Entries tagged with “pemento doce”.


Bacallau pil-pil con coliflor

 

Ingredientes:

  • 4 talladas de bacallau duns 200 g
  • 4 dentes de allos
  • 250 ml de aceite de oliva virxe
  • 500 g de coliflor
  • ½ cebola branca (150g)
  • ½ pemento vermello (150g)
  • 2 dentes de allo
  • 1 culleradiña de pemento doce
  • 2 culleradas de salsa de tomate
  • Aceite de oliva e sal

 

Preparación:

  1. En primeiras, se non temos desalgado  o bacallau, porémolo a desalgar na neveira nunha cazarola con auga dabondo, durante 36 hora facendo 4 cambios de auga. Logo diso secámolos e sacámoslles as arganas.
  2. Pomos a quentar nunha cazarola, onde caiban xustiñas as talladas de bacallau, para que logo o aceite poida cubrilas, os 250 ml de aceite xunto cos dentes de allo de xeito que o aceite non colla moita temperatura para que os allos cozan nel.
  3. Cando estean dourados os dentes de allo, afastámo-la cazola do lume, quitámo-los allos e metemos nel as talladas coa pel cara arriba e deixámolas que se fagan a fogo moi baixo, de xeito que non suba dos 65ºC durante uns 8 minutos.
  4. Quitámolo bacallau, que mantemos nun sitio quente e afastamos tamén a metade do aceite, sen collera xelatina que estará no fondo,  e batémo-lo aceite xunto coa xelatina que soltou o bacallau, cun coador de arame ata emulsionala co aceite e obter o pilpil.
  5. Por outra banda limpámo-la coliflor, picámola en ramos pequenos e cocémola en auga con sal durante uns 13  minutos.
  6. Entrementres, picámo-la cebola mailo pemento pelado e cortado tiras e amolecémolos nunha tixola ampla con aceite e sal. Cando a cebola estea mol engadímolo tomate mailo pemento doce e deixamos facer uns 2 minutos máis; logo diso engadímola coliflor escoada e mesturándoo todo deixamos que se mesturen os sabores cociñándoos todos xuntos durante uns 2 minutos.
  7. Presentámolo en pratos chairos pondo no fondo a coliflor e por enriba cadansúa tallada de bacallau cuberta co seu pilpil.

 

Nota:

  • Se o aceite non cubrira as talladas botarémoslle aceite quente por enriba cunha culler.
  • Hai a venda bacallau desalgado conxelado e sen conxelar moi ben de punto de sal.

 

Tempo: 45 minutos                                                  Comensais: 4

Bacallau ó xeito da Coruña

Ingredientes:

  • 250 g de bacallau en migas desalgadas
  • 4 patacas medianas
  • 4 porros ( só a parte branca)
  • 2 dentes de allo
  • 1 culler de pemento doce
  • 1 culler de vinagre
  • Un vasiño de pasas sen pebidas
  • Aceite de oliva

Descrición:

  1. Se non temos o bacallau desalgado pómo-las migas a desalgar en auga fría premendo coas mans para que solten o sal e cambiando de auga cada 30 minutos, así polo decurso de 2 horas.
  2. Limpámo-los porro se cortámolos en anacos duns 2 cm.
  3. Pelamos e lavámo-las patacas, cortámolas en cachelos duns 2 cm. de groso e botámolas nunha pota xunto cos porros, cubrímolas con auga e pómolas a ferver durante 20 minutos, sen ou con pouco sal.
  4. Cando leven fervendo 15 minutos engadimos o bacallau desalgado e deixamos ferver 5 minutos máis. Antes de escoalas, probámolas de sal e rectificamos se fixera falla.
  5. Pasado o tempo escoámo-las patacas mailo bacallau e botámolas nunha bandexa de pór á mesa
  6. Nunha tixola, cunhas 5 culleres de aceite, botámo-los allos, cortados en láminas, e cando empecen a dourar botámo-lo pemento doce, pero antes afastamos a tixola do lume para que non se queime o pemento.
  7. Coa tixola afastada engadimos o vinagre e, logo de remexer ben, regamos con esta mestura a bandexa de patacas e bacallau.
  8. Engadimos tamén as pasas sen pebidas que teremos postas a remollo 1 ou 2 horas antes
  9. Deixamos repousar un pouco e servímolo quente.

Notas:

  • Convén que as migas de bacallau queden un chisco salgadas, pois se quedan sen ningún sal perden a gusto e non son tan gorentosas; é por iso que non lles botamos sal ou botamos pouco ó pór a ferver as patacas e probamos e rectificamos de sal antes de escoa-las.

Tempo: 30 minutos

Comensais: 4

Polo á prancha con prebe de iogur

Ingredientes:

  • 4 coxas

Para o prebe

  • 3 iogures de leite enteiro
  • 2 culleres de perexil picado
  • ½ culler de pemento doce
  • 125 g de queixo azul

Descrición:

  1. Pomos tódolos ingredientes do prebe nun vaso do batedoiro agás o perexil que pomos a metade e triturámolo todo ata mesturalo ben.
  2. Pasámolo a unha cunca e reservamos. Sacámoslles os osos as coxas ou mandámosllo facer ó carniceiro se nós non sabemos.
  3. Salgamos un chisco e facémolas a prancha polo decurso de 4 minutos por cadanseu lado.
  4. Servímolas nos pratos con un pouco de prebe por riba e a maior parte pómola a un lado para ir untando segundo comemos. Adornamos cun chisco de perexil, picadiño miúdo, por riba do prebe.

Tempo: 30 minutos

Comensais: 4 persoas

Ingredientes:

* 4 talladas de bacallau salgado

* 200 g de ameixas

* 12 Camaróns

* ½  cebola

* ½ pemento verde

* 1 tomate maduro

* 50 g touciño febra pouco curado

* ½ vaso de viño branco galego

* 100 ml de caldo de peixe

* Pemento doce

* 2 dentes de allo

* 1 culler de fariña

* Unhas pólas de perexil

Descrición:

  1. Picamos miúdo a cebola, o pemento, o tomate sen pel nin pebidas mailos allos e pómolos nunha pota de barro con 3 culleres de aceite e deixámolos amolecer. A pota de barro ten que ser non moi alta e ampla para que caiban as talladas.
  2. Cando a cebola estea branda, afastamos do lume se está moi quente, e engadimos pemento doce, cunha culler de sobremesa teremos dabondo, tendo coidado que non se queime.
  3. Engadimos a culler de fariña, revolvemos ben e deixamos facerse un pouco; logo disto engadimos o caldo de peixe, o viño branco, o touciño cortado en anacos e unha culler de perexil picado.
  4. Deixamos coce-la salsa ata que engorde e remexendo para que non se apegue.
  5. Nun pota aparte abrímo-las ameixas e engadímo-lo caldo que solten á salsa. Neste intre probámo-la salsa e salgamos se for necesario. Ollo co sal pois o touciño e o caldo das ameixas son salgados.
  6. Engadímo-lo bacallau, as ameixas mailos camaróns, e cando rompa a ferver de seguido apagámo-la placa, esparexemos perexil picado por riba, tapamos e deixamos repousar enriba da placa ata que estea a temperatura de servilo (uns 10-15 minutos).

Notas:

  • Podemos empregar para este prato bacallau fresco e farémo-lo  caldo de peixe co pel, a espiña e outro anaco dun peixe máis corrente.
  • Esta receita fíxena con viño branco galego da bisbarra de Monterrei concretamente con viño do meu amigo Lolo pero podedes empregar calquera outro viño branco.
  • Se non tedes a man touciño de febra podedes empregar xamón, aínda que esta salsa leva touciño e non xamón.
  • E se non tedes camaróns ponde lagostinos ou outro marisco que teñades máis a man.

Tempo: 1 hora

Comensais: 4

Tapa de polo con prebe de iogur e queixo.

Ingredientes

  • 1 peituga de polo

Para o adobo:

  • Pementa negra moída
  • 1/2 culleradiña de pemento picante
  • 1 culleradas de pemento doce
  • 1 culleradiña de ourego
  • Aceite de oliva
  • Sal

Para o prebe de iogur e queixo:

  • 75 g de iogur grego
  • 150 g de crema de queixo (de untar)
  • 1 cebola de ensalada
  • 2 culleradas de ceboliño picado.

Descrición

  1. Facémo-lo prebe de iogur e queixo: Picámo-la cebola moi miudiña e amolecémola nunha tixola cun chisco de aceite cando estea mol engadimos  o ceboliño  miudiño e deixámolo facer un chisco máis. Mesturámolo todo co iogur e a crema de queixo, afastamos do lume e reservamos.
  2. Cortámolas peitugas de polo en tiras.
  3. Nunha cunca engadimos todos os ingredientes do adobo e cubrímolos con aceite de oliva, mesturamos ben, engadimos as tiras de peituga e deixámolas en adobo ó menos 24 horas dentro da neveira ou 4 horas fora dela.
  4. Pasado o tempo de adobo, facémolas nunha tixola á prancha case sen aceite e logo espetámolas tiras de peituga nun espeto de pau facendo un “S”
  5. Para monta-la tapa, pomos o prebe no centro dun prato e os espetos co polo ó redor

Tempo: 15 minutos

Tapas: 6

Recipe by on.
Microformatting by hRecipe.

Receita: Peixe sapo con grelos á galega

Ingredientes

  • 8 rodas de peixe sapo
  • 1 mañuzo de grelos
  • 4 patacas
  • 1 cebola branca
  • 4 dentes de allo
  • 1 póla de perexil
  • 1 culler de pemento doce
  • 100ml (½ vaso) de aceite de oliva
  • Sal

Descrición

  1. Lavámo-los grelos e pómo-los a cocer con auga, sal. Ó romper a ferver cambiámo-la auga e botamos unha pingada de aceite antes de polos a ferver de novo. Se son frescos con 15 minutos teñen de abondo. Logo disto escoámolos e reservámolos.
  2. Nunha pota con auga dabondo e sal botámo-las patacas peladas e cortadas en rodas de 2 cm. de groso, é dicir en cachelos, e pómolas a ferver 15 minutos xunto coa cebola cortada en xuliana, 1 dente de allo mailo perexil.
  3. Pasado este tempo pomos por riba as talladas de peixe sapo e deixámolas facer polo decurso de 5 minutos máis.
  4. Logo disto xa están cociñadas as patacas mailo sapo. Escoamos e botámolo todo nunha bandexa de presentación pondo as patacas por baixo do peixe sapo e os grelos quentes a un lado.
  5. Namentres, facemos un rustrido nunha tixola, botámolo allo picado miúdo no aceite, pómola ó lume tendo conta de non queima-lo allo; afastámo-la tixola do lume e deixamos tempera-lo aceite antes de engadir o pemento doce; remexemos e botamos este rustrido por riba da bandexa.

Tempo: 30 minutos

Comensais: 4

Recipe by on.
Microformatting by hRecipe.

Receita: Garavanzos con mexillóns

Ingredientes

  • 400 g de garavanzos
  • 16 mexillóns
  • 1 cebola
  • 2 cenorias
  • 2 dentes de allo
  • 1 culler rasa de pemento doce
  • 1 culler. de perexil picado
  • Aceite
  • Sal

Descrición

  1. Limpamos os mexillóns e abrímolos cun chisco de auga nunha pota con testo e reservámo-la carne maila auga que soltaron.
  2. Pomos os garavanzos a remollo de véspera en auga fría.
  3. Botámolos garavanzos nunha pota con auga fervendo (nesta auga poremos a auga que soltaron os mexillóns ó coceren) e sal xunto coas cenorias picadas e un chorriño de aceite.
  4. Cocémolos ata que estean tenros (Ollade o tempo que ven indicado no paquete; en pota normal de 2,5 a 3 horas). Sacámoslle a escuma que fan os garavanzos ó coceren.
  5. Nunha pota de barro con aceite, engadímo-la cebola mailos allos picados e deixámolos facer a fogo suave ata que amolezan e collan unha pouca cor.
  6. Logo disto engadimos o pemento doce e mesturamos ( non deixar queimar o pemento.
  7. Escoámo-los garavanzos, reservando medio vaso da auga de coceren, e engadímolos na pota de barro.
  8. Engadímo-la carne dos mexillóns, o medio vaso de auga reservada e deixámolos cocer uns 5 minutos a fogo suave antes de esparexer por riba o perexil picado e servir.

Notas

Os tempos de cocción dos garavanzos son tempos reais pero, dependendo de que clase de garavanzos, estes tempos poden variar, así que aconsello que sigades os tempos marcados, normalmente, nos paquetes.

Tempo: 3 horas

Comensais: 4 persoas

Recipe by on.
Microformatting by hRecipe.

Receita: Garavanzos con ameixas

Ingredientes

  • 300 g de garavanzos
  • 300 g de ameixas
  • 1 cebola
  • 1 cenoria
  • 1 pemento verde
  • 3 dentes de allo
  • 1 culleriña de pemento doce
  • 2 culleres de salsa de tomate
  • Perexil picado
  • aceite
  • sal

Descrición

  1. Pómo-los garavanzos a remollo de véspera.
  2. Escoámolos e botámolos nunha pota con auga fervendo , xunto coa cebola pelada e enteira, a cenoria e o pemento verde sen corozo.
  3. Salgamos un pouco, engadimos aceite e deixámolos cocer ata que estean tenros (Ollade o tempo que ven indicado no paquete; en pota normal de 2,5 a 3 horas).
  4. Sacámo-la cebola, a cenoria mailo pemento verde, triturámolos e reservamos.
  5. Pelámo-los dentes de allo e picámolos miudiños, pómolos a dourar nunha pota con aceite, engadímo-las ameixas e coa pota tapada esperamos a que abran as ameixas.
  6. Engadimos o pemento doce remexemos un pouco para mesturar e logo diso afastamos do lume.
  7. Engadimos na pota os garavanzos ben escoados, a salsa de tomate e o puré de verduras.
  8. Deixámolo cocer todo xunto a lume suave por uns 10 minutos para que se mesturen os sabores.
  9. Esparexemos por riba con perexil picado antes de servir.

Tempo: 3 horas

Comensais: 4 persoas

Recipe by on.
Microformatting by hRecipe.

Receita: Garavanzos con Bacallau

Ingredients

  • ½ Kg de  bacallau
  • ½ Kg de garavanzos
  • ½ Kg de espinacas
  • 3 ovos
  • 2 cebolas medianas
  • 4 dentes de allo
  • Fariña
  • 1 culler rasa de pemento doce
  • Aceite
  • sal

(máis…)