Entries tagged with “pementos”.


Albóndegas con ovos agochados

 

Ingredientes:

Para as albóndegas

  • 8 ovos
  • 400 g de carne picada de porco
  • 1 cebola nova (100g)
  • 1 allo porro, a parte branca
  • 1 dente de allo
  • 1 cullerada de perexil picado
  • 1 ovo
  • Pementa branca
  • Fariña, ovo e pan relado para rebozar
  • Aceite de oliva e sal

 

Para o prebe:

  • 1 cebola grande (300g)
  • 1 pemento verde italiano (100g)
  • ½ pemento vermello (150g)
  • 1 allo porro, a parte verde
  • 1 cenoria
  • 2 culleradas de tomate fritido
  • Caldo de carne

 

 

 

Elaboración:

  1. Pomos a cocer os ovos en auga con sal polo decurso duns 8 minutos; logo diso arrefriámolos, sacámoslles a casca e reservámolos.
  2. Namentres, picamos miudiños a cebola nova mailo allo porro e amolecémolos nunha tixola cun fondo de aceite e un chisco de sal.
  3. Logo diso mesturámolos coa carne picada mailo allo sen o xermolo para que non repita mailo perexil moi picadiños, o ovo batido, o sal necesario, pementa ó gusto e amasamos coas mans ben limpas.
  4. Afastamos uns 50 g desta mestura e co resto facemos 16 partes iguais.
  5. Cortámo-los ovos pola metade ó longo, sacámoslle a xema, mesturámola cos 50 g de carne afastada e reenchemos os ocos dos ovos.
  6. Esmagamos os 16 anacos de carne picada que temos reservados, facemos obleas redondas coas que envolvemos os ovos reenchidos e facemos 16 albóndegas
  7. Rebozámolas en fariña, e ovo e fritímolas en aceite ben quente; logo diso botarémoslles o prebe que faremos despois e deixarémolas cocer nel durante uns 5 minutos.
  8. Para facer o prebe, amolecemos, nuns 50 ml do mesmo aceite de fritirmos as albóndegas, a cebola, os pementos verde e vermello, a cenoria e a parte verde do allo porro, todos eles picados; cando estean moles, engadímo-lo tomate mailo caldo e deixamos cocer durante uns 15 minutos; logo diso triturámolo e botámolo nas albóndegas cos ovos agochados. Deixamos que cozan xuntos uns 2 minutos.

 

Nota:

  • Se o prebe ficara pouco espeso podemos espesalo desfacendo maicena en aceite e engadirlla  ó prebe. Tamén podemos botar, sempre coada, fariña desfeita en auga fría.
  • O mellor é comelas logo de darlles unhas horas ou ata 1 día de repouso.
  • Tamén podemos trocar o prebe por unha fritada de cebola e pemento verde italiano cortado en tiras e pemento vermello asado, tamén en tiras e algo de tomate fritido

 

 

  • Tempo: 50 minutos                                       Comensais: 4 persoas

Bacallau á Palleira

 

Ingredientes:

  • 4 talladas do lombo de bacallau desalgado
  • 2 pementos vermellos (400g)
  • 2 pementos verdes (400g)
  • 3 cebolas brancas
  • 3 dentes de allo
  • 5 patacas
  • Aceite e sal

 

Preparación:

  1. Cortámo-la cebola, os pementos mailo allo en xuliana e pómolos amolecer a fogo maino nunha tixola con aceite. Salgamos e tapamos cun testo para que amoleza mellor e non seque. Cando estea ben mol levantámo-lo lume e deixamos que doure un chisco.
  2. En tanto, nunha prancha ou nunha tixola un chisco de aceite pomos as talladas de bacallau para que se vaian facendo a fogo medio ata que estean algo douradas. (Uns 5 minutos)
  3. Pelámo-las patacas e cortámolas en lascas de 0,5cm. de groso e logo de salgalas fritímolas en aceite moi quente e abondoso ata que estean douradas.
  4. Facémo-lo montaxe do prato pondo unhas patacas embaixo e por riba a tallada de bacallau cuberta coa fritada de pementos e cebolas.

 

Tempo: 30 minutos

Comensais: 4 persoas

Pastel de bonito

Ingredientes:
• 300g. de bonito do norte (Thunnus alalunga)
• 4 pementos do piquillo
• 5 culleradas de tomate fritido
• 4 ovos
• 100ml. de nata líquida
• ½ parte branca dun allo porro
• ½ cebola nova
• Manteiga e pan relado
• Pementa branca
• Aceite de oliva e sal
Para a maionesa
• 1 ovo
• 200 ml de aceite de mirasol
• ½ Limón (o zume)
• sal
Para o prebe rosa
• Maionesa
• 2 culleradasde zume de  laranxa
• 1 cullerada de ketchup
• 1 cullerada de brandy

Preparación:
1. Cocémo-lo bonito en auga con sal polo decurso de ½ hora. Sacámolo, arrefriámolo e logo de limpalo, esmigallámolo. Tamén podemos facelo con conserva de bonito en aceite.
2. Picámo-la cebola mailo allo porro e amolecémolos, a fogo maino, ata dourar, sen torralo, nunha tixola con aceite. Logo disto engadímo-los pementos, triturámolos, arrefriámolos e reservámolos.
3. Batémo-los ovos e mesturamos nunha cunca fonda coa nata, o bonito, o tomate fritido, un chisco de pementa branca e o triturado de cebola e pementos.
4. Untamos un molde rectangular con manteiga e empoámolo con pan relado.
5. Vertemos todo dentro do molde e metémolo ó forno xa quentado a 180ºC ó baño maría polo decurso de 90 minuto,s a media altura. Probamos se está feito, picando cunha agulla, se sae limpa xa o está. Deixámolo arrefriar ben antes de sacalo do molde.
6. Facémo-la maionesa botando no vaso do batedoiro eléctrico, o ovo mailo zume de limón, uns 100 ml de aceite e un chisco de sal; batémolo coas coitelas, sen mover o batedoiro do fondo e cando comece a ligar xa podemos move-lo batedoiro darriba abaixo e mentres seguimos batendo imos engadindo aceite ós poucos e de seguido ata o espesor axeitado. Rectificamos de sal se o precisa..
7. Facémo-lo prebe rosa tomando a metade da maionesa feita e engadíndolle o zume de laranxa, o brandy mailo ketchup.
8. Cortámolo en rebandadas e servímolo frío acompañado cos dous prebes.
9. Tamén o podemos servir quente acompañado cunha salsa coma esta:
Nunha tixola con aceite Amolecemos 1 cebola, un dente de allo e 200 g de pementos verdes, engadíndolle logo cando estean brandos 5 pementos de piquillo. Botámoslle logo un vaso de caldo de peixe e cociñamos ata que espese un chisco. Triturámolo todo e coámolo co chino. Pomos no seu punto de sal.
Tempo: 1 ½ hora
Comensais: 4 ou máis

Marmita ou marmitako de bonito

Ingredientes:
• 500 g de bonito fresco ou atún
• 6 patacas medianas
• 200 g pementos verdes
• 200 g pemento vermello
• 2 cebolas vermellas
• 2 pementos secos ou pemento doce
• 2 dentes de allo
• Caldo de peixe
• Aceite de oliva e sal

Preparación:
1. Sacámoslle a pel, as arganas e a parte negra ó bonito, cortámolo en anacos medianos e reservámolo.
2. Facemos un caldo de peixe coa pel, arganas, e a parte negra mais unha cebola, porro, cenoria e allo.
3. Pomos a remollo os pementos secos en auga ben quente durante unha media hora e reservámo-la polpa logo de sacarlla rascando cun coitelo.
4. Nunha cazarola de tamaño medio con uns 50 ml de aceite botamos a cebola picada, un pouco de sal e amolecémola ben, cando xa estea mol engadímo-los pementos mailos dentes de allo picados todos miúdos e deixamos que se fagan ata que estean brandos; no último momento engadimos a polpa dos pementos secos. Podemos tritura-la cebola e os pementos cando xa estean feitos.
5. Entanto, pelamos, limpamos e escachámolas patacas (non as cortamos) en anacos do tamaño dunha noz e engadímolas a cazarola e refogámolas uns minutos coas verduras.
6. Engadímolo caldo de peixe quente cubrindo as patacas con 1-2 dedos de auga non máis; ten que quedar caldoso para comer con culler e deixamos cocer uns 25-30 minutos ata que as patacas comecen a esfarelarse un pouco e a engorda-lo caldo.
7. Afastámolo do lume e seguido engadímo-lo bonito.
8. Deixámolo repousar 10 minutos e arranxámolo de sal antes de servilo quente.
Notas:
• A marmita ou marmitako de bonito é un prato de pescadores do vascos que se estendeu por toda a costa; o máis enxebre é o de bonito, pero pódese facer con outros peixes, como bacallau, xurelo, cabala, pescada, luras, etc
• Podemos engadir 2 tomates ben maduros ou salsa de tomate fritido en troques dos pementos secos; mais deste xeito o marmitako di algo máis acedo.

Tempo: 45 minutos
Comensais: 4

Ensalada de bonito e patacas

Ingredientes:
• 300g. de bonito fresco (1 roda)
• 300g. de patacas pequenas
• 3 ovos
• 1 cenoria
• 1 cebola verde
• ½ pemento vermello
• ½ pemento verde
• 1 tomate maduro
• Olivas negras
• Vinagre de xerez
• Aceite
• Sal

Preparación:
1. Cocémo-la roda de bonito en auga con sal durante 20 minutos, deixámola arrefriar ma auga e logo de limpalo de peles, sangue e arganas esnacámolo en pedazos un pouco grandes. Reservámolo
2. Lavámo-las patacas e cocémolas enteiras e sen pelar en auga e sal por uns 25 minutos ou más segundo sexan de grandes. Logo de arrefrialas, pelámolas, cortámolas en cuartos ou en rodas se son algo máis grandiñas e reservámolas.
3. Xunto coas patacas cocemos tamén os ovos, picados cun alfinete pola parte gorda para que saia o aire e non rebenten, maila cenoria sen pelar. Os ovos sacámolos logo de coceren 8 minutos e a cenoria logo dos 13. Arrefriámolos.
4. Sacámoslle a casca ós ovos, pelámo-la cenoria e cortámolos en rodas. Reservámolos
5. Cortámo-los pementos, logo de lavalos e sacarlles as sementes, en anacos mediados, duns 2x2cm. Quitámoslle as sementes ó tomate e cortámolo en anacos algo máis pequenos que os pementos. Cortamos a cebola en anacos coma os do tomate. Salgámolo todo e reservámolo.
6. Mesturámolo todo, agás o ovo, nunha cunca fonda e pasámolo a unha bandexa de presentación.
7. Adornámolo cos ovos e as olivas negras e regámolo cunha vinagreta feita con 9 culleradas de aceite de oliva e 3 de vinagre
Notas:
Para esta ensalada empregamos bonito fresco (tunnus alalunga, atún branco) moi saboroso e apreciado pare este tipo de receitas; isto non quita que poidas empregar outra clase de atún, fresco, en aceite ou se che peta en vinagre; neste derradeiro caso ollo logo ó aliñar coa vinagreta.
• Os pementos son dos de asar; neste caso van crus pero podes asalos se non che gustan así.
Tempo: 1 hora
Comensais: 4 persoas

Tapa de pemento recheo de bonito

Ingredientes:
• 4 pementos de “piquillo” enteiros para encher
• 100 g. de ventrecha de bonito en aceite
• ¼ de cebola nova doce
• ¼ de pemento verde
• Vinagre de Módena
• Aceite de oliva virxe e sal

Preparación:
1. Sacámoslle o aceite ó bonito e esmigallámolo en anacos pequenos coma un garavanzo e reservámolo
2. Picámo-la cebola mailo pemento miudiños e facemos unha vinagreta con 3 partes de aceite e 1 de vinagre que engadimos ó picado. Deixamos repousar uns 30 minutos.
3. Nunha tixola con aceite facemos un pouco os pementos botándolle un chisco de sal e outro de azucre.
4. Mesturamos o bonito con 1-2 culleres da vinagreta e enchémo-los pementos de “piquillo”.
5. Servímolos fríos postos nun prato regados cun chisco de aceite de oliva virxe para darlles brillo.

Tempo: 15 minutos
Tapas: 4

Tortilla de patacas, pementos e bacallau

 Ingredientes: 

Tortilla de patacas:

  • 400 g de patacas
  • ½ cebola verde
  • 4 ovos
  • Aceite
  • Sal

Tortilla de pementos:

  • 4 ovos
  • 1 dente de allo
  • 4 pementos verdes “doce italiano”
  • ½ pemento morrón
  • Aceite
  • Sal

Tortilla de bacallau:

  • 300 g de bacallau desalgado e esmigallado
  • 1/2 cebola verde
  • 4 ovos
  • Aceite
  • Sal

 

Descrición:

  1. Tortilla de patacas: Pelámo-las patacas e  picámolas para tortilla. Picámo-la cebola en anacos pequenos mesturámola coas patacas e salgamos todo
  2. Quentamos nunha tixola aceite abondo e fritimos nel as patacas a fogo medio remexendo de cando en vez ata que estean brandas. Sacámolas do aceite e escorrémolas.
  3. Batémo-los ovos, salgámolos e mesturámolos coas patacas.
  4. Quentamos a tixola cun chisco de aceite, botamos a mestura de ovos e patacas  e facemos a tortilla. (pouco tempo por cada lado para que non quede seca)
  5. Tortilla de pementos: Cortámo-los pementos limpos en tiras delgadas e o allo en tiras finiñas e cociñámolos nunha tixola con aceite a fogo baixo ata que estean brandos. Engadimos un chisco de sal.
  6. Batémo-los ovos, salgámolos e mesturámolos cos pementos
  7. Quentamos unha tixola cun chisco de aceite, botamos nela a mestura de ovos e pementos  e facemos a tortilla. (pouco tempo por cada lado para que non quede seca)
  8. Tortilla de bacallau: Amolecémo-la cebola nunha tixola con aceite e sal.
  9. Cando a cebola estea branda engadímo-lo bacallau e refogamos
  10. Batémo-los ovos, salgámolos e mesturámolos co bacallau.
  11. Quentamos unha tixola cun chisco de aceite, botamos a mestura de ovos e bacallau  e facemos a tortilla. (pouco tempo por cada lado para que non quede seca)
  12. Montámo-la tortilla: Pomos nun prato grande primeiro a tortilla de patacas, logo a de pementos e por riba de todo a de bacallau. Adornemos cunha tiras de pemento asado ou pementos fritidos.

 

Nota:

  • Se a queres facer máis contundente podes pór entre as tortillas lascas de queixo ou/e maionesa.
  • Par esta tortilla cómpre unha tixola grande, polo menos de  28cm. de diámetro para que as tortillas queden delgadas e non avulten moito ó montalas.

 

Tempo: 45 minutos

Comensais: 8 persoas

Ventrisca de bonito con salsa de pementos

 

Ingredientes:

  • 1 ventrisca de bonito (600 g)
  • 2 cebola
  • 4 pementos verdes (100g)
  • 1 dente de allo
  • 1 vaso de caldo de peixe
  • Aceite
  • Sal

 

Descrición:

  1. Picámo-la cebola mailo allo e amolecémolos nunha tixola con aceite a fogo baixo.
  2. Cando estea un pouco brando engadimos os pementos limpos e picados.
  3. Deixamos facer uns minutos ata que doure un chisco e logo de engadir o vaso de caldo de peixe, deixámolo cocer todo xunto polo decurso de uns 15 minutos.
  4. Logo disto triturámolo, pómolo a punto de sal, coámolo cun coador ou un chino e reservámolo.
  5. Salgamos a ventrisca e facémola a prancha nunha tixola cun chisco de aceite a fogo forte durante uns 3 minutos.
  6. Pasado ese tempo, afastámola do lume e sacámoslle a pel ou tea verde que ten pola parte de dentro. Tamén con moito coidado e cunha espátula ou coitelo afastamos a carne da pel do peixe sen esnaquizala.
  7. Nunha pota ampla para que caiba a ventrisca  pomos a metade do prebe, enriba a ventrisca e cubrímolo co resto de prebe de pementos e deixamos que se fagan xuntos polo decurso de uns 4 minutos sen remexelo só movendo a cazola.

 

Nota:

En troques dos pementos verdes podemos empregar pementos do piquillo vermellos ou pementos de asar. O sabor do prebe cambia segundo os pementos que empreguemos.

 

 

Tempo: 30 minutos

Comensais: 4 persoas

Pementos recheos de verduras e lagostinos

 

Ingredientes:

  • Rebandadas de pan
  • Pementos de piquillo enteiros para encher
  • Verduras:
    • ½  pemento verde
    • ¼  pemento vermello
    • ½ cebola
    • ¼  cabaciño
    • 4 champiñóns
  • 6 lagostinos cocidos
  • Leite
  • 1 Ovo batido  + Fariña
  • Aceite de oliva
  • Sal

Descrición:

  1. Picamos tódalas verduras e refogámolas nunha tixola con aceite ata que estean tenras.
  2. Logo disto engadimos os lagostinos picadiños e deixamos facer outro pouco.
  3. Deixamos que reduza un pouco, pomos a punto de sal e engadimos unha culler de fariña e algo de leite para liga-la farsa
  4. Enchémo-los pementos coa farsa, rebozámolos con fariña e ovo batido e fritímolos na tixola con abondoso aceite.
  1. Servímolos quentes sobre cadansúa rebandada de pan que torraremos un chisco.

Tapas: 4 ou máis

Tempo: 30 minutos

Berenxenas recheas de lagostinos

 

Ingredientes: 4 persoas

* 4 berenxenas

Para o recheo:

* 16 lagostinos

* ½ cebola

* 1 dente de allo

* Aceite

* Sal

Para o prebe de queixo:

* 25 g de queixo de ovella, cabra ou  queixo azul

* 100 ml de nata

Para o prebe marisco

* 5 pementos de piquillo

* ½ cebola

* 1 dente de allo

* ½ copa de brandy

* As cabezas dos lagostinos

* Aceite

* Sal

Descrición:

Facémolo recheo:

1.      Partímo-las berenxenas pola metade ó longo e baleirámolas coa axuda dunha culler sen rompelas.

2.      Fritímo-la pel das berenxenas nunha tixola con aceite abondo. Sacámolas do aceite e reservámolas escorregadas en papel absorbente.

3.      Amolecémo-la cebola mailo allo picados nunha tixola cun chisco de aceite e salgamos.

4.      Engadímo-lo miolo das berenxenas picadiño e cociñamos ata que estea feito remexendo de cando en vez para que non se apegue.

5.      Pelámo-los lagostinos, picámolos miudiño e engadímolos  á tixola e logo de deixalos facer uns 3-4 minutos afastámolo do lume.

 

Facémo-lo prebe de queixo:

1.      Picámo-lo queixo e cociñámolo coa nata. Remexendo, ata que espese. Se non chega a desfacerse o queixo cómpre trituralo co batedoiro eléctrico e coalo cun coador de arame.

Facémolo prebe de marisco:

1.      Amolecémo-la cebola mailo allo picados nunha tixola con aceite e un chisco de sal

2.      Cando estea un chisco branda engadimos as cabezas dos lagostinos, esmagándoas co garfo para que solten a súa substancia. Cociñamos 5 minutos.

3.      Botámo-lo brandy e prendémoslle lume

4.      Engadímo-los pementos asados mailo vaso de caldo de peixe e cociñamos uns 5 minutos máis.

5.      Logo disto triturámolo todo co batedoiro eléctrico, coámolo e reservámolo.

Montámo-lo prato:

1.      Pómo-las berenxenas nunha bandexa de forno untada con aceite e enchemos as peles co recheo preparado

2.      Cubrímolo co prebe de queixo e metémolo a grellar no forno quente a 200ºC para que douren

3.      Pomos no fondo dos pratos o prebe de marisco quente e por riba cadansúas metades de berenxena.

 

Tempo: 60 minutos

Comensais: 4