Entries tagged with “noite”.


Gracias quero dar
pola noite e a chuvia
que nos devolven a memoria da nai,
e pola muller
que dá forma á beleza.
Gracias polo sexo
que une nunha soa carne
dúas soidades
e polo soño que nos permite
a viaxe á morte
e o regreso.
Gracias polo vento
que nos fai estraños de nós mesmos
e pola pedra
que aspira a soñar a eternidade.

Gracias quero dar polos nenos
que non coñecen nin a culpa nin a morte,
e pola música,
alma en epifanía trascendida.
Gracias pola luz
que nos devolve o mar nos ollos da amada
e polo aire, vivificante e saudábel.
Gracias pola beleza,
que nos enche e acovarda,
e polo mencer
que nos ofrece a ilusión
da primeira vez.

Gracias
pola xuventude e polos sentidos.
Polo loureiro e o trigo,
polo viño que nos sume
nun transo sen dolor,
pola herba, máis tenaz que o tempo,
e pola arte,
que nos transcende e sobrevive.

Gracias quero dar
polos días que compartes comigo,
pola caricia e polo beixo.

Gracias polo mar, absoluto e poderoso.

Gracias polo silencio e polo verso.

Fonte: BVG

Loitador, non te deteñas!
                                                  Ten cada hora novo alento,
                                                  sigue a luz que te ilumiña,
                                                  mira a cotío pr’o ceo.
                                                       Ôn lado e outro do camiño
                                                  toparás pinchos e rebos,
                                                  e da estulticia e a enveja
                                                  ladraránche os cans famentos.
                                                       Loitador, non te deteñas!
                                                  ¡Levas a verdá no peito,
                                                  e a estrela que te guía
                                                  ten resplandores eternos!

Fonte: BVG

A Odisea de Pere Xil

Presentación

Esta é a historia dun trasno chamado Pere Xil. Como todos os trasnos, era un ser falcatrueiro e burlón, mais na historia deste concretamente hai unha serie de episodios que se fixeron famosos no mundo dos trasnos e dos seres máxicos porque con el aconteceu o que non acontece sequera cos humanos.

(máis…)

Esta noite hei de ir alá
déixame o postigo aberto;
se cho encontro cerrado
o teu amor non é certo.

Esta noite hei de ir ás mozas
esta noite hei de ir a elas;
quen ten fillas que as garde
que eu non vou gardar delas.

Esta noite fun ó muíño
cun fato de mozas novas,
elas todas en camisa
eu no medio coas cirolas.

Esta noite hei de ir alá;

meniña non teñas medo;

coa punta da navalla

hei de abrir o tarabelo.

Esta noite e maila outra
e maila outra pasada,
abalei unha pereira
que nunca foi abalada.