Entries tagged with “pementa negra”.


Alcachofas asadas

 

Ingredientes:

* 4 alcachofas

* 150 g de touciño magro

* 1 tomate maduro

* Queixo para fundir

* Aceite de oliva

* Pementa negra

* Sal

Descrición:

  1. Limpámo-las alcachofas, sacámoslles as follas de fora e cortámoslles tamén a puntas das follas ata que so quede o corazón tenro. Untamos con un limón para que non ennegrezan.
  2. Cocemos as alcachofas en pouca auga unha media hora nunha pota tapada.
  3. Namentres cortamos o touciño primeiro en lascas logo en tiras e por último en anacos pequeniños.
  4. Pelámo-lo tomate e sacámoslle as sementes. Picámo-lo resto en anacos pequeniños que sazonamos con pementa moída, sal e aceite de oliva. Deixamos macerar.
  5. Sacámo-las alcachofas unha vez cocidas  e sen auga pómolas nunha cunca ou bandexa de asar, abrímolas un pouco sen rompelas e botámoslle sal, pementa moída e aceite de oliva, logo  enchémolas co touciño mailo tomate macerado e cubrímolas co queixo.
  6. Metémolas media hora ó forno quente a 180ºC ata que estean douradas.
  7. Adornamos con perexil e presentamos en cadanseu pratiño unha alcachofa.

Tempo: 1 hora

Tapas: 4

Patacas recheas

 

Ingredientes:

  • 2 patacas medianas
  • 100 g de carne picada de porco
  • ¼ de cebola
  • ¼ de pemento verde
  • 1 cullerada de tomate fritido
  • Queixo relado
  • Aceite de oliva
  • Pementa negra
  • Sal

Descrición:

  1. Lavamos ben as patacas e, logo de envolvelas en papel de aluminio, asámolas no forno quente a 190ºC durante uns 35 minutos.
  2. Deixámolas arrefriar e sen pelalas, cortámolas pola metade ó longo e baleirámolas cunha culler sen rompelas, para meter o recheo.
  3. Picámo-la cebola mailo pemento miúdos, amolecémolos nunha tixola con aceite. Logo disto engadimos a carne picada e deixamos que se faga; despois engadimos o tomate fritido, botámoslle un chisco de pementa moída e salgamos.
  4. Enchemos os ocos das patacas coa mestura anterior e esparexemos queixo relado por riba.
  5. Antes de servilas pasámolas polo forno para que funda o queixo e doure un pouco

 

Tapas: 4

Tempo: 45 minutos

Croquetas de bacallau

Ingredientes:

Para a masa:

  • 600 g de bacallau desalgado e esmigallado miúdo
  • 50 g de gambas peladas
  • 125 g de fariña
  • 125 g de manteiga de leite
  • 1 l de leite
  • 1 cebola
  • 1 chisco de pementa negra
  • 1 chisco de noz moscada
  • Sal

Para rebozar e fritir:

  • ½ litro de aceite de oliva
  • Ovos batidos
  • Fariña
  • Pan relado

Descrición:

  1. Picámo-la cebola miudiña e botámola nunha pota coa manteiga e deixámola amolecer sen que tome cor.
  2. Logo disto engadímo-la fariña, a noz moscada maila pementa negra e remexermos para que se mesture ben coa graxa da manteiga.
  3. Agora engadímo-lo leite que teremos fervendo e remexemos de seguido para que se desfaga a fariña e non se formen grumos e nin se apegue.
  4. Botámo-lo bacallau esmigallado mailas gambas picadas e deixamos cocer por uns 5 minutos sen deixar de remexer.
  5. Probamos de sal e se cómpre sálgase un pouco.
  6. Sacámo-la masa da pota e botámola nunha cunca fonda para que arrefríe. Tapámo-la masa cun filme transparente para que non seque por fora e colla codia.
  7. Cando xa estea ben fría facémo-las croquetas que rebozamos en fariña, ovo e pan relado.
  8. Fritímolas croquetas en aceite a fogo forte ata que estean ben douradas
  9. Deixámolas escorrer o aceite sobre papel de cociña e servímolas ben quentes.

Notas:

Hai distintos xeitos de facer as bolas das croquetas:

  1. Cunha culler e coa axuda de outra imos collendo anacos de masa para logo coas mans enfariñadas ir facendo bolas alongadas que envolvemos na fariña, ovo e pan relado.
  2. Outra maneira é botar a masa a arrefriar nunha bandexa  ampla e aceitada de xeito que a masa quede estirada e dun groso de 2-3 cm. e tapando a masa co filme transparente para que non colla codia. Logo bótase a masa enriba dunha mesa enfariñada e coa punta dun coitelo córtase a masa ó través cada 2-3 cm. e ó longo cada 5-6 cm.; deste xeito xa quedan as croquetas feitas e só queda rebozalas con fariña e ovo. A diferenza co método anterior é que as croquetas non quedan redondas senón cuadrangulares.
  3. Por último, tamén se poden facer as croquetas metendo a masa, despois de arrefriada, nunha manga pasteleira con unha boquilla duns3 cm. de diámetro e ir facendo unha corda de masa sobre o mesado enfariñado que logo cortaremos á lonxitude desexada. Só queda rebozalas e fritilas.

Tempo: 2 horas

Comensais: varios

Milfollas con champiñóns

Ingredientes:

  • Masa de follado
  • 100 g de champiñóns
  • ¼ de pemento asado (piquillo)
  • 10 g de fígado de pato
  • 2 culleres de nata
  • 1 chisco de pementa negra moída
  • 1 cebola mediana
  • 1 culler de azucre

Descrición:

  1. Cortámo-la masa de follado en anacos de uns 8 x 5 cm. e metémolos ó forno quente a 180ºC ata que estean feitos e dourados. Reservamos.
  2. Limpamos ben os champiñóns e cortámolos en lascas e facémolos a prancha, ou nunha tixola, cun chisco de aceite.  Engadimos o pemento asado cortado en anaquiños para darlle un toque de cor. Salgamos e reservamos
  3. Botámo-la nata maila pementa moída ó gusto nunha tixola, pómola ó lume, deixámolo reducir ata que espese un chisco e mesturámola logo cos champiñóns. Reservamos.
  4. Picámo-la cebola en medias lúas e acaramelámola nunha tixola con aceite e azucre a fogo medio.
  5. Cando xa estea acaramelada, é dicir cando estea branda e teña cor dourada, afastámola do lume e reservámola.
  6. Coa punta dun coitelo facemos un burato duns 4 cm de diámetro, sen chegar ó fondo das milfollas e reservámo-la tapa.
  7. Enchemos este burato coa mestura de champiñóns e nata, pomos un anaco de fígado entre eles e pomos tamén por riba a cebola acaramelada.
  8. Adornamos cravando a tapa nun lado do recheo.

Nota:

  • Esta tapa admite marmelada de froitos vermellos e froitos secos como noces, abelás e améndoas.

Tempo: 20 minutos

Tapas: 4

Caldeirada de año

Ingredientes:

  • 1 ½ Kg de año
  • 2 cebola
  • 2 cenoria
  • 1 porro ( só o branco)
  • 3 dentes de allo
  • ½ vaso de viño branco
  • 4 pementos chouriceiros secos
  • 2 tomates maduros
  • 3 patacas medianas
  • Pementa negra
  • Aceite
  • Sal

Descrición:

  1. Cortámo-lo o año en anacos e botámolo nunha pota ampla con 6 culleres de aceite quente para dourar e sela-la carne.
  2. Engadímo-la cebola, o porro mailos allos picados miúdo, a cenoria cortada en rodiñas, o viño branco e deixamos que coza.
  3. Namentres sacámoslle o miolo ós pementos secos que puxemos a remollo en auga quente 1 hora antes, esmiuzámolo e de seguido botámosllo ó año xunto co tomate picado, pelado e sen pebidas.
  4. Botámoslle auga xusto a cubrir, salgamos, engadimos a pementa moída ó gusto e cociñamos tapado a fogo medio ata que estea feito, remexendo de cando en vez para que non se apegue pero que tampouco se desfaga. Estar ó tanto para que non quede sen caldo.
  5. Pelámo-las patacas, cortámolas en tacos de 2×2 cm. que salgamos e fritimos en abondoso aceite quente.
  6. Cando estean fritidas engadímolas ó año cando estea a piques de rematar o guiso.

Tempo: 1 hora

Comensais: 4

Receita: Montadiño de piquillo, xamón e ovo de paspallás

Ingredientes

  • 4 rebandadas de pan de barra
  • 2 pementos de piquillo asados
  • 4 lascas de xamón ibérico
  • 4 ovos de paspallás
  • Sal
  • Pementa negra
  • Aceite de oliva.

Descrición

  1. Primeiro cortámo-lo pan, torrámolo un pouco, e refregámolo un chisco con allo.
  2. Cortámolos piquillos pola metade ó longo e dámoslles unha volta na tixola con aceite; botámoslles un chisco de sal e outro de azucre ó cociñalos.
  3. Fritímo-los ovos de paspallás. Abrímolos dándolles un golpe seco e forte co fío dun coitelo, primeiro botámolos nunha cunca e logo na tixola cun pouco de aceite de oliva. Botámoslles unha areas de sal e un pouco de pementa negra moída recente
  4. Para montar a tapa pomos o medio pemento enriba do pan torrado, logo a lasca de xamón e enriba deste un ovo de paspallás fritido.

Tempo: 15 minutos

Tapas: 4

Recipe by on.
Microformatting by hRecipe.

Receita: Torrado de trigueiro con ovo escalfado

Ingredientes

  • 6 espárragos trigueiros
  • 6 lonchas de touciño entrefebrado,
  • 6 lonchas de xamón
  • 6 ovos de curral
  • Sal
  • Pementa negra
  • Aceite de oliva

Descrición

  1. Envolvémo-los espárragos na lasca de touciño entrefebrado e fritímolo na tixola cunha pingada de aceite ata que o touciño quede dourado. Reservámolo.
  2. Fritimos tamén o xamón cortando as lascas pola metade ó través e dourámolas un pouco. Reservámolas
  3. Namentres escalfámo-los ovos escachándoos sobre auga fervente cun chorro de vinagre ata que estea feito.
  4. Pómo-los ovos escalfados nunha copa ampla ou nun vaso pequeno, espetado na xema o espárrago envolto en touciño e adornamos co xamón fritido (dúas medias lascas por copa). 5. Sérvense quentes empoados con un chisco de pementa moída recente. 6. Cómense untando o espárrago e o xamón no ovo escalfado.

Notas

  • O vinagre axuda a que o ovo quede recollido. Hai que botalo no medio da pota onde a auga ferve con máis forza.
  • O ovo non ten que quedar moi feito pois se a xema está dura non serve para untar nel.

Tempo: 15 minutos

Tapas: 6

Recipe by on.
Microformatting by hRecipe.