Entries tagged with “cabaciño”.


Vitela asada con verduras

 

Ingredientes:

  • 1 peza de “espaldilla” 2 kg.
  • 6 cenorias
  • 1 cabaciño
  • 150 pemento vermello
  • 150 g de pemento verde
  • 200 g de cebola francesa ou “chalotas”
  • 6 patacas medianas
  • Tomiño
  • Pementa negra moída
  • 100 ml de Brandy
  • 100 ml de viño branco
  • 2 culleradas de vinagre branco
  • 300 ml de caldo de ósos
  • Aceite de oliva
  • Sal

Para o adubo

  • Unhas pólas de Perexil
  • 3 dentes de allo

Para o prebe

  • 25 g de queixo azul
  • 20 g de manteiga de leite
  • 250 g de nata de montar
  • Pementa moída

 

Preparación:

  1. En primeiras preparámo-la carne sacándolle cun coitelo moi ben afiado a tea que o cobre por unha das partes.
  2. Preparámo-las verduras e para iso cortámo-las cenorias en rodas, o cabaciño en anacos medianos, os pementos en bastóns, as cebolas en anacos medianos e as patacas pelámolas e cortámolas en cuartos.
  3. Acendémo-lo forno a 200ºC para que vaia quecendo.
  4. Logo diso machucámo-lo perexil xunto co sal e o allo e con iso adubámola carne.
  5. Deseguido, selámola nunha tixola grande cuns 100 ml de aceite de oliva.
  6. Cando a carne estea selada, colocámola na bandexa do forno.
  7. Logo diso, metémo-las verduras na tixola e refogámolas xunto coas patacas.
  8. Botamos agora as verduras xunto coas patacas na bandexa ó redor da carne, empoámolo todo cun chisco de sal e pementa moída; regámolo co brandy, o vinagre, o viño branco máis os 300 ml de caldo de osos e metémo-lo ó forno polo decurso duns 50-60 minutos. Vixiade que non se vos queime se así fora póndelle un papel de aluminio por enriba.
  9. Entrementres asa a vitela, facémo-lo prebe e para iso desfacemos o queixo nunha tixola cuns 20 g de manteiga, logo diso engadímola nata e empoámolo coa pementa moída, ó noso gusto, e deixamos que espese un chico.
  10. O sacala do forno cortámo-la peza en rebandas e servímola coas verduras acompañada co prebe para que cada quen se sirva.

 

Nota:

  • A “espaldilla” e un corte de carne que se atopa na parte alta da pa ou omoplata da res.
  • Un truco para que non seque e meter unha cunca con auga no forno para que deprenda vapor.

 

Tempo: 80 minutos                                                   Comensais: 6 persoas

Bacallau con pisto 

 

Ingredientes:

  • 4 talladas do lombo de bacallau desalgado
  • 300 g de cebola  de ensalada
  • 200g de pemento vermello
  • 200 g de pemento amarelo de Oímbra
  • ½ cabaciño (150g)
  • 2  tomates maduros sen pel nin pebidas
  • Aceite de Oliva
  • Sal
  • Pementa negra moída
  • Unhas pólas de perexil

 

Descrición:

  1. Picámo-la cebola mailos pementos e o cabaciño en dados e pómolos a amolecer nunha tixola cun fondo de aceite; engadímoslle pementa e sal e deixamos facer uns 1o minutos a fogo maino coa tixola tapada.
  2. Entanto amolecen as verduras, secámo-las talladas de bacallau cun pano limpo, sacámoslle as arganas cun alicate limpo e reservamos
  3. Logo dos 10 minutos, engadímo-los tomates cortados en dados e deixamos que se fagan co resto 3 minutos máis; non remexer moito para que non rompan os dados.
  4.  Pasados os 5 minutos, pomos enriba das verduras as talladas de bacallau coa pel cara abaixo e deixamos facer coa tixola tapada 3 minutos máis. Pasado o tempo dámos volta as talladas e afastámolo do lume para que repouse tapado.
  5. Logo de 3 minutos pómo-lo bacallau en cadanseu prato co pisto por cima regado co zume resultante e decoramos con unha póla de perexil.

 

 

Comensais: 4 persoas                                                           Tempo: ½ hora

Bocadiño de xamón e verduras

 

Ingredientes:

  • 4 rodas de berenxena
  • 4 rodas de cabaciño
  • 4  rodas de tomate
  • 2 lascas de queixo
  • 4 panciños pequenos
  • 4 lascas de xamón
  • Aceite de oliva
  • Sal

 

Descrición:

  1. Salgámo-las rodas de berenxena, cabaciño e o tomate, sen pebidas, e facémolas á prancha, ben nunha tixola ou ben nunha prancha de cociñar cun chisco de aceite. Primeiro facemos polas dúas caras a berenxena mailo cabaciño e deixamos o tomate para ó final.
  2. Cortámo-lo pan ó longo pola metade e torrámolo un chisco, non moito só para que trisque un pouco ó mordelo, pomos primeiro as verduras quentes, por riba media lasca de queixo e por riba de todo unha lasca de xamón.
  3. Tapamos coa outra metade de pan deixando que se vexa por fora o que vai dentro do pan.

 

Nota:

  • Podémolo presentar tamén sobre medio pan torrado espetado cun pauciño

 

 

Tempo: 15 minutos

Tapas: 4

Roliños de cabaciño, xamón e gulas

 

Ingredientes:

  • 1 cabaciño
  • 12 medias lascas de xamón
  • 150 g de gulas
  • 1 dente de allo
  • 12 rebandadas de pan
  • 1 cebola
  • 1 culleriña de azucre
  • Fariña
  • Ovo
  • Aceite
  • Sal

 

Descrición:

  1. Se o cabaciño é tenro non o pelamos e cortámolo en tres anacos iguais ó través. Cortamos logo os  anacos cunha mandolina, tomando só as 4 lascas centrais; en total 12 lascas.
  2. Salgámo-las lascas, envolvémolas en fariña e ovo batido e fritímolas en abondoso aceite quente. Logo de fritir escorrémolas en papel de cociña para sacarlles o aceite.
  3. Nunha tixola con dúas culleres de aceite botamos o allo picado miúdo e cando empece a dourar engadimos as gulas que imos facendo durante uns 2 minutos sen deixar de remexer.
  4. Sobre as lascas de cabaciño  pomos as medias lascas de xamón e as gulas repartidas e facemos rolos. Reservamos.
  5. Cortámo-la cebola en medías lúas e acaramelámola a fogo suave nunha tixola con aceite, sal e azucre.
  6. Pomos estes rolos, espetados cun pauciño para que non se desfagan,  sobre as rebandadas de pan lixeiramente torradas e botamos por riba un pouco de cebola acaramelada.

 

Nota:

  • Para que o cabaciño non colla tanto aceite podes facelo a prancha nunha tixola cun chisco de aceite en troques de rebozalo.
  • En troques da cebola acaramelada podes pór enriba un chisco de marmelada de froitos vermellos coma amorodos, arandos ou framboesas.
  • En troques de xamón podes empregar lascas de pa curada, que sae más arranxado de prezo.

 

 

Tempo: 15 minutos

Tapas: 12

Pementos recheos de verduras e lagostinos

 

Ingredientes:

  • Rebandadas de pan
  • Pementos de piquillo enteiros para encher
  • Verduras:
    • ½  pemento verde
    • ¼  pemento vermello
    • ½ cebola
    • ¼  cabaciño
    • 4 champiñóns
  • 6 lagostinos cocidos
  • Leite
  • 1 Ovo batido  + Fariña
  • Aceite de oliva
  • Sal

Descrición:

  1. Picamos tódalas verduras e refogámolas nunha tixola con aceite ata que estean tenras.
  2. Logo disto engadimos os lagostinos picadiños e deixamos facer outro pouco.
  3. Deixamos que reduza un pouco, pomos a punto de sal e engadimos unha culler de fariña e algo de leite para liga-la farsa
  4. Enchémo-los pementos coa farsa, rebozámolos con fariña e ovo batido e fritímolos na tixola con abondoso aceite.
  1. Servímolos quentes sobre cadansúa rebandada de pan que torraremos un chisco.

Tapas: 4 ou máis

Tempo: 30 minutos

Canelóns de filloas con verduras e carne

 


 

Ingredientes:

 

Para as filloas

  • 100 g de fariña
  • 250 ml de leite
  • 1 cullerada de manteiga
  • 2 ovos
  • Sal

Para o recheo:

  • 2 cabaciños
  • 2 cebolas
  • 1 pemento vermello
  • 2 pementos verdes
  • 2 cenorias
  • 100 g de espárragos trigueiros
  • 100 g de cogomelos
  • 5 culleradas (50 ml) de aceite de oliva
  • 1 vaso de viño branco do país
  • 300 g de carne picada
  • Queixo relado
  • Sal

Para o bechamel:

  • 125 g. de manteiga de leite
  • 125 g de fariña
  • 1 litro de leite
  • Noz moscada e pementa

Descrición:

Facémo-las filloas

1.      Batémo-los ovos maila fariña, a manteiga, o leite e o sal, mesturándoo todo ben coa axuda dun batedoiro.

2.      Engraxamos unha tixola quente cun pouco de manteiga ou touciño e engadimos e o mesmo tempo, movendo a tixola, imos repartindo unha ou dúas culleradas da mestura.

3.       Fritímolas como unha torta, canto máis delgadiña mellor, dándolle a volta para que se doure polos dous lados.

4.       Deste xeito facemos ata 12 filloas que reservamos.

Facémo-lo bechamel:

  1. Derretémola manteiga e logo engadímoslle a fariña e remexemos ben ata que se desapegue das paredes. Non deixar torrar a fariña.
  2. Logo disto engadímoslle o leite fervendo e remexemos todo a fondo para que non queden grumos. É mais doado se neste intre metedes a batedoiro eléctrico, deste xeito a masa queda moito mais fina. Engadímoslle tamén un chisco de noz moscada e pementa para recender. Deixade que coza ben (3 minutos). Reservámolo

Facémo-lo recheo:

  1. Picamos miudiño tódalas verduras e pómolas a facer ó lume baixo nunha tixola co aceite.
  2. Á medio facer engadimos o vaso de viño e deixamos facer ata que estea todo brando e reduza.
  3. Engadímo-la carne picada e seguimos cociñando ata que a carne quede feita e mesturada coa verdura.
  4. Engadimos, para ligala farsa, unha cuarta parte do bechamel que fixemos . Reservámolo

Facémo-los canelóns:

1.      Estendémo-las filloas e pomos nelas unhas culleradas do recheo, logo enrolámolas e cun coitelo cortámolos extremos ata que apareza o recheo polos bordos.

2.      Colocámo-los canelóns feitos coas filloas no fondo dunha bandexa e cubrímolo co bechamel e empoamos con queixo relado.

3.      Metémolo ó forno quente a 180 ºC (posición de grellado) ata que a parte darriba fique dourada.

4.      Sacámo-los canelóns do forno e servímolos quentes.

 

Tempo: 60 minutos

Comensais: 4

Bacallau ó pilpil con crema de pataca e pemento verde

Ingredientes:

* 4 lombos de bacallau salgado, coa pel e sen arganas (duns 200 g cada un)

* 300 ml. de aceite de oliva virxe

* 6 dentes de allo

* Unhas lascas de cabaciño

*Para face-la crema:

* 200 g De pementos verdes

* 100 g de bacallau (mellor da cola)

* 2patacas grandes

* 2 dentes de allo

* 100 ml. de aceite de oliva

* 2 pólas de perexil picado

* 200 ml de caldo de peixe

Descrición:

Para face-lo bacallau ó pilpil:

1.      Primeiro desalgámo-lo bacallau en auga fría dentro do frigorífico durante 48 horas cambiando de auga cada 8 horas.

2.      Logo diso sacámolo da auga, escorrémolo e secámolo ben cun pano de cociña.

3.      Pomos a quentar nunha cazola chaira os 300ml de aceite mailos 6 dentes de allo, facémolos de vagar a fogo baixo ata que se douren os allos (ollo, que non se queimen).

4.      Afastamos os allos e a pota do lume e metemos de seguido as talladas de bacallau primeiro coa pel cara abaixo e logo, dun par de minutos, dámoslles a volta. Deixamos no aceite ata que tempere, case frío, para que solte a xelatina o bacallau

5.      Volvemos a quentar a cazola, sen que ferva forte, ata que empecemos a ver unhas burbullas coma olliños pola maior parte da cazola.

6.      Sacámolas talladas de bacallau a un sitio quente e cun coador de arame batémo-lo aceite e a xelatina da pota ata ligar una salsa homoxénea. Se temos que quentar algo máis facelo sen que chegue a ferver.

7.      Pomos de novo na cazola os lombos de bacallau e mantémolo nun sitio tépedo.

Para face-la crema de patacas e pementos:

1.      Cortamos os pementos verdes en xuliana e amolecémolos nunha tixola con 100ml de aceite a fogo baixo para que non perdan cor.

2.      Logo disto escorrémolos ben e pasámolos a unha pota onde engadiremos as patacas peladas e cortadas en anacos medianos, os dentes de allo mailo 100 g de bacallau da cola (desalgado, sen pel nin arganas)

3.      Engadimos caldo de peixe xusto para cubrilo e deixamos coceren durante 35-40 minutos.

4.      Sacamos parte do caldo e triturámolo todo; engadimos dúas culleres de aceite, o perexil picado e algo de caldo de coceren se cómpre.

5.      Facémo-las lascas de cabaciño á prancha nunha tixola cun chisco de aceite.

6.      Presentamos pondo no fondo de cadanseu prato unhas culleres de crema de pataca e logo por riba pomos a tallada de bacallau regada co pilpil e adornamos co cabaciño , un dente de allo e empoamos todo con perexil picadiño.

Notas:

  • Toda vez que temos feita a salsa do pilpil non é doado quentalo a fogo directo pois se ferve córtase e logo non se pode volver a ligar. Se o quentamos a fogo directo farémolo a fogo baixo sen que ferva e movendo o contido da cazola para que vaia collendo a salsa temperatura por igual e non se corte.Para quentala e moi práctico metela uns intres no forno con xeito para que non se nos seque, para evitalo podemos cubrilo cunha lámina de aluminio.

Tempo: 1 hora

Comensais: 4