Entries tagged with “leite”.
Did you find what you wanted?
Lun 13 Xul 2020
Mediaslúas ou “croissants” 2
(Receita sinxela)
Ingredientes:
- 550 g de fariña triga
- 200 ml de leite
- 25 g de lévedo de panadería
- 1 ovo “L”
- 140 g azucre
- 1 cullerada de mel
- 1 culleradiña de sal (uns 5 g)
- 130 g manteiga de leite
- 1 cullerada de esencia de vainilla
- 1 ovo para pintar
Preparación:
- En primeiras imos a activar o levedo e para iso botámolo esmigallado nunha cunca xunto cunha cullerada colme de fariña, outra de azucre, mais 100 ml de leite morno e batémolo coas variñas ata que non teña grumos e deixámolo repousar uns 15 minutos.
- Pasado este tempo, pómo-lo resto da fariña, mailo sal mesturado, nunha cunca grande e logo de facer un oco no medio, botamos nel o ovo batido, o resto do azucre, o mel, o lévedo o resto do leite morno e mesturamos un pouco; logo diso engadímo-la manteiga derretida e morna, e mesturámolo.
- Logo botámo-la mestura no mesado enfariñado e amasámolo ben polo menos10 minutos.
- Deixámola levedar, nunha cunca untada de aceite e tapada cun pano de cociña, nun sitio tépedo por unhas 3 horas.
- Acendémo-lo forno a 180º C con calor arriba e abaixo e sen ventilador para que vaia quecendo.
- Para facer xa as mediaslúas, estirámo-la masa para poder facer un rectángulo duns 20-30 cm de ancho(isto depende do tamaños das mediaslúas) por 5 mm de groso e logo de recortar cun coitelo os bordos, para deixalo deses 20-30 cm, partímolo primeiro pola metade ó longo e destas metades facemos triángulos duns 6 a 10 cm de base, dependendo do tamaño.
- Enrolámo-los triángulos comezando pola parte ancha (estiramos primeiro un pouco as puntas da base) cara a ó vértice oposto e pómolos nunha bandexa do forno cuberto con papel de enfornar curvándoos un pouco para darlles forma de media lúa. Deixámolas repousar uns 30 minutos antes de metelos ó forno, tapadas cun pano de cociña limpo.
- Pintámolas con ovo batido e metémolas no segundo nivel do forno, quente, polo decurso duns 15 minutos ou ata que estean douradas.
- Logo de sacalas do forno podes empoalas con azucre moído ou darlles brillo con xelatina.
Notas:
- Se a masa ficase un pouco branda botariámoslle máis fariña e se fora ó revés botariámoslle leite ou auga.
- Estas mediaslúas non saen coma as compradas, é dicir non saen con follado, teñen a forma pero son coma as bolas de leite.
Tempo: 40 minutos Comensais: segundo as pezas que saian
Lun 13 Xul 2020
Mediaslúas ou “croissants”
Ingredientes:
- 500 g de fariña triga (½ forza + ½ normal)
- 225ml de leite
- 25 g de lévedo de pan fresco ou 9 seco
- 1 ovo “L”
- 80 g azucre
- 1 cullerada de mel
- 1 culleradiña de sal (uns 5 g)
- 240 g manteiga de leite
- 25 g de fariña para o empaste
- 1 ovo para pintar
Preparación:
- En primeiras, nunha cunca botámo-lo lévedo esmigallado xunto cunha cullerada colme de fariña, outra de azucre, mais 100 ml de leite morno e batémolo coas variñas ata deixalo sen grumos e deixámolo repousar uns 15 minutos.
- Pasado este tempo, pómo-lo resto da fariña, mailo sal mesturado, nunha cunca grande e logo de facer un oco no medio, botamos nel o ovo batido, o resto do azucre, o mel, o lévedo mailo resto do leite morno e mesturámolo
- Logo botámo-la mestura no mesado enfariñado e amasámolo ben polo menos10 minutos.
- Deixámola levedar, tapada cun pano de cociña, nun sitio tépedo por unha hora.
- Entrementres, mesturamos ben a manteiga cos 25 g de fariña para facer o empaste.
- Pasado o tempo estirámola masa ata deixala duns 5 mm de groso por uns 30 cm de ancho e o longo que saia.
- Pondo a parte estreita paralela a nós repartímolo empaste no terzo central dela e dobrámo-los laterais a terzos sobre o empaste, estirámola un pouquiño e dobramos un terzo cara nós e o outro terzo sobre o primeiro.
- Metémolo na neveira uns 60 minutos; logo diso, xirámo-la masa 90º de como a tiñamos antes de arrefriala e estirámola facendo un cadrado que dobramos despois a terzos de esquerda a dereita e o rectángulo formado dobrámolo en terzos cara nós. Metémolo de novo a neveira.
- Repetimos isto unha 4-5 veces máis.
- Acendémo-lo forno a 180º C para que vaia quecendo.
- Para facer xa as mediaslúas, estirámo-la masa para poder facer un rectángulo duns 20-30 cm de ancho (isto depende do tamaños das mediaslúas) por 5 mm de groso e logo de recortar cun coitelo os bordos, para deixalo deses 20-30 cm, partímolo primeiro pola metade ó longo e destas metades facemos triángulos duns 6 a 8 cm de base, dependendo do tamaño.
- Enrolámo-los triángulos comezando pola parte ancha (estiramos primeiro un pouco as puntas da base) cara a ó vértice oposto e pómolos nunha bandexa do forno cuberto con papel de enfornar curvándoos un pouco para darlles forma de media lúa.
- Pintámolas con ovo batido e metémolas no segundo nivel do forno, quente, polo decurso duns 15 minutos ou ata que estean douradas.
- Logo de sacalas do forno podes empoalas con azucre moído ou darlles brillo con xelatina ou marmelada.
Notas:
- Se a masa ficase un pouco branda botariámoslle máis fariña e se fora ó revés botariámoslle leite ou auga.
- Estas mediaslúas saen coma as compradas é dicir con follado
- Como o follado leva moito tempo convén telo feito de antes e conservado na neveira.
Tempo: 40 minutos Comensais: segundo as pezas que saian
Sen contar os tempos de espera do follado
Dom 24 Mai 2020
Bacallau con brandada e pementos asados
Ingredientes:
- 400 g de bacallau salgado (lombo)
- 1 pemento vermello de asar (300g)
Para a brandada:
- 200 g de bacallau salgado (lombo)
- 2 dentes de allo
- Leite gordo
- Nata de montar
- Aceite de oliva
- Perexil picado
- Unhas poliñas de perexil
- Sal
Preparación:
- En primeiras pomos de mollo o bacallau polo decurso de 36 horas dentro da neveira. Durante ese tempo faremos 4 cambios de auga; as dúas primeiras cada 8 horas e as outra cada 10. Pasado o tempo escoámo-lo bacallau, secámolo ben con panos de cociña, sacámoslle as arganas e escamámolo.
- Acendémo-lo forno a 200ºC e asamos nel, por uns 20 minutos, (10 por cada lado) o pemento vermello, untado cun chisco de aceite e sal. logo diso quitámolo do forno e tapámolo cun pano de cociña, ou papel de aluminio, para que súe; logo duns 20 minutos, pelámolo, cortámolo en tiras e facémolo un pouco nunha tixola con aceite, allo, sal e a mesma cantidade de azucre. Reservámolo
- Facémo-la brandada e para iso cocémo-lo bacallau a fogo maino cuberto con leite durante uns 8 minutos; logo diso sacámoslle a pel mailas arganas, se ficara algunha, e esmiuzámolo.
- Nunha cazarola pomos a quentar unhas 3 culleradas de aceite, engadímoslle o allo picado e cando comece a dourar engadímo-lo bacallau esmiuzado e ímolo remexendo e desfacéndoo máis cun garfo ó mesmo tempo que lle engadimos, ós poucos, nata e aceite a partes iguais ata deixar unha mestura cremosa coma un puré algo lixeiro. Engadímoslle tamén perexil picado para darlle un chisco de cor á brandada.
- No mesmo leite pomos o outro bacallau e cando comece a ferver afastámolo do lume e deixámolo repousar uns 5 minutos dentro do leite. Logo diso sacámoslle a pel e as arganas, se as houber, e desfacémolo en lascas.
- Servímolo pondo no fondo do prato unhas culleradas de brandada por enriba unhas tiras de pemento e as lascas de bacallau coroadas cunha culleradiña da brandada, decorado cunhas folliñas de perexil.
Tempo: 30 minutos Comensais: 4
Ven 24 Xuñ 2016
Posted by Crisanto under Cociña galega, Sobremesas
Comentarios desactivados en Bica ó xeito de Trives
Bica ó xeito de Trives
Ingredientes:
Para a masa mai:
- 200g de fariña forte
- ½ vaso de auga (125ml)
- Fermento de panadeiro
Para face-la bica
- 200g de masa mai
- 200g de fariña de repostería
- 400g manteiga de leite
- 400g de azucre
- 4 ovos
- 1 sobre de fermento químico (“Royal”)
- 50g de azucre
Preparación:
Facémo-la masa mai:
- Botamos a fariña nunha cunca fonda e facemos un niño e dentro del botamos a auga tépeda e o fermento (ollade que cantidade tedes que pór para 200g de fariña).
- Amasámola polo decurso de 10 minutos e logo de facer unha bola e enfariñala pómola a fermentar nunha cunca tapada cun pano nun sitio morno ata que duplique o seu volume. (1-2 horas)
Facémola bica:
- Quentamos a manteiga a fogo moi baixo, amornámola un pouco só para abrandala, e mesturámola co azucre.
- Xuntamos a manteiga mailo azucre coa masa mai e amasamos ata mesturar todo.
- Engadímo-los ovos e ímolos incorporando á masa un por un; non botamos outro ata ter incorporado o anterior. Aquí podemos axudarnos coas variñas do batedor eléctrico
- Mesturamos a fariña co fermento químico, peneirámola cun coador e engadímola os poucos a todo o anterior, mesturándoo de vagar con movementos envolventes.
- Pasamos esta mestura a un molde rectangular e baixo, engraxado e enfariñado repartindo a masa coa axuda dunha culler ou espátula..
- Empoámola con azucre antes de metela no forno quente a 180ºC polo decurso duns 45-50 minutos.
- Picar cunha agulla ou un palillo longo para ver se esta cocida.
- Sacámola do molde cando estea fría.
Notas:
- Podemos empregar manteiga de porco, pois deste xeito facían no seu orixe.
- Podemos tamén botarlle canela moída por riba logo de sacala do molde
Tempo: 3 horas
Comensais: 8 ou máis
Mér 25 Mai 2016
Posted by Crisanto under Cociña galega, Peixes e outros produtos do mar
Comentarios desactivados en Albóndegas de peixe
Albóndegas de peixe
Ingredientes:
Para as albóndegas:
- 1 Kg de xurelo, cabala ou outro peixe
- 1 cebola nova (200g)
- 2 dentes de allo
- 50 g de pemento verde italiano
- 1 rebanda de pan reseso (50 g)
- Leite gordo
- 2 ovos
- Perexil
- Aceite de oliva e sal
- Fariña e ovo para rebozar
Para o prebe:
- 1 cebola (350 g)
- 100 g de pemento verde
- 1 dentes de allo
- 3 pementos secos
- 1 tomate maduro
- 2 vasos de caldo de peixe
- Aceite de oliva e sal
Preparación:
- Facémolas albóndega e para iso comezamos pondo o pan a remollo en leite
- Amolecémola cebola e o allo, moi picadiños, nunha tixola con aceite ata que esta un pouco branda. Afastamos do lume e reservamos.
- Entanto, sacámoslle ó peixe a pel, as arganas e picamos miúdo a carne.
- Nunha cunca botámo-lo peixe picado, o pan escoado e espremido, o perexil os ovos maila cebola reservada, mesturámolo todo e pómolo no seu punto de sal.
- Facémo-las albóndegas e logo de pasalas por fariña e ovo, fritímolas en abundante aceite quente.
- Deixámolas escoar sobre papel de cociña e reservámolas nunha tarteira.
- Facémo-lo prebe. Comezamos pondo a remollo, en auga quente, os pementos secos durante uns 20 minutos. pasado o tempo sacámoslle a polpa cun coitelo e reservámola.
- Entanto, amolecémola cebola picada xunto co allo e cando estea branda engadímoslle o tomate relado e deixamos que cozan xuntos uns minutos; logo botámoslle o caldo maila polpa reservada e deixamos que fervan uns 20 minutos.
- Pasado o tempo triturámolo, pómolo no seu punto de sal e pasámolo polo coador chinés.
- Por outra banda cortámolos pementos verdes en tiras e fritímolas nunha tixola con aceite a fogo medio ata que estean brandos
- Botamos o prebe quente por cima das albóndegas e logo de que ferva un minuto apagámolo lume.
- Deixámolas repousar uns minutos antes de servilas decoradas coas tiras de pemento fritido.
Nota:
- Podemos facer bolas con calquera peixe, o sabor dependerá do peixe que empreguemos.
Tempo: 40 minutos Comensais: 4
Sáb 31 Dec 2011
Posted by Crisanto under Cociña galega, Sobremesas
Comentarios desactivados en Crema torrada
Crema torrada
Ingredientes:
- 1 litro de leite enteiro
- 10 culleres de azucre
- 3 xemas de ovo
- 2 culleres de fariña de millo (Maizena)
- 1 pau de canela
Descrición:
- Torramos 6 culleres azucre ata facer caramelo sen queimalo.
- Batémo-las xemas de ovo e mesturámolas coa fariña de millo e 200 ml de leite.
- Pomos a ferver o resto do leito co azucre sobrante e o pau de canela. Cando comece a ferver engadímolo a cazola do caramelo e remexemos ata que se desfaga. Afastamos a canela
- Cando xa estea desfeito pómolo a ferver de novo e engadímoslle o batido de xemas e leite remexendo de seguido para que non se fagan grumos e calle o leite. Se cómpre metémoslle o batedor eléctrico para que a mestura quede homoxénea. Cando ferva de novo deixamos un par de minutos, sen deixar de remexer.
- Afastamos do lume e botámolo na bandexa de presentación ou en moldes individuais.
Nota:
- Como veredes nesta receita facemos unhas natas de ovo un chisco máis espesas pero con caramelo en troques de azucre branco
Tempo: 30 minutos
Comensais: 4-6 persoas
Lun 7 Nov 2011
Posted by Crisanto under Cociña galega, Sobremesas
Comentarios desactivados en Torta de requeixo
Torta de requeixo
Ingredientes:
- 500 g de requeixo
- 4 ovos
- ½ limón (a relado da casca)
- 2 culleradas de brandy
- 1 sobre de fermento en po
- 200 g de azucre
- 1 iogur natural ou sabor limón
- 300 g de fariña
- 250 ml de leite enteiro
- Marmelada de amorodos
Descrición:
- Nunha cunca fonda batémo-los ovos mailo azucre co batedor de variñas ou co batedor eléctrico ata que dobre o seu volume.
- Despois disto imos engadindo (sen BATER só remexendo) sobre mestura anterior o leite, a fariña coada e mesturada co fermento, o relado de limón, o requeixo mailo iogur desfeitos co batedor e o brandy. Agardamos sempre a que se mesture o ingrediente anterior antes de botar o seguinte.
- Engraxamos e enfariñamos un molde redondo desmontable e botamos nel a mestura que fixemos na cunca.
- Metémolo todo ó forno quente a 190ºC polo decurso de 30 minutos, tapando o molde con papel de aluminio para que non se nos torre por riba a torta, tirándollo cando leve uns 20 minutos cocendo.
- Antes de sacala do forno probamos se está feita espetando un garfo, se sae limpo a torta está pronta para sacala.
- Deixamos que arrefríe ben antes de sacala do molde.
- Pómola na bandexa de presentación e cubrímola con marmelada de amorodos ou de outras froitas vermellas (amoras, framboesas, arandos, etc.)
Tempo: 45 minutos
Comensais: 8
Ven 30 Set 2011
Posted by Crisanto under Cociña galega, Tapas
Comentarios desactivados en Pementos recheos de verduras e lagostinos
Pementos recheos de verduras e lagostinos
Ingredientes:
- Rebandadas de pan
- Pementos de piquillo enteiros para encher
- Verduras:
- ½ pemento verde
- ¼ pemento vermello
- ½ cebola
- ¼ cabaciño
- 4 champiñóns
- 6 lagostinos cocidos
- Leite
- 1 Ovo batido + Fariña
- Aceite de oliva
- Sal
Descrición:
- Picamos tódalas verduras e refogámolas nunha tixola con aceite ata que estean tenras.
- Logo disto engadimos os lagostinos picadiños e deixamos facer outro pouco.
- Deixamos que reduza un pouco, pomos a punto de sal e engadimos unha culler de fariña e algo de leite para liga-la farsa
- Enchémo-los pementos coa farsa, rebozámolos con fariña e ovo batido e fritímolos na tixola con abondoso aceite.
- Servímolos quentes sobre cadansúa rebandada de pan que torraremos un chisco.
Tapas: 4 ou máis
Tempo: 30 minutos
Mér 21 Set 2011
Posted by Crisanto under Cociña galega, Peixes e outros produtos do mar
Comentarios desactivados en Albóndegas de pataca e pescada
Albóndegas de pataca e pescada
Ingredientes:
- 400 g de pescada en filetes
- 400 g patacas (2 mediadas)
- 30 g de pan reseso
- ½ vaso de leite
- 3 ovos
- Fariña
- Perexil
- Noz moscada
- Aceite
- Sal
Descrición:
- Pomos a remollo o pan no leite
- Cocémo-la pescada en auga con sal polo decurso de uns 5 minutos. Sacámoslle a pel mailas arganas, esmigallámola e reservámola
- Pelámo-las patacas, cortámolas en cachelos e cocémolas na mesma auga de cocermos a pescada. Escoámolas e reservámolas xunto cun vaso do caldo.
- Cando a pescada mailas patacas estean frías, esmagámo-las patacas mailo pan escorrido, engadimos 2 ovos batidos e mesturamos coa pescada esmigallada.
- Alixeirámo-la masa para facelas albóndegas con algo de caldo reservado ata ter a masa axeitada.
- Engadímo-lo perexil maila noz moscada e pomos a punto de sal.
- Facémo-las albóndegas e logo de pasalas por fariña e ovo, fritímolas en abondoso aceite quente.
- Deixámolas escorregar sobre papel de cociña e servímolas quentes acompañadas dunha ensalada de escarola, leituga, etc.
Tempo: 50 minutos
Comensais: 4
Mér 13 Xul 2011
Posted by Crisanto under Cociña galega, Sobremesas
Comentarios desactivados en Formigos (2)
Formigos (2)
Ingredientes:
- 250 g de azucre
- ½ vaso de auga
- 4 rebandadas de pan de molde sen codia
- ½ vaso de leite
- 75 g de améndoas picadas
- 25 g de piñóns
- 50 g de pasas de corinto (pasas sen semente)
- 4 xemas de ovo
- 3 culleres de Viño do Porto
- Canela
Descrición:
- Pomos a ferver o azucre coa auga sen moito lume para que non se queime e deixamos facer o xarope ata punto de bola, é dicir ó retirarmos a culler de pau da pota o xarope que pinga forma ó caer unha pequena bola.
- Remollámo-lo pan nun pouco de leite morno durante uns 2 minutos. Deixámolo escorrer.
- Engadímo-lo pan remollado ao xarope botando tamén os froitos secos mailas pasas remolladas e remexemos polo decurso de 2 minutos a fogo baixo.
- Afastámolo do lume e engadímo-las xemas batidas e mesturadas co viño do Porto.
- Pomos de novo ó lume baixo para espesar.
- Servímolo nun prato empoado con canela.
Tempo: 30 minutos
Comensais: 4
Nota: