Entries tagged with “xamón”.


Alcachofas recheas de xamón

 

Ingredientes:

  • 16 alcachofas
  • 300 g xamón en liscos de 3-4 mm de groso
  • 2 cebolas novas
  • 1 dentes de allo pequeno
  • 2 ovos
  • 100 ml de viño branco galego
  • Pan relado
  • Aceite de oliva, sal e perexil

 

Preparación:

  1. Limpámo-las alcachofas das folla duras de fora e cortámolas pola metade ó través ata chegar ó corazón tenro. Untámolas con limón e metémolas en auga con zume de limón pata que non oxiden entanto as limpamos. Aproveitamos tamén os talos que pelamos e cocemos xunto coas alcachofas en auga con sal e unha poliña de perexil, polo decurso duns 20-25 minutos. Afastámolas do lume escoámolas ben e cando arrefríen  baleirámolas cunha culleriña no medio e facémoslle un corte liso na base para que se manteñan de pe.
  2. Pómo-los ovos a cocer por uns 8 minutos, logo diso arrefriámolos pelámolos e picámolos.
  3. Acendémolo forno a 220-240ºC para que vaia quecendo.
  4. Amolecemos a cebola moi picadiña nunha tixola con aceite e cando estea ben mol engadímo-lo xamón picado e logo de refogalo un pouco botámo-lo viño branco e deixamos reducir. Logo diso botámo-lo ovo picado mailos talos e restos das alcachofas tamén picados
  5. Pómo-las alcachofas baleiradas nunha bandexa de levar ó forno e enchémolas coa zaragallada anterior; picamos moi miudiño o dente de allo mesturámolo co pan relado e empoamos con esta mestura as alcachofas antes de metelas ó forno durante uns 5 minutos.
  6. Servímolas decoradas cunhas folliñas de perexil

 

 

Tempo: 40  minutos                                      Comensais: 4

Bocadiño de xamón e verduras

 

Ingredientes:

  • 4 rodas de berenxena
  • 4 rodas de cabaciño
  • 4  rodas de tomate
  • 2 lascas de queixo
  • 4 panciños pequenos
  • 4 lascas de xamón
  • Aceite de oliva
  • Sal

 

Descrición:

  1. Salgámo-las rodas de berenxena, cabaciño e o tomate, sen pebidas, e facémolas á prancha, ben nunha tixola ou ben nunha prancha de cociñar cun chisco de aceite. Primeiro facemos polas dúas caras a berenxena mailo cabaciño e deixamos o tomate para ó final.
  2. Cortámo-lo pan ó longo pola metade e torrámolo un chisco, non moito só para que trisque un pouco ó mordelo, pomos primeiro as verduras quentes, por riba media lasca de queixo e por riba de todo unha lasca de xamón.
  3. Tapamos coa outra metade de pan deixando que se vexa por fora o que vai dentro do pan.

 

Nota:

  • Podémolo presentar tamén sobre medio pan torrado espetado cun pauciño

 

 

Tempo: 15 minutos

Tapas: 4

Roliños de cabaciño, xamón e gulas

 

Ingredientes:

  • 1 cabaciño
  • 12 medias lascas de xamón
  • 150 g de gulas
  • 1 dente de allo
  • 12 rebandadas de pan
  • 1 cebola
  • 1 culleriña de azucre
  • Fariña
  • Ovo
  • Aceite
  • Sal

 

Descrición:

  1. Se o cabaciño é tenro non o pelamos e cortámolo en tres anacos iguais ó través. Cortamos logo os  anacos cunha mandolina, tomando só as 4 lascas centrais; en total 12 lascas.
  2. Salgámo-las lascas, envolvémolas en fariña e ovo batido e fritímolas en abondoso aceite quente. Logo de fritir escorrémolas en papel de cociña para sacarlles o aceite.
  3. Nunha tixola con dúas culleres de aceite botamos o allo picado miúdo e cando empece a dourar engadimos as gulas que imos facendo durante uns 2 minutos sen deixar de remexer.
  4. Sobre as lascas de cabaciño  pomos as medias lascas de xamón e as gulas repartidas e facemos rolos. Reservamos.
  5. Cortámo-la cebola en medías lúas e acaramelámola a fogo suave nunha tixola con aceite, sal e azucre.
  6. Pomos estes rolos, espetados cun pauciño para que non se desfagan,  sobre as rebandadas de pan lixeiramente torradas e botamos por riba un pouco de cebola acaramelada.

 

Nota:

  • Para que o cabaciño non colla tanto aceite podes facelo a prancha nunha tixola cun chisco de aceite en troques de rebozalo.
  • En troques da cebola acaramelada podes pór enriba un chisco de marmelada de froitos vermellos coma amorodos, arandos ou framboesas.
  • En troques de xamón podes empregar lascas de pa curada, que sae más arranxado de prezo.

 

 

Tempo: 15 minutos

Tapas: 12

Zamburiñas á prancha

 

Ingredientes:

  • 4 zamburiñas
  • 100 g. de cabaza dourada
  • 1 pataca
  • 2 porros (só a parte branca)
  • ½ cebola
  • 50 ml de nata
  • 1 lasca de xamón
  • Aceite
  • Sal

 

Descrición:

  1. Limpámo-lo branco dun porro, cortámolo ó través e picámolo en xuliana, é dicir en tiras delgadiñas, que fritimos nunha tixola con aceite. Ata que fiquen lixeiramente douradas.
  2. Para deshidratar o xamón metémo-la lasca no forno entre dúas placas de forno, ou entre dous pratos chairos e deixámolo uns minutos ata que estea deshidratado e poidámolo esnaquizar coas mans.
  3. Coa cabaza, a pataca, o outro porro maila cebola facemos unha crema que coamos por un coador para que quede ben fina engadimos a nata e mesturamos
  4. Pomos unha culler de crema nas cunchas das zamburiñas e enriba delas a carne da zamburiña feita a prancha.
  5. Adornámolo todo co porro fritido e co xamón deshidratado e esnaquizado.

 

 

Nota:

  • Podemos empregar para esta tapa vieiras no lugar das zamburiñas. As zamburiñas saen mellor de prezo.

 

 

Tempo: 30 minutos

Tapas: 4

Roliños de melón con xamón

 

Ingredientes:

¼ de melón

6 lascas de xamón

200 g de queixo de untar

Ceboliño

Pementa

Azucre

 

Descrición:

  1. Cunha mandolina facemos lascas finas de melón; unhas oito será dabondo
  2. Sacámoslle ó xamón o touciño que teña e pómolo estendido nunha bandexa de forno e premémolos con outra bandexa. Deshidratamos o xamón no forno,xa quente,a uns 5 minutos.
  3. Sacámolo do forno e triturámolo ata convertelo case en po.
  4. Mesturámo-lo queixo co xamón , o ceboliño picadiño e un chisco de pementa moída (ó gusto)
  5. Repartímo-la mestura de queixo, a partes iguais, nas lascas de melón e enrolámolas sobre o queixo.
  6. Esparexemos azucre por riba dos roliños e torrámolo cun soprete de cociña. Adornamos logo con po de xamón por riba e ceboliño cortado en anacos duns 7-9cm.

 

Tempo: 15 minutos

Comensais: 4 persoas

Endivias con xamón e queixo azul

Ingredientes:

  • 8 endivias
  • 8 lascas delgadas de xamón

Para o prebe:

  • 2 cenorias
  • ½ cebola
  • 100 ml de nata
  • ½ vaso de viño branco
  • 50 g de queixo azul
  • Aceite de oliva
  • Sal
  • Pementa negra

 

Descrición:

 

  1. Tirámoslles as follas externas ás endivias (só as que estean mal) e cocémolas en auga salgada polo decurso de 5 minutos. Escoámolas ben e envolvémolas en cadansúa lasca de xamón. Reservámolas espetadas cun pauciño para que non se solte o xamón
  2. Facémo-lo prebe pondo  a amolecer, nunha tixola con 3 culleres de aceite, a cebola cortada en xuliana moi fina mailas cenorias peladas e cortadas en rodas delgadiñas. Amolecemos ata que colla un chisco de cor.
  3. Logo disto engadimos o viño branco e deixamos cocer para reducir; engadimos a nata líquida mailo queixo un pouco de pementa negra moída recente e salgamos.
  4. Tapámo-la tixola e deixamos cocer; uns 2 minutos o prebe so e outros 5 minutos máis coas endivias envoltas co xamón.
  5. Colocámo-las endivias nunha bandexa de presentación alongada e regadas co prebe.
  6. Servímolas quentes.

 

Tempo: 20 minutos

Comensais: 4

 

 

Nota:

A endivia é en realidade unha variedade da chicoria que se obtén mediante un cultivo forzado ou artificial.
É unha planta con follas que arrincan do pescozo da raíz cunha coloración variable, segundo a variedade e o cultivo, que vai dende o verde escuro ata o amarelo claro. A endivia, unha verdura de agradable presenza, é en realidade o corazón da planta.

De forma apuntada e cilíndrica, está composta por unha sucesión de apretadas follas superpostas de cor branca que se volve amarela nas puntas. Miden de 8 a 9 centímetros de longo e teñen ó redor de 3 centímetros de diámetro. Son de un marcado sabor doce é refrescante aínda que nalgunhas variedades é lixeiramente amargo.
As endivias son hortalizas que están dispoñibles no mercado durante todo o ano, pero sobre todo na época que vai dende outono ata principios de verán, sendo a súa tempada óptima a que abarca os meses de inverno e a primavera. De tódolos xeitos, na actualidade os cultivos de invernadoiro permiten contar con elas  todo o ano.

 

Nome científico: Cichorium endivia variedade crispa
Orixe: Din que a endivia é orixinaria da zona mediterránea.

Roliño de xamón recheo de champiñóns e necora

Ingredientes:

  • 4 lascas cadradas de xamón (uns 2 mm de groso)
  • 1 nécora
  • 50 g. de champiñóns
  • 2 ovos
  • 4 rebandadas de pan
  • Vinagre de Módena
  • Maionesa
  • Fariña
  • Ovo
  • Aceite
  • Sal

Descrición:

  1. Cocémo-la nécora en auga sen sal 5 minutos, sacámola e logo de arrefriala en auga sacámoslle a carne que reservamos; tamén reservamos medio vaso da auga de coceren.
  2. Picámo-los champiñóns miúdos e facémolos nunha tixola con aceite engadindo tamén o medio vaso da auga de coceren.
  3. Cando consuma a auga engadimos a carne da nécora e pomos a punto de sal. Engadimos logo os 2 ovos lixeiramente batidos e facemos un revolto.
  4. Pomos en cadansúa lasca de xamón unha culler de revolto e logo enrolámolas.
  5. Rebozámo-los rolos en fariña e ovo e fritímolos en abondoso aceite quente.
  6. Deixámolos escorrer o aceite en papel absorbente e pómolos enriba dunha rebandada de pan, decorados cunha redución de vinagre de Módena e un fío de maionesa. Espetamos cun pauciño.

Nota:

  • Podemos empregar para facela máis barata pauciños de “chatka” artificial en troques da necora.

Tempo: 20 minutos

Tapas: 4

Figos con xamón

Ingredientes:

  • 4 figos
  • 1 lasca de xamón
  • Aceite de oliva

Descrición:

  1. Pelámo-los figos e cortámolos en cuartos facendo os cortes darriba cara abaixo.
  2. Cunha tesoira picámo-lo xamón moi miudiño.
  3. Pomos o figo aberto nunha culler de presentación e esparexemos o xamón por riba e regámolo todo cun fío de aceite de oliva.

Tempo: 10 minutos

Tapas : 4

Bocadiño de xamón e queixo azul

Ingredientes:

  • Queixo azul
  • 4 panciños pequenos
  • 4 lascas de xamón
  • Aceite de oliva

Descrición:

  1. Cortámo-lo pan ó longo pola metade; ten que ser pan tenro do día para que trisque ó mordelo.
  2. Untámo-lo pan con queixo, por riba pomos unha lasca de xamón e un chorriño de aceite de oliva.
  3. Tapamos coa outra metade de pan deixando que se vexa por fora o que vai dentro do pan.

Nota:

  • Podémolo presentar tamén sobre medio pan torrado espetado cun pauciño
  • Podemos empregar outros tipos de queixo sempre que os podamos untar ou fundir.

Tempo: 10 minutos

Tapas: 4

Bocadiño de xamón, pemento e queixo

Ingredientes:

  • 4 pementos de piquillo enteiros en lata
  • 4 panciños pequenos
  • 4 lascas de xamón
  • 2 lascas de queixo
  • 1 dente de allo
  • Aceite de oliva
  • Azucre
  • Sal

Descrición:

  1. Dámoslles ós pementos unha voltas polas dúas caras nunha tixola con aceite de oliva cunhas lascas de allo e un chisco de azucre.
  2. Cortámo-lo pan ó longo pola metade, ten que ser pan tenro do día para que trisque ó mordelo.
  3. Pomos enriba da metade de abaixo media lasca de queixo por riba desta o pemento quente para que amoleza e por riba de todo unha lasca de xamón.
  4. Tapamos coa outra metade de pan deixando que se vexa por fora o que vai dentro do pan.

Nota:

  • Se non temos pementos de piquillo podemos empregar pemento vermello pero antes hai que asalo e logo de pelalo darlle unha volta na tixola coma fixemos co piquillo
  • Podémolo presentar tamén sobre medio pan torrado espetado cun pauciño

Tempo: 15 minutos

Tapas: 4