Entries tagged with “manteiga”.


Galletas de manteiga ó meu xeito

 

Ingredientes:

  • 700 g de fariña triga
  • 200 g de manteiga de leite abrandada
  • 200 g de azucre
  • 2 ovos
  • 1 cullerada de sobremesa de canela en po
  • 1 cullerada de esencia vainilla
  • O relado dun limón ou laranxa
  • ½ limón, o zume
  • 16 g (un sobre) de lévedo en po (Royal)
  • 1 chisco de sal
  • 1 xema de ovo batida e un pouco de azucre
  • 200 g de améndoas en gran para decorar.

 

Preparación:

  1. Nunha cunca fonda ou nunha amasadora botámo-la fariña, xunto cos outros ingredientes agás a xema batida e as améndoas e amasamos a man ou coa amasadora ata ter unha masa ben integrada.
  2. Logo diso, pómo-la masa, en forma de rolo, nun filme transparente e enrolámolo ata ter unha especie de chourizo duns 7 cm de diámetros que meteremos na neveira primeiro e logo uns 30 minutos no conxelador antes de comezar a corta-las galletas
  3. Acendémo-lo forno a 180 ºC para que vaia quecendo
  4. Sacámoslle o filme transparente a parte do rolo de masa e cun coitelo imos cortando rebandas de entre 7-10 mm e repartíndoas nunha bandexa das do forno cuberta con papel de enfornar ou engraxada, poden caber entre 15 a 20 galletas, deixando espazo entre elas para que non se apeguen.
  5. Antes de metelas ó forno durante 7-10 minutos, pintámolas coa xema batida mesturada cun chisco de auga e esparexémoslle unhas améndoas en gran por enriba.
  6. Entrementres están no forno preparamos outra bandexa para metela no forno ó sacar a primeira e non perder moito tempo esperando a que arrefríe para empregala de novo.
  7. Hai que vixialas cando estean no forno para sacalas cando empecen a dourar

 

Notas:

  • Podes trocar algo de fariña triga por fariña milla e engadir na masa chocolate, ou froitos secos picados.
  • Tamén lle pode facer un pequeno oco no medio e pór nel un arando, ou un chisco de marmelada
  • Para darlle forma as galletas, tamén podes facer bolas do tamaño dunha noz e chafalas un pouco para aplanalas, deste xeito ó non estaren todas iguais aparentan seren máis artesanais.

 

 

Tempo: 40 minutos                                                               Comensais:  varias persoas

Vitela asada con verduras

 

Ingredientes:

  • 1 peza de “espaldilla” 2 kg.
  • 6 cenorias
  • 1 cabaciño
  • 150 pemento vermello
  • 150 g de pemento verde
  • 200 g de cebola francesa ou “chalotas”
  • 6 patacas medianas
  • Tomiño
  • Pementa negra moída
  • 100 ml de Brandy
  • 100 ml de viño branco
  • 2 culleradas de vinagre branco
  • 300 ml de caldo de ósos
  • Aceite de oliva
  • Sal

Para o adubo

  • Unhas pólas de Perexil
  • 3 dentes de allo

Para o prebe

  • 25 g de queixo azul
  • 20 g de manteiga de leite
  • 250 g de nata de montar
  • Pementa moída

 

Preparación:

  1. En primeiras preparámo-la carne sacándolle cun coitelo moi ben afiado a tea que o cobre por unha das partes.
  2. Preparámo-las verduras e para iso cortámo-las cenorias en rodas, o cabaciño en anacos medianos, os pementos en bastóns, as cebolas en anacos medianos e as patacas pelámolas e cortámolas en cuartos.
  3. Acendémo-lo forno a 200ºC para que vaia quecendo.
  4. Logo diso machucámo-lo perexil xunto co sal e o allo e con iso adubámola carne.
  5. Deseguido, selámola nunha tixola grande cuns 100 ml de aceite de oliva.
  6. Cando a carne estea selada, colocámola na bandexa do forno.
  7. Logo diso, metémo-las verduras na tixola e refogámolas xunto coas patacas.
  8. Botamos agora as verduras xunto coas patacas na bandexa ó redor da carne, empoámolo todo cun chisco de sal e pementa moída; regámolo co brandy, o vinagre, o viño branco máis os 300 ml de caldo de osos e metémo-lo ó forno polo decurso duns 50-60 minutos. Vixiade que non se vos queime se así fora póndelle un papel de aluminio por enriba.
  9. Entrementres asa a vitela, facémo-lo prebe e para iso desfacemos o queixo nunha tixola cuns 20 g de manteiga, logo diso engadímola nata e empoámolo coa pementa moída, ó noso gusto, e deixamos que espese un chico.
  10. O sacala do forno cortámo-la peza en rebandas e servímola coas verduras acompañada co prebe para que cada quen se sirva.

 

Nota:

  • A “espaldilla” e un corte de carne que se atopa na parte alta da pa ou omoplata da res.
  • Un truco para que non seque e meter unha cunca con auga no forno para que deprenda vapor.

 

Tempo: 80 minutos                                                   Comensais: 6 persoas

Goxúa

 

 

Ingredientes:

Para o biscoito:

  • 150 g. de manteiga de leite en pomada
  • 250g. de azucre
  • 4 ovos + as claras da crema pasteleira
  • 250g de fariña triga
  • 1 sobre de lévedo en po

Para a nata montada:

  • 250 ml de nata de montar
  • 1 cullerada colme de azucre moído

Para a crema pasteleira

  • 4 xemas de ovo
  • 4 culleradas colmes de azucre
  • ½ l de leite gordo
  • 1 casca de limón ó gusto
  • 1 culleradiña de esencia de vainilla
  • 50 g de maicena

 

Preparación:

  1. En primeiras farémo-lo biscoito e para iso acendémo-lo forno a 180ºC para que estea quente cando metámo-lo biscoito
  2. Batémo-la manteiga en pomada xunto co azucre empregando as variñas de batedor eléctrico
  3. Cando estea ben mesturado botámo-los ovos mailas claras e seguimos batendo ata que dobren o seu volume e a mestura estea esponxosa.
  4. Mesturamos a fariña co lévedo e botámola peneirada cun coador de arame sobre a amoado mentres o mesturamos cunha culler, unhas variñas de man ou unha espátula, con movementos envolventes, ata que a mestura estea homoxénea.
  5. Botámo-lo amoado nunha bandexa do forno cuberta con papel de enfornar ou engraxada e enfariñada.
  6. Metémolo molde ó forno durante por uns 10-15 minutos; comprobamos cun espeto de madeira ou cun garfo que está cocido.
  7. Sacámolo do forno e logo de que arrefríe desmoldámolo. E reservámolo.
  8. Entrementres esta no forno montámola nata ben fría, se cadra metémola uns 20-30 minutos no conxelador, coas variñas eléctricas e a medio montar engadímoslle o azucre moído. Reservámola.
  9. Para a crema pasteleira pomos a quentar case todo e leite reservando coma ¼ xunto coa esencia de vainilla e a casca de limón sen que chegue a ferver. Entrementres nunha cunca ampla mesturamos, coas variñas de man, as xemas de ovo co azucre; logo diso botámola maicena, mesturamos coas variñas e engadímo-lo leite reservado e mesturamos ben.
  10. Logo diso vertemos, ós poucos o leite quente, sen a casca mentres seguimos mesturándoo coas variñas.
  11. Botamos agora todo na cazarola de quentar o leite e pómolo á lume medio alto, remexendo deseguido, sen que ferva, ata que a crema espese. Sacámola do lume e reservámola.
  12. Agora imos montar esta sobremesa e para iso collemos unhas copas ou tarteiras pequenas e pomos no fondo unhas culleradas de nata por enriba o biscoito cortado en redondo cun aro, cubrímolo  cunhas culleradas de crema pasteleira que empoamos con bastante azucre en gran e torramos cun soprete.
  13. Servímolo frío.

 

 

Nota:

  • O Goxúa é unha sobremesa tipicamente vasca
  • A crema se a mantemos moito tempo no lume vai espesar máis.
  • Se temos biscoito feito podemos empregalo esmigallado.

 

 

Tempo: 80 minutos                                                   Comensais: 6 persoas

Mediaslúas ou “croissants” 2

(Receita sinxela)

 

Ingredientes:

  • 550 g de fariña triga
  • 200 ml de leite
  • 25 g de lévedo de panadería
  • 1 ovo “L”
  • 140 g azucre
  • 1 cullerada de mel
  • 1 culleradiña de sal (uns 5 g)
  • 130 g manteiga de leite
  • 1 cullerada de esencia de vainilla
  • 1 ovo para pintar

 

Preparación:

  1. En primeiras imos a activar o levedo e para iso  botámolo esmigallado nunha cunca xunto  cunha cullerada colme de fariña, outra de azucre, mais 100 ml de leite morno e batémolo coas variñas ata que non teña grumos e deixámolo repousar uns 15 minutos.
  2. Pasado este tempo, pómo-lo resto da fariña, mailo sal mesturado, nunha cunca grande e logo de facer un oco no medio, botamos nel o ovo batido, o resto do azucre, o mel, o lévedo o resto do leite morno e mesturamos un pouco; logo diso engadímo-la manteiga derretida e morna, e mesturámolo.
  3. Logo botámo-la mestura no mesado enfariñado e amasámolo ben polo menos10 minutos.
  4. Deixámola levedar, nunha cunca untada de aceite e tapada cun pano de cociña, nun sitio tépedo por unhas 3 horas.
  5. Acendémo-lo forno a 180º C con calor arriba e abaixo e sen ventilador para que vaia quecendo.
  6. Para facer xa as mediaslúas, estirámo-la masa para poder facer un rectángulo duns 20-30 cm de ancho(isto depende do tamaños das mediaslúas) por 5 mm de groso e logo de recortar cun coitelo os bordos, para deixalo deses 20-30 cm, partímolo primeiro pola metade ó longo  e destas metades facemos triángulos duns 6 a 10 cm de base, dependendo do tamaño.
  7. Enrolámo-los triángulos comezando pola parte ancha (estiramos primeiro un pouco as puntas da base) cara a ó vértice oposto e pómolos nunha bandexa do forno cuberto con papel de enfornar curvándoos un pouco para darlles forma de media lúa. Deixámolas repousar uns 30 minutos antes de metelos ó forno, tapadas cun pano de cociña limpo.
  8. Pintámolas con ovo batido e metémolas no segundo nivel do forno, quente, polo decurso duns 15 minutos ou ata que estean douradas.
  9. Logo de sacalas do forno podes empoalas con azucre moído ou darlles brillo con xelatina.

 

Notas:

  • Se a masa ficase un pouco branda botariámoslle máis fariña e se fora ó revés botariámoslle leite ou auga.
  • Estas mediaslúas non saen coma as compradas, é dicir non saen con follado, teñen a forma pero son coma as bolas de leite.

 

 

Tempo: 40 minutos                                                               Comensais: segundo as pezas que saian

 

Mediaslúas ou “croissants”

 

Ingredientes:

  • 500 g de fariña triga  (½ forza + ½ normal)
  • 225ml de leite
  • 25 g de lévedo de pan fresco ou 9 seco
  • 1 ovo “L”
  • 80 g azucre
  • 1 cullerada de mel
  • 1 culleradiña de sal (uns 5 g)
  • 240 g manteiga de leite
  • 25 g de fariña para o empaste
  • 1 ovo para pintar

 

Preparación:

  1. En primeiras, nunha cunca botámo-lo lévedo esmigallado xunto  cunha cullerada colme de fariña, outra de azucre, mais 100 ml de leite morno e batémolo coas variñas ata deixalo sen grumos e deixámolo repousar uns 15 minutos.
  2. Pasado este tempo, pómo-lo resto da fariña, mailo sal mesturado, nunha cunca grande e logo de facer un oco no medio, botamos nel o ovo batido, o resto do azucre, o mel, o lévedo mailo resto do leite morno e mesturámolo
  3. Logo botámo-la mestura no mesado enfariñado e amasámolo ben polo menos10 minutos.
  4. Deixámola levedar, tapada cun pano de cociña, nun sitio tépedo por unha hora.
  5. Entrementres, mesturamos ben a manteiga cos 25 g de fariña para facer o empaste.
  6. Pasado o tempo estirámola masa ata deixala duns 5 mm de groso por uns 30 cm de ancho e o longo que saia.
  7. Pondo a parte estreita paralela a nós repartímolo empaste no terzo central dela e dobrámo-los laterais a terzos sobre o empaste, estirámola un pouquiño e dobramos un terzo cara nós e o outro  terzo sobre o primeiro.
  8. Metémolo na neveira uns 60 minutos; logo diso, xirámo-la masa 90º de como a tiñamos antes de arrefriala e estirámola facendo un cadrado que dobramos despois a terzos de esquerda a dereita e o rectángulo formado dobrámolo en terzos cara nós. Metémolo de novo a neveira.
  9. Repetimos isto unha 4-5 veces máis.
  10. Acendémo-lo forno a 180º C para que vaia quecendo.
  11. Para facer xa as mediaslúas, estirámo-la masa para poder facer un rectángulo duns 20-30 cm de ancho (isto depende do tamaños das mediaslúas) por 5 mm de groso e logo de recortar cun coitelo os bordos, para deixalo deses 20-30 cm, partímolo primeiro pola metade ó longo  e destas metades facemos triángulos duns 6 a 8 cm de base, dependendo do tamaño.
  12. Enrolámo-los triángulos comezando pola parte ancha (estiramos primeiro un pouco as puntas da base) cara a ó vértice oposto e pómolos nunha bandexa do forno cuberto con papel de enfornar curvándoos un pouco para darlles forma de media lúa.
  13. Pintámolas con ovo batido e metémolas no segundo nivel do forno, quente, polo decurso duns 15 minutos ou ata que estean douradas.
  14. Logo de sacalas do forno podes empoalas con azucre moído ou darlles brillo con xelatina ou marmelada.

 

Notas:

  • Se a masa ficase un pouco branda botariámoslle máis fariña e se fora ó revés botariámoslle leite ou auga.
  • Estas mediaslúas saen coma as compradas é dicir con follado
  • Como o follado leva moito tempo convén telo feito de antes e conservado na neveira.

 

 

Tempo: 40 minutos                                                                Comensais: segundo as pezas que saian

Sen contar os tempos de espera do follado

Biscoito  esponxoso

 

Ingredientes: 

  • 5 ovos
  • 250 g de azucre
  • 250 g de fariña triga
  • 50 ml de auga
  • 25 ml de aceite de oliva ou xirasol
  • 8 g de lévedo químico en po
  • 1 chisco de sal
  • 1 cullerada de esencia de vainilla
  • 1 limón, o relado
  • Manteiga para engraxar

 

Preparación:

  1. Acendémolo forno a 175ºC para que vaia quecendo
  2. Por outra banda engraxamos un molde desmontable de 22 cm e cubrímo-la base con papel antiadherente de enfornar.
  3. Afastámo-las claras das xemas e montámolas a piques de neve cun chisco de sal coa axuda das variñas do batedor eléctrico; cando estean a medio montar engadímoslle 125 g de azucre e seguimos montando ata que estean firmes. Reservámolas.
  4. Nunha cunca botamos as xemas de ovo xunto coa auga, o aceite, o resto do azucre maila esencia de vainilla e batémolas ben coas variñas do batedor eléctrico; logo diso mesturamos a fariña co lévedo, peneirámola cun coador de arame e incorporámola ós poucos ás xemas. Agora botamos ós poucos as claras, nunhas 3 veces, e mesturámolas devagar con movementos envolventes coa axuda dunha espátula para que non escape o aire atrapado nelas.
  5. Logo diso botamos o amoado no molde engraxado e metémolo, centrado en altura, no forno xa quente, polo decurso de 55 minutos. Comprobamos que estea cocido picándoo cun espeto de madeira; se sae limpo xa está cocido.
  6. Sacámolo do forno e desmoldámolo cando aínda estea algo morno.

 

Nota :

  • Esta receita é para un molde de 22 cm. e 55 minutos de forno se fora distinto, o tempo de forno variaría. Máis diámetro menos tempo.
  • As cantidades son por cada ovo, 50 g de fariña, 50 g de azucre e 15 ml de liquido. Os líquidos poden ser auga, zumes, leite, aceite, manteiga ou margarina fundidas, licores, etc. sos ou mesturados pero sempre 15 ml por ovo.
  • Se o biscoito sae abombado é que o forno está moi quente e tés que baixalo. Cada forno é un mundo, tés que facer probas ata conseguir que coza en 55 minutos.
  • Se o fixeches ben e queres que o biscoito quede chairo por arriba dálle a volta sobre o mesado antes de desmoldalo.
  • Podes decoralo empoándoo con azucre moído.

 

Tempo: 30 minutos                                                         Comensais: 48

Alcachofas recheas con champiñóns, paté e ovos de paspallás

 

Ingredientes: 

  • 12 alcachofas frescas
  • 100 g de champiñóns
  • 50 g de cebola tenra
  • 1 dente de allo
  • 30 g de paté
  • 12 ovos de paspallás
  • 20 g de queixo relado
  • 1 grolo de vinagre
  • Perexil
  • Pementa negra moída
  • Aceite de oliva e sal

Para o bechamel:

  • 20 g de fariña
  • 15 g de manteiga
  • 250 ml de leite gordo

Preparación:

  1. Acendémolo forno a 180ºC para que vaia quecendo.
  2. Lavámolas alcachofas, sacámoslle o pé e asámolas no forno  polo decurso unha hora.
  3. Entrementres, picámolos champiñóns en anacos miúdos e refogámolos xunto coa cebola e o allo, picados, nunha tixola con aceite. Cando estean pómolos no seu punto de sal e pementa e reservámolos.
  4. Mentres tamén, facemos o bechamel e para iso desfacémo-la manteiga nunha cazarola; despois, botamos a fariña que cociñamos durante uns 2-3 minutos para sacarlle o gusto a fariña crúa; logo diso, engadímo-lo leite quente e remexemos deseguido coas variñas de man, a fogo medio durante uns 3 minutos, ata que espese. Pómolo no seu punto de sal. Ten que ficar algo lixeira.
  5. Logo de ter asadas as alcachofas, sacámoslle as follas duras, cortámoslle a cabeza case pola metade, baleirámo-lo corazón cunha culleriña e dámoslle un pequeno corte na base para que se teñan en pé.
  6. Reenchémolas cos champiñóns reservados e por enriba pomos algo de paté.
  7. Agora escalfámo-los ovos de paspallás e para iso pomos ó lume forte unha cazarola cun dedo e medio de auga co grolo de vinagre e cando ferva con forza botamos no centro cadanseu ovo cascado e cando a clara este callada por fora afastámolos.
  8. Pómo-los ovos escalfados en cadansúa alcachofa; por último cubrímolas co bechamel e empoámolas co queixo relado.
  9. Metémolas ó forno a grellar durante uns 5 minutos ata que colla algo de cor dourada
  10. Servímolas en pratos chairos decoradas con folliñas de perexil.

 

Nota:

  • Os ovos de paspallás tamén os podes pór fritidos.
  • Os pés das alcachofas pelámolos e gardámolos para outra ocasión

 

 

Tempo: 80 minutos                                                         Comensais: 4

Torta larpeira

 

Ingredientes:

Para a masa:

·      400 g de fariña triga de forza

·      100 ml de leite gordo

·      30 g de lévedo de panadaría

·      60 g de azucre

·      2 ovos tamaño L

·      50 ml de anís

·      60 g de manteiga morna en dados

·      1 culleradiña das de té de sal

·      1 limón, o relado

Para a crema pasteleira:

·      1 ovo

·      125 ml de leite gordo

·      35 g de azucre

·      10 g de maicena

·      1 pau de canela

·      1 casca de limón e outra de laranxa

·      1 culleradiña de vainilla ou 10 g de azucre vainillado

Para o xarope:

·      50 ml de auga

·      50 ml de anís

·      50 g de azucre

Para a decoración:

·      50 g de azucre

·      2 culleradas de auga

 

Preparación:

  • En primeiras desfacémo-lo lévedo no leite morno
  • Logo  facémo-la masa e para iso botamos na cunca do robot de cociña tódolos ingredientes agás a manteiga e amasámolo co trebello amasador por uns 5 minutos; logo diso engadímo-la manteiga, botándoa ós poucos para darlle tempo a que a absorba. Cando estea ben amasada pómo-la masa nunha bandexa das do forno, cuberta con papel de enfornar ou engraxada con manteiga, e estendémola de xeito circular coa man aceitada ata deixala duns 2-3 cm de groso.
  • Tapámola cun pano e deixámola levedar por unhas 1,5-2 horas nun sitio tépedo.
  • Entrementres leveda, facémo-la crema pasteleira e para iso mesturamos o ovo mailo azucre e batémolos ben. Por outra banda, afastamos nunha cunca un terzo do leite e nel desfacémo-la maicena; o resto do leite botámolo nun cazo coa canela, a vainilla mailas cascas de limón e laranxa e pómolo a quentar sen que ferva forte para que colla sabor pero non faga tona.
  • Deixamos arrefriar un pouco o leite, sacámoslle as cascas mailo pau de canela e botámolo sobre a mestura de azucre e ovo, mentres remexemos para que non calle o ovo; logo diso botámoslle a maicena co leite e pómolo de novo ó lume remexéndoo de seguido para que non se apegue nin faga grumos. Cando comece a espesar apagámo-lo lume e seguimos batendo un rato pois adoita apegarse se non remexemos. Pasamos a crema a unha cunca e logo de tapala cun filme transparente metémola na neveira a arrefriar ata que teñamos que empregala.
  • Acendémo-lo forno a 180ºC para que vaia quecendo
  • Pasado o tempo de levedado, imos decorar a torta e para iso  pintámo-la masa con ovo batido e cun coitelo ben afiado, facemos na masa uns cortes, duns 2 cm de fondo, ó longo e ó través formando cadrados. Enchemos estes cortes coa crema pasteleira coa axuda dunha manga pasteleira e logo de mesturar o azucre coa auga repartímola por enriba dos cadrados.
  • Metémo-la torta a cocer polo decurso duns 25-35 minutos. Comprobamos cun espeto que estea cocida, se sae limpo é que o está.
  • Entrementres coce, preparámo-lo xarope: mesturamos tódolos ingredientes nun cazo e pómolo ó lume durante uns minutos ata que espese un pouco.
  • Logo de sacala e aínda morna mollámola co xarope preparado
  •  Servímola fría

Notas:

  • Con robot vas tardar uns 8-10 minutos en face-la-la masa pero se o fas a man tés que votar tódolos ingredientes xuntos e tardarías uns 15 minutos.
  • Os cataláns fan a “Coca de San Xoán” que é coma a esta pero decorada con piñóns e guindas

 

 

Tempo: 1 hora                                                                      Comensais: 6-8 persoas

Sen contar o tempo de levedar

Ameixas ó viño branco

 

Ingredientes:

  • 1 kg de ameixas
  • 1 cebola nova (300g)
  • 1 dente de allo
  • 125 ml de viño branco galego
  • 20 g de manteiga deperexil. tomiño pementa leite
  • Perexil
  • Tomiño
  • Pementa, aceite de oliva e sal

 

Preparación:

  1. Nunha tarteira cun fondo de aceite refogamos, sen que doure, a cebola picada miúda xunto co dente de allo tamén miudiño; logo diso botámoslle as especias: tomiño, perexil picado e pementa.
  2. Neste intre engadímo-las ameixas mailo viño branco e deixamos que coza tapado ata que as ameixas abran.
  3. Logo de abriren, coámolo caldo que botamos nunha tixola xunto coa manteiga, unha cullerada de fariña desfeita en caldo frío e deixámolas coceren ata que espese o prebe.
  4. Servímo-las ameixas neste prebe empoadas con perexil fresco picado

 

 

Tempo: 15 minutos                                                               Comensais: 4

 

Torta de mazá e crema de améndoas

 

Ingredientes:

Para a base:

  • 340g de fariña triga
  • 170g de manteiga sen sal
  • 170g de azucre
  • 4 ovos, as claras
  • 1-2 culleradas de auga fría
  • 1 chisco de sal

Para o crema de améndoas:

  • 250g améndoas moídas
  • 200g de manteiga sen sal
  • 150 g de azucre
  • 60 g de fariña triga
  • 4 ovos, as xemas
  • 2 culleradas de nata de montar

Para o recheo de mazá:

  • 4 mazás
  • 20g de manteiga
  • 3 culleradas de azucre
  • 4 mazás máis

Preparación:

  1. En primeiras acendémolo forno a 200ºC para que vaia quecendo.
  2. Facémo-la base mesturando nunha cunca a fariña coa manteiga fría cortada en liscos pequenos, o azucre, mailas claras e o sal; mesturámolo todo esmagándoo entre as palmas das mans ata ter unha masa homoxénea pero non moi traballada engadíndolle a auga  entrementres a amasamos.
  3. Pisamos a masa ata deixala duns 2-3 cm de groso, deste xeito arrefría mellor, envolvémola en filme transparente e deixámola na neveira arrefriando coma uns 30-40 minutos.
  4. Entrementres arrefría, facémo-la crema de eméndoas e para iso mesturamos nunha cunca, coa axuda das variñas de man, tódolos ingredientes da mesma e reservámola.
  5. Entrementres tamén, facémo-lo recheo de mazá: pelámo-las mazás, sacámoslles as pebidas e nunha cazarola facemos unha compota xunto co azucre e a manteiga. Reservámola
  6. Pelámolas outras 4 sacámoslles as pebidas e cortámolas en medias lúas. Reservámolas.
  7. Montámola torta e para iso sacámola masa da neveira, partímola cun coitelo en dúas partes deixando unha delas un pouco máis grande que a outra e estriámolas co rolete ata deixalas delgadiñas, duns 2 mm de groso.
  8. Cubrimos coa parte máis grande o fondo mailas paredes dun molde redondo, desmontable, engraxado e enfariñado; recortamos o sobrante. Dentro do molde botamos a crema de améndoas ben repartida,; logo repartimos a compota ó redor facendo unha coroa e arrombámolas lúas de mazá cubrindo toda a torta de xeito radial. Tapamos todo coa outra masa que tiñamos estirada e recortamos o que sobra polo redor.
  9. Por último, metémola ó forno polo decurso duns 40 minutos ata que doure.
  10. Logo diso quitámola do forno e cando amorne sacámola do molde e empoámola con azucre moído.

Nota:

  • Se tés ocasión e dispós de nata caseira, obtida de ferver ó leite, podes empregala; é moito máis sabedeira que a nata industrial.

 

 

Tempo: 90 minutos                                                  Comensais: 6 ou máis