 
Estas cifras reflicten non só un notable éxito, senón que aínda temos moito que facer, malia o 
Por outra banda, informamos de que os primeiros envíos de libros aos 
O ensaio O papel de Internet na conservación da identidade e cultura galegas entre os descendentes dos emigrantes foi premiado en 2003 pola Xunta de Galicia co premio Galeguidade de ensaio. Porén, non foi até 2006 que puido ser publicado, grazas a unha subvención concedida á nosa asociación. 
La difusión de éste y otros títulos editados por Fillos de Galicia (Xantares galegos, Nomes galegos de hoxe e de onte y Antoloxía poética da diáspora galega) ha sido posible hasta ahora gracias a la contribución de la fraternidad pangallega que, en respuesta al escaso respaldo recibido por parte de la política institucional, ha realizado un auténtico 
Xa que a administración que se supón debe velar pola difusión da nosa cultura e identidade entre os galegos e descendentes que residen fóra do país, concede 0 euros para os envíos dos nosos libros, decidimos acudir, 
Xa que este anon non vai ser grazas á Xunta de Galicia, será grazas á fraternidade 
RSS xeral de Fillos.org