Entries tagged with “pemento”.


Alcachofas reenchidas de bacallau

 

Ingredientes:

  • 24 alcachofas
  • 1 limón

Para o recheo

  • 400 g de bacallau
  • 200g de cebola branca
  • 2 pementos do piquillo
  • 1 pemento verde italiano (100g)
  • 2 dentes de allo
  • Aceite de oliva virxe e sal

Para a salsa

  • 1 cebola (300g)
  • 1 dente de allo
  • 2 pementos chouriceiros secos
  • 500 ml de caldo de peixe
  • Aceite de oliva virxe e sal

 

Preparación:

  1. Se o bacallau non está desalgado metémolo en auga dentro da neveira, entre 24, 36 e 48 horas segundo sexa de groso e  mudándolla a auga cada 8 horas, logo diso secámolo, sacámoslle as arganas maila pel e cortámolo en dados de 1cm. aproximadamente
  2. Limpámo-las alcachofas sacándolle as follas de fora ata que saian tenras, cortámoslles algo máis da metade cara a punta, e metémolas en auga con zume de limón para que non oxiden.
  3. Cocémo-las alcachofas en auga con sal e unha cullerada de fariña, durante uns 15-18 minutos; cando rematen de coceren metémolas en auga ben fría, para cortar a cocción; escoámolas e  cunha culleriña baleirámolas polo centro, para facer o oco onde meter o recheo, facémoslle un corte no cu para que se teñan en pé. Reservámolas
  4. Ó mesmo tempo facémo-la salsa e para iso limpámolos pementos chouriceiros e pómolos a remollo en auga quente. Cando estean moles afastámo-la carne da pel cun coitelo e reservámo-la carne esmiuzada.
  5. Nunha tixola cun chisco de aceite amolecémo-la cebola mailo dente de allo picadiños, a fogo maino e cun chisco de sal.
  6. Cando estean ben moles engadímo-la carne dos chouriceiros1 cullerada de fariña e logo de refogala, botámo-lo caldo e deixamos cocer durante 20 minutos. Logo diso triturámolo e reservámolo. Se ficara espesa demais diluímola con auga. Reservamos esta salsa
  7. Facémo-lo amoado para o recheo Nunha tixola cun fondo de aceite amolecémo-la cebola mailo allo picados; logo diso engadímo-los pementos do piquillo picados mailo bacallau e deixámolo refogar durante uns minutos. Rematamos engadíndolle unhas culleradas da salsa e reservámolo.
  8. Reenchemos con este amoado as alcachofas, arrombámolas nunha bandexa de levar ó forno, regámolas coa salsa e metémolas ó forno a 200 ºC ata que estean quentes.
  9. Servímolas en pratos chairos decorados cun fío de aceite de perexil.

 

 

Tempo: 45 minutos                                                  Comensais: 4-6

Bonito con tomate

Ingredientes:
• 2 toros de bonito duns 2-3 cm. de groso
• 1 cebola branca
• 1 pemento verde (100 g.)
• 1 lata de tomate fritido (450 g.)

Descrición:
1. Limpámo-los toros de bonito sacándolles a pel, as arganas a carne negra e salgámolos. Quedarán 8 anacos triangulares.
2. Picámo-la cebola mailo pemento en anacos pequenos e pómolos a amolecer, a fogo maino nunha tixola con aceite. Cando estean feitos engadímo-lo tomate fritido. Non o trituramos.
3. En tanto noutra tixola con aceite a fogo forte, marcámo-las talladas de bonito por cadansúas bandas só para que selen; teñen que quedar crúas por dentro.
4. Pómo-lo bonito nunha tarteira de barro e regámolas co prebe de tomate quente e deixámolos que se fagan xuntos 1 minuto.
5. Deixámo-lo repousar 5 minutos mais, para que termine de facerse por dentro, e servímolo quente.

Notas:
O tomate fritido podes mercalo feito ou facelo ti mesmo con tomates cebola e pemento.
• A min gústame encontrar anacos de cebola e pemento no prebe, pero se queres podes trituralo.

Tempo: 15 minutos
Comensais: 4

Rolo de bonito fresco

Ingredientes:
• 1 kg de bonito do norte fresco
• 2 ovos cocido
• 1 pemento vermello asado
• 1 cebola nova
• 2 dente de allo
• Miolo de pan
• 2-3 ovos
• Leite
• Perexil
• Aceite de oliva e sal
• Fariña e ovo para rebozar
Para o prebe:
• 2 cebolas
• 1 folla de loureiro
• 2 pementos secos
• 4 dentes de allo
• 1 ½ vaso de caldo de peixe
• 1 vaso de viño branco
• 1 cullerada colme de fariña
• Aceite de oliva e sal

Preparación:
1. Limpámo-lo bonito sacándolle a pel, as arganas e cortámolo miudiño cun coitelo moi afiado.
2. Pomos de mollo os pementos en auga ben quente uns 20 minutos e sacámoslle o miolo.
3. Facémolo prebe e para iso pomos a amolecer nunha tixola con aceite a cebola xunto cos dentes de allo, a polpa dos pementos, sal e a folla de loureiro.
4. Cando a cebola estea mol engadímoslle o viño branco e deixamos facer ata que a cebola estea ben feita. Cando estea consumido case todo o viño, engadímoslle a fariña e o caldo de peixe, que podemos facer coas espiñas e a pel do bonito. Deixamos facer ata que espese un chisco. Triturámolo e reservámolo.
5. Entanto facémolo prebe, botamos nunha cazarola fonda o bonito picado xunto coa cebola amolecida nun chisco de aceite, o dente de allo, os ovos cocidos, o pemento asado, o perexil, todos eles moi picados e o miolo de pan, mollado en leite esmigallado.
6. Imos botándolle á masa os ovos crus incorporándoos un a un e so os que admita.
7. Logo de mesturalo ben facemos 2 rolos que rebozamos con fariña, ovo batido e fritimos en abondoso aceite ben quente
8. Botámo-lo prebe nunha cazarola, quentámolo a fogo maino e pomos nel os rolos de bonito que deixaremos ferver a fogo maino co testo posto para que se fagan por tódolos lado uns 3-5 minutos. Deixamos repousar uns 5 minutos máis fora xa do lume.
9. Para que non esmigallen ó cortalos deixámolos arrefriar e cortámolos en toros duns 2 cm. de groso e servímolos regados co prebe.

Nota:
• O rolo non hai que cocelo moito no prebe, pois se nos pasamos queda seco
• Podemos acompañar o rolo con mazás reinetas peladas, sen carozo, cortadas pola metade e escaldadas uns 2 minutos en auga.

Tempo: 60 minutos
Comensais: 4 ou máis

Fabas brancas con luras

 

Ingredientes:

  • 300g de fabas brancas
  • 12 luras pequenas
  • 2 cebolas
  • 1 porro
  • 1 dente de allo
  • 3 culleres de prebe de tomate
  • 1 culler de pemento
  • Aceite
  • Sal

 

Descrición:

  1. Limpa-las fabas e deixalas a remollo en auga fría de véspera.
  2. Botalas nunha pota con ½ cebola, o porro, o allo mailo sal e 1 ½  de auga fría.
  3. Pola a cocer polo decurso de 2 horas a fogo medio, “asustándoas” de cando en vez; é dicir botarlles un pouco de auga fría para que paren de ferver.
  4. Namentres se fan as fabas preparamos as luras.
  5. Limpámo-las luras sacándolles a pel, as tripas a pluma que teñen, dámoslles a volta e metémoslle dentro os tentáculos da cabeza.
  6. Nunha tixola con 6 culleres de aceite amolecemos a cebola restante picada en anacos pequenos cun chisco de sal e tapada cun testo para que non seque e non se torre a cebola.
  7. Cando estea branda engadimos  as luras, as culleres de tomate e o pemento e deixamos facer ata que as luras espeten ben; é dicir estean feitas. Sempre tapadas co testo.
  8. Cando as fabas estean xa cocidas sacamos a cebola mailo porro e engadímoslles as luras coa súa cebola
  9. Remexemos un chisco de vagar e deixamos repousar uns 20 minutos antes de servilo nos pratos.

 

Tempo: 90 minutos

Comensais: 4 persoas

Patacas recheas

 

Ingredientes:

  • 2 patacas medianas
  • 100 g de carne picada de porco
  • ¼ de cebola
  • ¼ de pemento verde
  • 1 cullerada de tomate fritido
  • Queixo relado
  • Aceite de oliva
  • Pementa negra
  • Sal

Descrición:

  1. Lavamos ben as patacas e, logo de envolvelas en papel de aluminio, asámolas no forno quente a 190ºC durante uns 35 minutos.
  2. Deixámolas arrefriar e sen pelalas, cortámolas pola metade ó longo e baleirámolas cunha culler sen rompelas, para meter o recheo.
  3. Picámo-la cebola mailo pemento miúdos, amolecémolos nunha tixola con aceite. Logo disto engadimos a carne picada e deixamos que se faga; despois engadimos o tomate fritido, botámoslle un chisco de pementa moída e salgamos.
  4. Enchemos os ocos das patacas coa mestura anterior e esparexemos queixo relado por riba.
  5. Antes de servilas pasámolas polo forno para que funda o queixo e doure un pouco

 

Tapas: 4

Tempo: 45 minutos

Receita: Ensalada Morna de Polbo e Bacallau

Ingredentes

  • 1 polbo duns 2 Kg,
  • 1/2 Kg de bacallau (lomos)
  • Leitugas variadas
  • Pemento doce ou picante
  • Aceite, vinagre e sal (sal gordo pra arranxalo polbo)

(máis…)

Receita: Carne ó caldeiro

Ingredientes

  • 2 kg de carne de pote (faldra sen costela)
  • 8 patacas
  • 100gr de unto
  • 1 dente de allo
  • Pemento doce ou picante
  • Sal mariño

Descrición

  1. Cortámola carne en anacos grandes, (aprox. 100 gr.) e metémolos nunha pota grande con auga, o unto, un pouco de sal mariño e pómolo a cocer de vagar.
  2. Cando a carne estea case cocida (picámola cun garfo para sabelo), engadímolas patacas peladas e cortadas en cachelos (ó través en anacos grandes) e deixámolas ferver. Con 20 minutos teñen dabondo para estaren cocidas.
  3. Escoamos todo e botámolo nunha fonte, esparexemos pemento por riba, un dente de allo picado miúdo, un pouco de sal groso e regámolo con aceite cru.
  4. Servímolo quente

Notas

 Se ó cocela carne non temos unto podemos botar manteiga de porco ou touciño branco curado. Non sabe igual pero…

Duración: 80 minutos

Comensales: 8 persoas

Recipe by on.
Microformatting by hRecipe.

O polbo á feira é unha preparación culinaria típica de Galiza e consistente en polbo fervido inteiro e servido con sal, aceite de oliva e pimentón. Seu nome provén de que era unha comida tradicional nas feiras e romarías, servido en pratos de madeira (mais fáceis de transportar) ainda que agora van desaparecer por motivos de hixiene.

Era un prato nun comun nuha época en que os transportes eran moi lentos o peixe fresco só estaba disponíbel perto da costa, porén o polbo seco (como o bacallau ou o congro) chegaba a todas partes.

lngredentes:

  • I polbo de 1 quilo
  • pemento picante
  • pemento doce
  • aceite
  • sal groso

Instrucións:

      1. Mellor utilizar un polbo conxelado pois así evítase ter que mazalo para que non estexa duro.

        2. Unha vez desconxelado ponse a ferver auga abundante e cando esté fervendo collese o polbo pola cabeza e mergúllase unhas can­tas veces na auga (meténdoo e sacándoo) para que non solte a pel.
        3. Deixase cocer de 40 a 50 minutos, dependendo do tamaño do polbo.
        4. Unha vez coci­do, escorrese e cortase cunhas tesoiras.
        5. Sírvese nun plato de madeira aliñado con sal groso, aceite e pemento.
        6. Dependendo do forte que o quei­ramos engádese o pemento picante, doce ou mesturado.

Fuente: Wikibooks.org

Receita: Xoubas sobre Cama de “Panadeiras”

Ingredentes

  • 1 Kg de xoubas
  • 1 pemento verde
  • 1 cebola grande
  • 3 polas de perexil
  • 3 dentes de allo
  • 2 Kg de patacas
  • Pemento doce
  • ½ vaso de viño branco
  • Caldo de pescado ou de abrilos mexillóns, ameixas, berberechos, etc
  • Aceite
  • Sal

(máis…)

Receita: Mexillóns en Vinagreta

Ingredentes

  • 2 Kg. de mexillóns
  • ½ vaso de viño branco
  • 2 follas de loureiro
  • 1 cebola
  • 1 pemento verde
  • 1/4 pemento vermello
  • 1 vaso de aceite
  • 1/3 vaso de vinagre
  • 4 cogombros en vinagre
  • Sal

(máis…)