Entries tagged with “bonito”.


Tosta de empanada de bonito y pemento asado

Ingredientes:
• 300 g de bonito en aceite (peso escoado)
• 1 berenxena asada coa pel
• 3 pementos vermellos
Para a masa da empanada:
• 300 g de fariña
• 75 g de manteiga en pomada
• 75 g de auga
• 25 g de aceite de oliva
• 25 g de vino branco
• 20 g de lévedo de panadeiro
• 1 ovo
• 10 g de sal
Para o sofritido:
• 3 cebolas brancas
• ½ pemento vermello
• 1 folla de loureiro
• 5 g de polpa de pemento chouriceiro
• 1 culleradiña de pemento doce
• 100 g de tomate fritido
• 100 ml de vino branco
Para a maionesa:
• 1 xema de ovo
• Aceite de la lata de bonito
• Vinagre e sal

Preparación:
1. Asámo-los pementos vermellos no forno a 190ºC cando estean asados pelámo-los pementos, cortámolos en tiras e reservámolos.
2. Cortámo-la berenxena en rodas e facémolas nunha tixola a prancha. Reservámola.
3. Facémo-las tostas de empanada, para iso botámo-la fariña nunha cunca e facendo un oco no medio botamos nel, o sal e o fermento desleado en auga quente, o ovo, o aceite, mailo viño branco e amasamos ben ata ter unha masa homoxénea que non se apegue ás mans. Deixámola levedar nun sitio quente. Logo de levedar gramámola un pouco, estirámola co rolo de cociña e cortámola facendo 4 pezas iguais rectangulares que picamos para que non suban moito. Metémolas ó forno a 160ºC ata que estean lixeiramente douradas.
4. Amolecémo-la cebola mailo pemento cortados en xuliana xunto co loureiro; cando estea engadímoslle o pemento doce, a polpa, o viño branco, e deixamos que se fagan xuntos e reduza un pouco. Por último botámo-lo tomate fritido e deixamos que espese.
5. Facemo-la maionesa botando no vaso do batedor eléctrico a xema de ovo, o aceite do bonito, algo de vinagre e un chisco de sal e batemos coas coitela sen movelas do fondo ata que comeza a ligar logo engadimos máis aceite de xirasol,se fora preciso ata ter a maionesa do espesor axeitado; rectificamos de vinagre e sal.
6. Presentámolo pondo sobre as tostas un pouco do sofritido escoado, as berenxenas, as tiras de pemento asado e por cima o bonito en anacos grandiños, decorado coa maionesa.

Tempo: 80 minutos contado o asado dos pementos
Comensais: 4

Pastel de bonito

Ingredientes:
• 300g. de bonito do norte (Thunnus alalunga)
• 4 pementos do piquillo
• 5 culleradas de tomate fritido
• 4 ovos
• 100ml. de nata líquida
• ½ parte branca dun allo porro
• ½ cebola nova
• Manteiga e pan relado
• Pementa branca
• Aceite de oliva e sal
Para a maionesa
• 1 ovo
• 200 ml de aceite de mirasol
• ½ Limón (o zume)
• sal
Para o prebe rosa
• Maionesa
• 2 culleradasde zume de  laranxa
• 1 cullerada de ketchup
• 1 cullerada de brandy

Preparación:
1. Cocémo-lo bonito en auga con sal polo decurso de ½ hora. Sacámolo, arrefriámolo e logo de limpalo, esmigallámolo. Tamén podemos facelo con conserva de bonito en aceite.
2. Picámo-la cebola mailo allo porro e amolecémolos, a fogo maino, ata dourar, sen torralo, nunha tixola con aceite. Logo disto engadímo-los pementos, triturámolos, arrefriámolos e reservámolos.
3. Batémo-los ovos e mesturamos nunha cunca fonda coa nata, o bonito, o tomate fritido, un chisco de pementa branca e o triturado de cebola e pementos.
4. Untamos un molde rectangular con manteiga e empoámolo con pan relado.
5. Vertemos todo dentro do molde e metémolo ó forno xa quentado a 180ºC ó baño maría polo decurso de 90 minuto,s a media altura. Probamos se está feito, picando cunha agulla, se sae limpa xa o está. Deixámolo arrefriar ben antes de sacalo do molde.
6. Facémo-la maionesa botando no vaso do batedoiro eléctrico, o ovo mailo zume de limón, uns 100 ml de aceite e un chisco de sal; batémolo coas coitelas, sen mover o batedoiro do fondo e cando comece a ligar xa podemos move-lo batedoiro darriba abaixo e mentres seguimos batendo imos engadindo aceite ós poucos e de seguido ata o espesor axeitado. Rectificamos de sal se o precisa..
7. Facémo-lo prebe rosa tomando a metade da maionesa feita e engadíndolle o zume de laranxa, o brandy mailo ketchup.
8. Cortámolo en rebandadas e servímolo frío acompañado cos dous prebes.
9. Tamén o podemos servir quente acompañado cunha salsa coma esta:
Nunha tixola con aceite Amolecemos 1 cebola, un dente de allo e 200 g de pementos verdes, engadíndolle logo cando estean brandos 5 pementos de piquillo. Botámoslle logo un vaso de caldo de peixe e cociñamos ata que espese un chisco. Triturámolo todo e coámolo co chino. Pomos no seu punto de sal.
Tempo: 1 ½ hora
Comensais: 4 ou máis

Bonito con prebe de tomate e cebola acaramelada

Ingredientes:
• 2 toros de bonito fresco (750g.)
• 4 cebolas brancas
• 2 dentes de allo
• 100 g. de tomate fritido
• Aceite de oliva e sal

Preparación:

1. Pelámo-las cebolas, cortámolas en medias lúas, o mesmo que os dentes de allo e pómolos a amolecer, a fogo maino, nunha tixola cuns 100 ml. de aceite.
2. Logo duns 20-25 minutos sacámolo da tixola, escoámoslle ben o aceite, e reservámolo. Por suposto, salgámolo no seu punto.
3. Dourámo-los os toros de bonito, uns 2 minutos por cadansúa banda e reservámolos.
4. Pomos no fondo do prato o tomate fritido, enriba o bonito e por cima del a cebola acaramelada. Adornamos cun detalle verde coma unha pola de perexil, perifol, amenta, etc

Tempo: 30 minutos
Comensais: 4

Marmita ou marmitako de bonito

Ingredientes:
• 500 g de bonito fresco ou atún
• 6 patacas medianas
• 200 g pementos verdes
• 200 g pemento vermello
• 2 cebolas vermellas
• 2 pementos secos ou pemento doce
• 2 dentes de allo
• Caldo de peixe
• Aceite de oliva e sal

Preparación:
1. Sacámoslle a pel, as arganas e a parte negra ó bonito, cortámolo en anacos medianos e reservámolo.
2. Facemos un caldo de peixe coa pel, arganas, e a parte negra mais unha cebola, porro, cenoria e allo.
3. Pomos a remollo os pementos secos en auga ben quente durante unha media hora e reservámo-la polpa logo de sacarlla rascando cun coitelo.
4. Nunha cazarola de tamaño medio con uns 50 ml de aceite botamos a cebola picada, un pouco de sal e amolecémola ben, cando xa estea mol engadímo-los pementos mailos dentes de allo picados todos miúdos e deixamos que se fagan ata que estean brandos; no último momento engadimos a polpa dos pementos secos. Podemos tritura-la cebola e os pementos cando xa estean feitos.
5. Entanto, pelamos, limpamos e escachámolas patacas (non as cortamos) en anacos do tamaño dunha noz e engadímolas a cazarola e refogámolas uns minutos coas verduras.
6. Engadímolo caldo de peixe quente cubrindo as patacas con 1-2 dedos de auga non máis; ten que quedar caldoso para comer con culler e deixamos cocer uns 25-30 minutos ata que as patacas comecen a esfarelarse un pouco e a engorda-lo caldo.
7. Afastámolo do lume e seguido engadímo-lo bonito.
8. Deixámolo repousar 10 minutos e arranxámolo de sal antes de servilo quente.
Notas:
• A marmita ou marmitako de bonito é un prato de pescadores do vascos que se estendeu por toda a costa; o máis enxebre é o de bonito, pero pódese facer con outros peixes, como bacallau, xurelo, cabala, pescada, luras, etc
• Podemos engadir 2 tomates ben maduros ou salsa de tomate fritido en troques dos pementos secos; mais deste xeito o marmitako di algo máis acedo.

Tempo: 45 minutos
Comensais: 4

Ensalada de bonito e patacas

Ingredientes:
• 300g. de bonito fresco (1 roda)
• 300g. de patacas pequenas
• 3 ovos
• 1 cenoria
• 1 cebola verde
• ½ pemento vermello
• ½ pemento verde
• 1 tomate maduro
• Olivas negras
• Vinagre de xerez
• Aceite
• Sal

Preparación:
1. Cocémo-la roda de bonito en auga con sal durante 20 minutos, deixámola arrefriar ma auga e logo de limpalo de peles, sangue e arganas esnacámolo en pedazos un pouco grandes. Reservámolo
2. Lavámo-las patacas e cocémolas enteiras e sen pelar en auga e sal por uns 25 minutos ou más segundo sexan de grandes. Logo de arrefrialas, pelámolas, cortámolas en cuartos ou en rodas se son algo máis grandiñas e reservámolas.
3. Xunto coas patacas cocemos tamén os ovos, picados cun alfinete pola parte gorda para que saia o aire e non rebenten, maila cenoria sen pelar. Os ovos sacámolos logo de coceren 8 minutos e a cenoria logo dos 13. Arrefriámolos.
4. Sacámoslle a casca ós ovos, pelámo-la cenoria e cortámolos en rodas. Reservámolos
5. Cortámo-los pementos, logo de lavalos e sacarlles as sementes, en anacos mediados, duns 2x2cm. Quitámoslle as sementes ó tomate e cortámolo en anacos algo máis pequenos que os pementos. Cortamos a cebola en anacos coma os do tomate. Salgámolo todo e reservámolo.
6. Mesturámolo todo, agás o ovo, nunha cunca fonda e pasámolo a unha bandexa de presentación.
7. Adornámolo cos ovos e as olivas negras e regámolo cunha vinagreta feita con 9 culleradas de aceite de oliva e 3 de vinagre
Notas:
Para esta ensalada empregamos bonito fresco (tunnus alalunga, atún branco) moi saboroso e apreciado pare este tipo de receitas; isto non quita que poidas empregar outra clase de atún, fresco, en aceite ou se che peta en vinagre; neste derradeiro caso ollo logo ó aliñar coa vinagreta.
• Os pementos son dos de asar; neste caso van crus pero podes asalos se non che gustan así.
Tempo: 1 hora
Comensais: 4 persoas

Bonito con tomate

Ingredientes:
• 2 toros de bonito duns 2-3 cm. de groso
• 1 cebola branca
• 1 pemento verde (100 g.)
• 1 lata de tomate fritido (450 g.)

Descrición:
1. Limpámo-los toros de bonito sacándolles a pel, as arganas a carne negra e salgámolos. Quedarán 8 anacos triangulares.
2. Picámo-la cebola mailo pemento en anacos pequenos e pómolos a amolecer, a fogo maino nunha tixola con aceite. Cando estean feitos engadímo-lo tomate fritido. Non o trituramos.
3. En tanto noutra tixola con aceite a fogo forte, marcámo-las talladas de bonito por cadansúas bandas só para que selen; teñen que quedar crúas por dentro.
4. Pómo-lo bonito nunha tarteira de barro e regámolas co prebe de tomate quente e deixámolos que se fagan xuntos 1 minuto.
5. Deixámo-lo repousar 5 minutos mais, para que termine de facerse por dentro, e servímolo quente.

Notas:
O tomate fritido podes mercalo feito ou facelo ti mesmo con tomates cebola e pemento.
• A min gústame encontrar anacos de cebola e pemento no prebe, pero se queres podes trituralo.

Tempo: 15 minutos
Comensais: 4

Ovos recheos de bonito

Ingredientes:
• 8 ovos
• ½ cebola nova
• ½ pemento doce italiano
• 100 g de bonito en aceite
• 2 culleradas de maionesa
• 1 cullerada de ketchup
• 2 follas de leituga

Preparación:
1. Cun alfinete ou cunha agulla picámo-los ovos na punta grosa para que perdan o aire que teñen alí e non rebenten ó cocelos.
2. Cocémolos ovos en auga con sal uns 8 minutos, arrefriámolos en auga e pelámolos.
3. Cortámolos pola metade ó longo e sacámoslles a xemas. Reservamos as xemas de 2 ovos para adornar.
4. Entanto cocen, amolecemos, a fogo baixo, nunha tixola cun chisco de aceite a cebola picada. Salgamos para que amoleza mellor.
5. Cando estea branda, engadímo-lo pemento picadiño e deixamos que se faga ben. Deixamos arrefriar.
6. Mesturamos a cebola e o pemento coas xemas restantes mailo bonito sen aceite, a maionesa e o ketchup.
7. Enchemos con esta mestura os medios ovos e esparexemos as xemas reservadas pasadas polo pasador de puré..
8. Colocámo-los ovos nunha bandexa de presentación sobre unha cama de leituga picada en xuliana decorándoos cun fío de ketchup por cima dos ovos.

Tempo: 20 minutos
Comensais: 4

Tapa de pemento recheo de bonito

Ingredientes:
• 4 pementos de “piquillo” enteiros para encher
• 100 g. de ventrecha de bonito en aceite
• ¼ de cebola nova doce
• ¼ de pemento verde
• Vinagre de Módena
• Aceite de oliva virxe e sal

Preparación:
1. Sacámoslle o aceite ó bonito e esmigallámolo en anacos pequenos coma un garavanzo e reservámolo
2. Picámo-la cebola mailo pemento miudiños e facemos unha vinagreta con 3 partes de aceite e 1 de vinagre que engadimos ó picado. Deixamos repousar uns 30 minutos.
3. Nunha tixola con aceite facemos un pouco os pementos botándolle un chisco de sal e outro de azucre.
4. Mesturamos o bonito con 1-2 culleres da vinagreta e enchémo-los pementos de “piquillo”.
5. Servímolos fríos postos nun prato regados cun chisco de aceite de oliva virxe para darlles brillo.

Tempo: 15 minutos
Tapas: 4

Conserva de bonito do norte

Ingredientes:
• Un bo bonito do norte de 5 kg ou máis
• Aceite de oliva suave
• Sal

Preparación:
1. Sacámoslle a cola xunto con 10-12 cm de carne que logo aproveitaremos para facer unha marmita con patacas. Sacámoslle tamén a ventrecha, e o resto cortámolos en toros dun groso equivalente a altura do tarro de cristal onde o imos meter para conservar.
2. Nunha ola metémo-los toros de bonito, cubrímolos con auga botando unha culler de sal por litro de auga e cocémolos polo decurso de 2 horas, fervendo moi amodiño.
3. Afastámo-los toros e deixámolos arrefriar para poderlles sacar a pel, as espiñas e a parte negra da carne sen esmigallalos.
4. Cun coitelo moi ben afiado facemos anacos alongados de xeito que os podamos manexar ben, para metelos no tarro onde xa lle poramos un chisco de aceite cubrindo o fondo.
5. Enchémo-los tarros con aceite, deixando a parte do colo ceibe, e tapámolos enroscando forte a tapa.
6. Seguido pómolos a esterilizar ó baño maría uns 50 minutos se o facemos nunha ola con tapa; nas olas rápidas o tempo e menor; entre 15 e 25 minutos segundo a clase de ola.
7. Lavámolos e témolos 24 horas boca abaixo sobre un cartón ou papel para ver se perden. Se perderan podemos conservalos na neveira uns días antes de consumilos axiña ou conxelalos.
8. Deixámolos entre 4 a 6 meses de maduración antes de comezar a gastalos.
Notas:
• Esta é a receita clásica que fan nas conserveiras pero podes facelo metendo o bonito limpo sen pel nin arganas e salgado nos tarros con aceite e logo esterilizalos ó baño maría. Inconveniente: a presenza dos tarros non é tan limpa, quedando unha capa de aceite, outra de zumes naturais do bonito e unha especie de burbullas apegadas por fora que son a sangue que zumega ó cocelo. Vantaxe: é máis rápido e o bonito queda menos seco.
• A ventrecha pódese consumir asada, a prancha etc. ou tamén en conserva.

Empanadillas de bonito e ovo

Ingredientes:
Para a masa:
• 100 g de fariña triga
• 2 culleradas de aceite
• 125 ml de auga
• 1 ovo tamaño pequeno
• 1 chisco de sal
Para o recheo:
• ½ cebola
• 1 dente de allo
• 1 ovos cocidos
• 1 pemento italiano verde
• 100 g de bonito en aceite
• 4 culleradas de tomate fritido
• Sal
• Aceite de oliva, para fritilas

Preparación:
1. Facémo-la masa. Nunha cazarola quentámo-la auga xunto co aceite e o sal; cando ferva afastámola do lume, engadímoslle a fariña e remexemos con forza ata que estea ben mesturado todo.
2. Botámo-lo ovo e incorporámolo á masa .
3. Pasámolo a unha cunca enfariñada e logo de tapalo cun pano húmido deixámolo repousando na neveira un par de horas.
4. Pasado o tempo botámo-la masa sobre o mesado enfariñado e estendémolo cun rolo ata deixalo cuns 2 milímetros de groso.
5. Cortámo-la masa cun corta pastas redondo, cun vaso grande ou mesmo cunha cunca
6. Facémo-lo recheo. Picámo-la cebola mailo allo e amolecémolos tapados nunha tixola, a lume maino, con 3 culleradas do aceite do bonito. Cando estea mol engadímo-los pementos picados e deixamos facer uns 5 minutos máis. Afastámolo do lume, pomos no punto de sal e deixámolo arrefriar
7. Cando estea frío, engadímoslle o ovo picado, o bonito esmigallado, o tomate fritido e mesturámolo todo.
8. Facémo-las empanadillas pondo unha culleradiña do recheo nas obleas e, logo de dobralas pola metade, cerrámolas premendo cun garfo ó redor.
9. Fritímo-las empanadillas en aceite ben quente e o sacalas pousámolas sobre un papel absorbente para que perdan o aceite que arrastran

Notas:
• Podes mercar obleas na tenda se non queres facer ti a masa
• Tamén podemos pintalas con ovo batido e facelas ó forno uns 10 minutos a 190 º C ata que douren

Tempo: 20 minutos sen contar o repouso da masa
Comensais: 4