Entries tagged with “limón”.


Galletas de manteiga ó meu xeito

 

Ingredientes:

  • 700 g de fariña triga
  • 200 g de manteiga de leite abrandada
  • 200 g de azucre
  • 2 ovos
  • 1 cullerada de sobremesa de canela en po
  • 1 cullerada de esencia vainilla
  • O relado dun limón ou laranxa
  • ½ limón, o zume
  • 16 g (un sobre) de lévedo en po (Royal)
  • 1 chisco de sal
  • 1 xema de ovo batida e un pouco de azucre
  • 200 g de améndoas en gran para decorar.

 

Preparación:

  1. Nunha cunca fonda ou nunha amasadora botámo-la fariña, xunto cos outros ingredientes agás a xema batida e as améndoas e amasamos a man ou coa amasadora ata ter unha masa ben integrada.
  2. Logo diso, pómo-la masa, en forma de rolo, nun filme transparente e enrolámolo ata ter unha especie de chourizo duns 7 cm de diámetros que meteremos na neveira primeiro e logo uns 30 minutos no conxelador antes de comezar a corta-las galletas
  3. Acendémo-lo forno a 180 ºC para que vaia quecendo
  4. Sacámoslle o filme transparente a parte do rolo de masa e cun coitelo imos cortando rebandas de entre 7-10 mm e repartíndoas nunha bandexa das do forno cuberta con papel de enfornar ou engraxada, poden caber entre 15 a 20 galletas, deixando espazo entre elas para que non se apeguen.
  5. Antes de metelas ó forno durante 7-10 minutos, pintámolas coa xema batida mesturada cun chisco de auga e esparexémoslle unhas améndoas en gran por enriba.
  6. Entrementres están no forno preparamos outra bandexa para metela no forno ó sacar a primeira e non perder moito tempo esperando a que arrefríe para empregala de novo.
  7. Hai que vixialas cando estean no forno para sacalas cando empecen a dourar

 

Notas:

  • Podes trocar algo de fariña triga por fariña milla e engadir na masa chocolate, ou froitos secos picados.
  • Tamén lle pode facer un pequeno oco no medio e pór nel un arando, ou un chisco de marmelada
  • Para darlle forma as galletas, tamén podes facer bolas do tamaño dunha noz e chafalas un pouco para aplanalas, deste xeito ó non estaren todas iguais aparentan seren máis artesanais.

 

 

Tempo: 40 minutos                                                               Comensais:  varias persoas

Marmelada de cabaza e laranxa

 

Ingredientes:

  • 1 kg de cabaza limpa
  • 500 g de laranxa limpa
  • 600 g de azucre
  • 1 limón (o zume)
  • A casca das laranxas
  • 1 vaíña de vainilla
  • 1 cravo de olor

 

Descrición:

  1. Sacámoslle a casca mailas pebidas á cabaza e cortámola en anacos pequenos.
  2. Lavamos y pelámo-las laranxas cun pelador para obter a pel o máis delgadiña posible, sen a parte branca, logo desbotamos a parte branca, abrímolas en cuarteiróns e picámo-las, sacándollas pebidas, se as tiveran.
  3. Cortámo-las cascas en tiras finiñas e cocémolas en 3 augas diferentes polo decurso de 5 minutos cada vez. Deste xeito sacámoslles o amargor que tiveran. Reservámolas para engadírmolas cando a marmelada estea feita.
  4. Botamos a polpa das laranxas nunha cazarola xunto coa vainilla mailo cravo de olor e por enriba delas o azucre, as cascas se prefires que lle dean amargor, mailo zume de limón e deixámolo, tapado co testo ou con filme transparente, repousando na neveira ou nun sitio fresco durante unhas   Logo diso decataraste que na cazarola hai moito zume, soltárono a cabaza mailas laranxas pola acción do azucre.
  5. Pasado o tempo de repouso, pómolo a cocer polo decurso de aproximadamente de 1 hora, ata que estea no seu punto. Cara ó final teremos que deixalo a lume maino e remexer case de seguido para que non salpique nin se apegue. Non esquezas retira-lo cravo de olor
  6. A marmelada está no seu punto cando botando marmelada nun prato, esta non esbarre e o pasar a culler pola marmelada do prato facendo un suco, este non baixe, entón é cando a afastamos do fogo e a deixamos que arrefríe un chisco.
  7. Aínda quente, metémola en tarros de cristal e as súas tapas, ben esterilizados en auga fervendo e logo tapámolos coas tapas algo quentes para que cerren mellor.

 

Notas:

  • Se as laranxas son de tenda hai que fregalas ben con auga quente e un estropallo, pois as veces réganas con cera para darlles lustre.
  • Para conservar a marmelada podemos metela en tarros de cristal coa súa correspondente tapa e conxelalos ou metelos ó baño maría polo decurso de polo menos 40 minutos, se o facemos en cazarola con testo normal, ou 10 minutos en ola rápida, co marcador ó máximo, deixando logo arrefriar, en ámbolos dous casos, enriba do lume apagado.
  • Se che gusta a marmelada algo amarga non cozas as peles aparte ou cóceas menos veces.
  • Podes botar esencia líquida de vainilla

 

Tempo: 60 minutos sen contar o repousado e o esterilizado

Torta larpeira

 

Ingredientes:

Para a masa:

·      400 g de fariña triga de forza

·      100 ml de leite gordo

·      30 g de lévedo de panadaría

·      60 g de azucre

·      2 ovos tamaño L

·      50 ml de anís

·      60 g de manteiga morna en dados

·      1 culleradiña das de té de sal

·      1 limón, o relado

Para a crema pasteleira:

·      1 ovo

·      125 ml de leite gordo

·      35 g de azucre

·      10 g de maicena

·      1 pau de canela

·      1 casca de limón e outra de laranxa

·      1 culleradiña de vainilla ou 10 g de azucre vainillado

Para o xarope:

·      50 ml de auga

·      50 ml de anís

·      50 g de azucre

Para a decoración:

·      50 g de azucre

·      2 culleradas de auga

 

Preparación:

  • En primeiras desfacémo-lo lévedo no leite morno
  • Logo  facémo-la masa e para iso botamos na cunca do robot de cociña tódolos ingredientes agás a manteiga e amasámolo co trebello amasador por uns 5 minutos; logo diso engadímo-la manteiga, botándoa ós poucos para darlle tempo a que a absorba. Cando estea ben amasada pómo-la masa nunha bandexa das do forno, cuberta con papel de enfornar ou engraxada con manteiga, e estendémola de xeito circular coa man aceitada ata deixala duns 2-3 cm de groso.
  • Tapámola cun pano e deixámola levedar por unhas 1,5-2 horas nun sitio tépedo.
  • Entrementres leveda, facémo-la crema pasteleira e para iso mesturamos o ovo mailo azucre e batémolos ben. Por outra banda, afastamos nunha cunca un terzo do leite e nel desfacémo-la maicena; o resto do leite botámolo nun cazo coa canela, a vainilla mailas cascas de limón e laranxa e pómolo a quentar sen que ferva forte para que colla sabor pero non faga tona.
  • Deixamos arrefriar un pouco o leite, sacámoslle as cascas mailo pau de canela e botámolo sobre a mestura de azucre e ovo, mentres remexemos para que non calle o ovo; logo diso botámoslle a maicena co leite e pómolo de novo ó lume remexéndoo de seguido para que non se apegue nin faga grumos. Cando comece a espesar apagámo-lo lume e seguimos batendo un rato pois adoita apegarse se non remexemos. Pasamos a crema a unha cunca e logo de tapala cun filme transparente metémola na neveira a arrefriar ata que teñamos que empregala.
  • Acendémo-lo forno a 180ºC para que vaia quecendo
  • Pasado o tempo de levedado, imos decorar a torta e para iso  pintámo-la masa con ovo batido e cun coitelo ben afiado, facemos na masa uns cortes, duns 2 cm de fondo, ó longo e ó través formando cadrados. Enchemos estes cortes coa crema pasteleira coa axuda dunha manga pasteleira e logo de mesturar o azucre coa auga repartímola por enriba dos cadrados.
  • Metémo-la torta a cocer polo decurso duns 25-35 minutos. Comprobamos cun espeto que estea cocida, se sae limpo é que o está.
  • Entrementres coce, preparámo-lo xarope: mesturamos tódolos ingredientes nun cazo e pómolo ó lume durante uns minutos ata que espese un pouco.
  • Logo de sacala e aínda morna mollámola co xarope preparado
  •  Servímola fría

Notas:

  • Con robot vas tardar uns 8-10 minutos en face-la-la masa pero se o fas a man tés que votar tódolos ingredientes xuntos e tardarías uns 15 minutos.
  • Os cataláns fan a “Coca de San Xoán” que é coma a esta pero decorada con piñóns e guindas

 

 

Tempo: 1 hora                                                                      Comensais: 6-8 persoas

Sen contar o tempo de levedar

Marmelada de cabaza amarela e laranxa

 

Ingredientes:

  • 1 kg de cabaza limpa
  • 500 g de laranxa limpa
  • 600 g de azucre
  • 1 limón (o zume)
  • A casca das laranxas
  • 1 vaíña de vainilla
  • 1 cravo de olor

 

Descrición:

  1. Sacámoslle a casca mailas pebidas a cabaza e cortámola en anacos pequenos.
  2. Lavamos y pelámo-las laranxas cun pelador para obter a pel o máis delgadiña posible, sen a parte branca, logo desbotamos a parte branca, abrímolas en cuarteiróns e picámo-las sacándollas pebidas, se as tiveran.
  3. Cortámo-las cascas en tiras finiñas e cocémolas en 3 augas diferentes polo decurso de 5 minutos cada vez. Deste xeito sacámoslles o amargor que tiveran. Reservámolas para engadírmolas cando a marmelada estea feita.
  4. Botamos a polpa das laranxas nunha cazarola xunto coa vainilla mailo cravo de olor e por enriba delas o azucre as cascas, se prefires que lle dean amargor, mailo zume de limón e deixámolo, tapado co testo ou con filme transparente, repousando na neveira ou nun sitio fresco durante unhas 8 horas. Logo diso decataraste que na cazarola hai moito zume, que o soltaron a cabaza mailas laranxas pola acción do azucre.
  5. Pasado o tempo de repouso, pómolo a cocer polo decurso de aproximadamente de 1 hora, ata que estea no seu punto. Cara ó final teremos que deixalo a lume maino e remexer case de seguido para que non salpique nin se apegue. Non esquezas retira-lo cravo de olor
  6. A marmelada está no seu punto cando botando marmelada nun prato, esta non esbarre e o pasar a culler pola marmelada do prato facendo un suco, este non baixe, entón é cando a afastamos do fogo e a deixamos que arrefríe un chisco.
  7. Aínda quente, metémola en tarros de cristal ben esterilizados xunto coas tapas en auga fervendo e logo tapámolos coas tapas algo quentes para que cerren mellor.

 

Notas:

  • Se as laranxas son de tenda hai que fregalas ben con auga quente e un estropallo, pois as veces réganas con cera para darlles lustre.
  • Para conservar a marmelada podemos metela en tarros de cristal coa súa correspondente tapa e conxelalos ou metelos ó baño maría polo decurso de polo menos 40 minutos, se o facemos en cazarola con testo normal, ou 10 minutos en ola rápida, co marcador ó máximo, deixando logo arrefriar, en ámbolos dous casos, enriba do lume apagado.
  • Se che gusta a marmelada algo amarga non cozas as peles aparte ou cóceas menos veces.

 

Tempo: 60 minutos sen contar o repousado e o esterilizado

Marmelada de laranxa

 

Ingredientes:

  • 1 Kg. de laranxas grandes
  • 800 gr. de azucre
  • 1 limón (o zume)

 

Descrición:

  1. Lavamos y pelámo-las laranxas, sacándolles a pel o máis delgadiña posible, sen a parte branca, que lla sacamos cun coitelo e desbotámola, abrímolas en cuarteiróns e picámo-los sacándollas pebidas, se as tiveran.
  2. Cortámo-la pel en tiras finiñas e engadímosllelas á polpa.
  3. Botamos todo nunha cazarola, pómola ó lume e deixamos que coza polo decurso de 40 minutos a fogo maino, remexendo de cando en vez..
  4. Logo disto engadímo-lo azucre mailo zume de limón e cocemos outros 10 minutos ou máis ata que estea no seu punto, remexendo case de seguido para que non salpique nin se apegue.
  5. A marmelada está no seu punto cando botando marmelada nun prato esta non esbarre e o pasar a culler pola marmelada do prato facendo un suco, este non baixe, entón é cando a afastamos do fogo.

 

Notas:

  • Para pela-las laranxas o mellor é empregar un pelador.
  • Para conservar a marmelada podemos metela en tarros de cristal coa súa correspondente tapa e logo metelos ó baño maría nunha cazarola tapada polo decurso de 40 minutos, ou nunha ola rápida subindo o marcador ó máximo e deixándoa, logo de 10 minutos, arrefriar enriba do lume apagado.
  • Tamén podes metela, aínda quente, en tarros de cristal esterilizalos xunto coas tapas en auga fervente. Logo poslle as tapas ben apertadas e deixalos que arrefríen.
  • Se che gusta a marmelada menos amarga, coce as peles en 3 augas diferentes polo decurso de 5 minutos cada vez, para sacarlle o amargor.
  • Para saber se os tarros fican ben cerrados, olla as tapas, se estas afunden están ben.
  • A cantidade de azucre ven sendo quilo de azucre por quilo de laranxa limpa, pero se ti non es de lambonadas podes botarlle algo menos, pero ten en conta que o azucre é en si mesmo un conservante e canto máis teña mellor.

 

Tempo: 60 minutos máis o tempo de esterilización.

Crema de limón

 

Ingredientes:

  • 225 g de manteiga de leite
  • 200 g de azucre
  • 4 ovos
  • 250 ml de zume coado de limón
  • 10 g de maicena (1 culleradiña)
  • O relado de 2 limóns

 

Preparación:

  1. Mesturamos nun cazo o azucre xunto coa manteiga que quentamos para que funda
  2. Por outra banda mesturamos nunha cunca os ovos, a zume de limón, o relado maila maicena; batémolo ben e botámolo no cazo,
  3. Pomos o cazo no lume medio e sen que ferva remexemos ben coas variñas de man ata que calle; isto pode levar preto de 8 minutos. Coámola cun coador de arame e deixámola na neveira un par de horas dentro dunha cunca cun filme transparente pegado a crema para que ó arrefriar non faga codia.

 

Nota:

  • Non ten que chegar a ferver; hai quen na fai ó baño maría pero si podes controlar ben o lume podes facelo á fogo directo.
  • Podes gardala na neveira ata un par de semanas.
  • Esta receita pode valer tanto como recheo de tortas e pasteis, ou coma unha saborosa crema que se pode tomar soa. 

 

Tempo: 25 minutos                                                  Comensais: 4

Torta de requeixo

Ingredientes:

  • 500 g de requeixo
  • 4 ovos
  • ½ limón (a relado da casca)
  • 2 culleradas de brandy
  • 1 sobre de fermento en po
  • 200 g de azucre
  • 1 iogur natural ou sabor limón
  • 300 g de fariña
  • 250 ml de leite enteiro
  • Marmelada de amorodos

Descrición:

  1. Nunha cunca fonda batémo-los ovos mailo azucre co batedor de variñas ou co batedor eléctrico ata que dobre o seu volume.
  2. Despois disto imos engadindo (sen BATER só remexendo) sobre mestura anterior o leite, a fariña coada e mesturada co fermento, o relado de limón, o requeixo mailo iogur desfeitos co batedor e o brandy. Agardamos sempre a que se mesture o ingrediente anterior antes de botar o seguinte.
  3. Engraxamos e enfariñamos un molde redondo desmontable e botamos nel a mestura que fixemos na cunca.
  4. Metémolo todo ó forno quente a 190ºC polo decurso de 30 minutos, tapando o  molde con papel de aluminio para que non se nos torre por riba a torta, tirándollo cando leve uns 20 minutos cocendo.
  5. Antes de sacala do forno probamos se está feita espetando un garfo, se sae limpo a torta está pronta para sacala.
  6. Deixamos que arrefríe ben antes de sacala do molde.
  7. Pómola na bandexa de presentación e cubrímola con marmelada de amorodos ou de outras froitas vermellas (amoras, framboesas, arandos, etc.)

Tempo: 45 minutos

Comensais: 8

Roscón con iogur sabor limón


Ingredientes

  • 5 Ovos
  • 1 Iogur de limón
  • ½ limón (o relado)
  • 3 vasos  de fariña (vasos do iogur)
  • 3 vasos de azucre  (vasos do iogur)
  • 1 vasos de aceite (vasos do iogur)
  • 1 sobre de fermento en po

Descrición:

  1. Primeiro afastámo-las claras das xemas.
  2. Batémo-las claras a punto de neve, xunto co  azucre, nun recipiente cun batedor de variñas ou eléctrico. Para sabermos se as claras están a punto de neve dámoslle a volta ao recipiente e se non caen están ben e senón hai que seguir batendo ata logralo
  3. Noutro recipiente batémo-las xemas ben batidas.
  4. Logo disto engadímo-las claras batidas,as xemas, o iogur, o azucre mailo fermento e a fariña peneirados cun coador de arame e o aceite, mesturándoo todo devagar con movementos envolventes da arriba a abaixo.
  5. Botámo-la mestura nun molde de roscón (redondo con burato no medio) engraxado e enfariñado para que non se apegue
  6. Metémolo no forno, xa aquecido, a 170º C durante unha hora e media. Ó pasar ese tempo picámolo cun escarvadentes ou unha agulla da calceta se saen limpos xa está, mais se non, deixámolo no forno un cuarto de hora máis.

Tempo: 2 horas

Comensais: Varios

Bacallau fresco con patacas panadeiras

Ingredientes:

  • 1 bacallau enteiro fresco duns 1000 g
  • 4 patacas
  • 2 cebolas
  • 4 dentes de allo
  • 1 limón  (o zume)
  • ½ vaso de viño branco
  • 1 ducia de espárragos trigueiros
  • 3 pólas de perexil
  • Aceite de oliva
  • Sal

Descrición:

  1. Limpámo-lo bacallau e abrímolo pola metade sacándolle a espiña maila cabeza.
  2. Pelámolas patacas, lavámolas e cortámolas en rodas delgadas (3-4 mm.) Salgamos
  3. Fritímolas nunha tixola con abondoso aceite; segundo as vaiamos fritindo ímolas repartindo polo fondo dunha bandexa de forno.
  4. Pomos a amolecer nunha tixola con aceite a cebola mailos 2 dentes de allo cortados en xuliana. Salgamos. Cando estea mol mesturamos co perexil picado e engadímolo todo por riba das patacas.
  5. Engadimos logo o viño branco e metémolo dentro do forno quente a 180ºC uns 10 minutos.
  6. Pasado o tempo pomos por riba o bacallau aberto coa carne cara arriba, botámoslle unhas pingadas de aceite, salgamos e metémolo ó forno 10-15 minutos máis.
  7. Escollémo-la parte tenra dos espárragos e para iso turramos á vez que dobrámo-lo espárrago preto do pé e dende onde rompe ata a cabeza é a parte que aproveitamos.
  8. Picámo-los espárragos en anacos máis pequenos e salteámolos nunha tixola con aceite. Reservamos.
  9. Noutra tixola con 5 culleres de aceite douramos lixeiramente 2 dentes de allo cortados en láminas e cando estean dourados afastamos a tixola do lume e engadimos o zume de limón que remexemos e botámolo por riba do bacallau.
  10. Servímolo en prato grande pondo por un lado as patacas panadeiras, por outro lado un anaco de bacallau e adornamos cos espárragos salteados para darlle unha  pouca cor ó prato.

Tempo: 45 minutos

Comensais: 4

Alcachofas con ameixas

Ingredientes:

* 12 alcachofas

* 400 g de ameixas

* 1 cebola

* 1 dente de allo

* 2 limóns

* 1 culleriña de fécula de millo (“Maizena”)

* ¼ vaso de viña branco

* ½ vaso de caldo de peixe

* Aceite de oliva

* Sal

* Pementa negra

* Perexil

Descrición:

  1. Limpámo-las ameixas; se non veñen da depuradora, pólas con auga e abondosa sal (25-30 g/litro) media hora nun sitio fresco para que solten a area.
  2. Namentres, limpámo-las alcachofas sacándolles a follas de fora e cortámoslles tamén a puntas das follas ata que so quede o corazón tenro. Untámolas con limón para que non ennegrezan.
  3. Cortámo-las alcachofas en 8 partes ó longo e reservamos.
  4. Picamos moi miudiño a cebola mailo allo e amolecémolos nunha tixola ampla cuns 50 ml. de aceite.
  5. Logo disto, engadimos as alcachofas e o zume de ½ limón e deixamos que se fagan durante uns 5 minutos.
  6. Escorremos as ameixas e pómolas a unha tixola xunto co viño branco; tapámola cun testo e deixamos cocer ata que abran as ameixas.
  7. Nunha cunca botamos a culleriña de fécula mailo caldo de peixe e mesturámolos ben sen que se fagan grumos. Engadímolo a tixola.
  8. Por último botamos as ameixas xunto co caldo que soltaron  e logo de darlles unha fervedura, servímolas quentes esparexendo perexil moi picado por riba

Tempo: 30 minutos

Comensais: 4