Sobremesas


Marmelada de cabaza e laranxa

 

Ingredientes:

  • 1 kg de cabaza limpa
  • 500 g de laranxa limpa
  • 600 g de azucre
  • 1 limón (o zume)
  • A casca das laranxas
  • 1 vaíña de vainilla
  • 1 cravo de olor

 

Descrición:

  1. Sacámoslle a casca mailas pebidas á cabaza e cortámola en anacos pequenos.
  2. Lavamos y pelámo-las laranxas cun pelador para obter a pel o máis delgadiña posible, sen a parte branca, logo desbotamos a parte branca, abrímolas en cuarteiróns e picámo-las, sacándollas pebidas, se as tiveran.
  3. Cortámo-las cascas en tiras finiñas e cocémolas en 3 augas diferentes polo decurso de 5 minutos cada vez. Deste xeito sacámoslles o amargor que tiveran. Reservámolas para engadírmolas cando a marmelada estea feita.
  4. Botamos a polpa das laranxas nunha cazarola xunto coa vainilla mailo cravo de olor e por enriba delas o azucre, as cascas se prefires que lle dean amargor, mailo zume de limón e deixámolo, tapado co testo ou con filme transparente, repousando na neveira ou nun sitio fresco durante unhas   Logo diso decataraste que na cazarola hai moito zume, soltárono a cabaza mailas laranxas pola acción do azucre.
  5. Pasado o tempo de repouso, pómolo a cocer polo decurso de aproximadamente de 1 hora, ata que estea no seu punto. Cara ó final teremos que deixalo a lume maino e remexer case de seguido para que non salpique nin se apegue. Non esquezas retira-lo cravo de olor
  6. A marmelada está no seu punto cando botando marmelada nun prato, esta non esbarre e o pasar a culler pola marmelada do prato facendo un suco, este non baixe, entón é cando a afastamos do fogo e a deixamos que arrefríe un chisco.
  7. Aínda quente, metémola en tarros de cristal e as súas tapas, ben esterilizados en auga fervendo e logo tapámolos coas tapas algo quentes para que cerren mellor.

 

Notas:

  • Se as laranxas son de tenda hai que fregalas ben con auga quente e un estropallo, pois as veces réganas con cera para darlles lustre.
  • Para conservar a marmelada podemos metela en tarros de cristal coa súa correspondente tapa e conxelalos ou metelos ó baño maría polo decurso de polo menos 40 minutos, se o facemos en cazarola con testo normal, ou 10 minutos en ola rápida, co marcador ó máximo, deixando logo arrefriar, en ámbolos dous casos, enriba do lume apagado.
  • Se che gusta a marmelada algo amarga non cozas as peles aparte ou cóceas menos veces.
  • Podes botar esencia líquida de vainilla

 

Tempo: 60 minutos sen contar o repousado e o esterilizado

Torta larpeira

 

Ingredientes:

Para a masa:

·      400 g de fariña triga de forza

·      100 ml de leite gordo

·      30 g de lévedo de panadaría

·      60 g de azucre

·      2 ovos tamaño L

·      50 ml de anís

·      60 g de manteiga morna en dados

·      1 culleradiña das de té de sal

·      1 limón, o relado

Para a crema pasteleira:

·      1 ovo

·      125 ml de leite gordo

·      35 g de azucre

·      10 g de maicena

·      1 pau de canela

·      1 casca de limón e outra de laranxa

·      1 culleradiña de vainilla ou 10 g de azucre vainillado

Para o xarope:

·      50 ml de auga

·      50 ml de anís

·      50 g de azucre

Para a decoración:

·      50 g de azucre

·      2 culleradas de auga

 

Preparación:

  • En primeiras desfacémo-lo lévedo no leite morno
  • Logo  facémo-la masa e para iso botamos na cunca do robot de cociña tódolos ingredientes agás a manteiga e amasámolo co trebello amasador por uns 5 minutos; logo diso engadímo-la manteiga, botándoa ós poucos para darlle tempo a que a absorba. Cando estea ben amasada pómo-la masa nunha bandexa das do forno, cuberta con papel de enfornar ou engraxada con manteiga, e estendémola de xeito circular coa man aceitada ata deixala duns 2-3 cm de groso.
  • Tapámola cun pano e deixámola levedar por unhas 1,5-2 horas nun sitio tépedo.
  • Entrementres leveda, facémo-la crema pasteleira e para iso mesturamos o ovo mailo azucre e batémolos ben. Por outra banda, afastamos nunha cunca un terzo do leite e nel desfacémo-la maicena; o resto do leite botámolo nun cazo coa canela, a vainilla mailas cascas de limón e laranxa e pómolo a quentar sen que ferva forte para que colla sabor pero non faga tona.
  • Deixamos arrefriar un pouco o leite, sacámoslle as cascas mailo pau de canela e botámolo sobre a mestura de azucre e ovo, mentres remexemos para que non calle o ovo; logo diso botámoslle a maicena co leite e pómolo de novo ó lume remexéndoo de seguido para que non se apegue nin faga grumos. Cando comece a espesar apagámo-lo lume e seguimos batendo un rato pois adoita apegarse se non remexemos. Pasamos a crema a unha cunca e logo de tapala cun filme transparente metémola na neveira a arrefriar ata que teñamos que empregala.
  • Acendémo-lo forno a 180ºC para que vaia quecendo
  • Pasado o tempo de levedado, imos decorar a torta e para iso  pintámo-la masa con ovo batido e cun coitelo ben afiado, facemos na masa uns cortes, duns 2 cm de fondo, ó longo e ó través formando cadrados. Enchemos estes cortes coa crema pasteleira coa axuda dunha manga pasteleira e logo de mesturar o azucre coa auga repartímola por enriba dos cadrados.
  • Metémo-la torta a cocer polo decurso duns 25-35 minutos. Comprobamos cun espeto que estea cocida, se sae limpo é que o está.
  • Entrementres coce, preparámo-lo xarope: mesturamos tódolos ingredientes nun cazo e pómolo ó lume durante uns minutos ata que espese un pouco.
  • Logo de sacala e aínda morna mollámola co xarope preparado
  •  Servímola fría

Notas:

  • Con robot vas tardar uns 8-10 minutos en face-la-la masa pero se o fas a man tés que votar tódolos ingredientes xuntos e tardarías uns 15 minutos.
  • Os cataláns fan a “Coca de San Xoán” que é coma a esta pero decorada con piñóns e guindas

 

 

Tempo: 1 hora                                                                      Comensais: 6-8 persoas

Sen contar o tempo de levedar

Marmelada de cabaza amarela e laranxa

 

Ingredientes:

  • 1 kg de cabaza limpa
  • 500 g de laranxa limpa
  • 600 g de azucre
  • 1 limón (o zume)
  • A casca das laranxas
  • 1 vaíña de vainilla
  • 1 cravo de olor

 

Descrición:

  1. Sacámoslle a casca mailas pebidas a cabaza e cortámola en anacos pequenos.
  2. Lavamos y pelámo-las laranxas cun pelador para obter a pel o máis delgadiña posible, sen a parte branca, logo desbotamos a parte branca, abrímolas en cuarteiróns e picámo-las sacándollas pebidas, se as tiveran.
  3. Cortámo-las cascas en tiras finiñas e cocémolas en 3 augas diferentes polo decurso de 5 minutos cada vez. Deste xeito sacámoslles o amargor que tiveran. Reservámolas para engadírmolas cando a marmelada estea feita.
  4. Botamos a polpa das laranxas nunha cazarola xunto coa vainilla mailo cravo de olor e por enriba delas o azucre as cascas, se prefires que lle dean amargor, mailo zume de limón e deixámolo, tapado co testo ou con filme transparente, repousando na neveira ou nun sitio fresco durante unhas 8 horas. Logo diso decataraste que na cazarola hai moito zume, que o soltaron a cabaza mailas laranxas pola acción do azucre.
  5. Pasado o tempo de repouso, pómolo a cocer polo decurso de aproximadamente de 1 hora, ata que estea no seu punto. Cara ó final teremos que deixalo a lume maino e remexer case de seguido para que non salpique nin se apegue. Non esquezas retira-lo cravo de olor
  6. A marmelada está no seu punto cando botando marmelada nun prato, esta non esbarre e o pasar a culler pola marmelada do prato facendo un suco, este non baixe, entón é cando a afastamos do fogo e a deixamos que arrefríe un chisco.
  7. Aínda quente, metémola en tarros de cristal ben esterilizados xunto coas tapas en auga fervendo e logo tapámolos coas tapas algo quentes para que cerren mellor.

 

Notas:

  • Se as laranxas son de tenda hai que fregalas ben con auga quente e un estropallo, pois as veces réganas con cera para darlles lustre.
  • Para conservar a marmelada podemos metela en tarros de cristal coa súa correspondente tapa e conxelalos ou metelos ó baño maría polo decurso de polo menos 40 minutos, se o facemos en cazarola con testo normal, ou 10 minutos en ola rápida, co marcador ó máximo, deixando logo arrefriar, en ámbolos dous casos, enriba do lume apagado.
  • Se che gusta a marmelada algo amarga non cozas as peles aparte ou cóceas menos veces.

 

Tempo: 60 minutos sen contar o repousado e o esterilizado

Marmelada de laranxa

 

Ingredientes:

  • 1 Kg. de laranxas grandes
  • 800 gr. de azucre
  • 1 limón (o zume)

 

Descrición:

  1. Lavamos y pelámo-las laranxas, sacándolles a pel o máis delgadiña posible, sen a parte branca, que lla sacamos cun coitelo e desbotámola, abrímolas en cuarteiróns e picámo-los sacándollas pebidas, se as tiveran.
  2. Cortámo-la pel en tiras finiñas e engadímosllelas á polpa.
  3. Botamos todo nunha cazarola, pómola ó lume e deixamos que coza polo decurso de 40 minutos a fogo maino, remexendo de cando en vez..
  4. Logo disto engadímo-lo azucre mailo zume de limón e cocemos outros 10 minutos ou máis ata que estea no seu punto, remexendo case de seguido para que non salpique nin se apegue.
  5. A marmelada está no seu punto cando botando marmelada nun prato esta non esbarre e o pasar a culler pola marmelada do prato facendo un suco, este non baixe, entón é cando a afastamos do fogo.

 

Notas:

  • Para pela-las laranxas o mellor é empregar un pelador.
  • Para conservar a marmelada podemos metela en tarros de cristal coa súa correspondente tapa e logo metelos ó baño maría nunha cazarola tapada polo decurso de 40 minutos, ou nunha ola rápida subindo o marcador ó máximo e deixándoa, logo de 10 minutos, arrefriar enriba do lume apagado.
  • Tamén podes metela, aínda quente, en tarros de cristal esterilizalos xunto coas tapas en auga fervente. Logo poslle as tapas ben apertadas e deixalos que arrefríen.
  • Se che gusta a marmelada menos amarga, coce as peles en 3 augas diferentes polo decurso de 5 minutos cada vez, para sacarlle o amargor.
  • Para saber se os tarros fican ben cerrados, olla as tapas, se estas afunden están ben.
  • A cantidade de azucre ven sendo quilo de azucre por quilo de laranxa limpa, pero se ti non es de lambonadas podes botarlle algo menos, pero ten en conta que o azucre é en si mesmo un conservante e canto máis teña mellor.

 

Tempo: 60 minutos máis o tempo de esterilización.

 

Torta de mazá e crema de améndoas

 

Ingredientes:

Para a base:

  • 340g de fariña triga
  • 170g de manteiga sen sal
  • 170g de azucre
  • 4 ovos, as claras
  • 1-2 culleradas de auga fría
  • 1 chisco de sal

Para o crema de améndoas:

  • 250g améndoas moídas
  • 200g de manteiga sen sal
  • 150 g de azucre
  • 60 g de fariña triga
  • 4 ovos, as xemas
  • 2 culleradas de nata de montar

Para o recheo de mazá:

  • 4 mazás
  • 20g de manteiga
  • 3 culleradas de azucre
  • 4 mazás máis

Preparación:

  1. En primeiras acendémolo forno a 200ºC para que vaia quecendo.
  2. Facémo-la base mesturando nunha cunca a fariña coa manteiga fría cortada en liscos pequenos, o azucre, mailas claras e o sal; mesturámolo todo esmagándoo entre as palmas das mans ata ter unha masa homoxénea pero non moi traballada engadíndolle a auga  entrementres a amasamos.
  3. Pisamos a masa ata deixala duns 2-3 cm de groso, deste xeito arrefría mellor, envolvémola en filme transparente e deixámola na neveira arrefriando coma uns 30-40 minutos.
  4. Entrementres arrefría, facémo-la crema de eméndoas e para iso mesturamos nunha cunca, coa axuda das variñas de man, tódolos ingredientes da mesma e reservámola.
  5. Entrementres tamén, facémo-lo recheo de mazá: pelámo-las mazás, sacámoslles as pebidas e nunha cazarola facemos unha compota xunto co azucre e a manteiga. Reservámola
  6. Pelámolas outras 4 sacámoslles as pebidas e cortámolas en medias lúas. Reservámolas.
  7. Montámola torta e para iso sacámola masa da neveira, partímola cun coitelo en dúas partes deixando unha delas un pouco máis grande que a outra e estriámolas co rolete ata deixalas delgadiñas, duns 2 mm de groso.
  8. Cubrimos coa parte máis grande o fondo mailas paredes dun molde redondo, desmontable, engraxado e enfariñado; recortamos o sobrante. Dentro do molde botamos a crema de améndoas ben repartida,; logo repartimos a compota ó redor facendo unha coroa e arrombámolas lúas de mazá cubrindo toda a torta de xeito radial. Tapamos todo coa outra masa que tiñamos estirada e recortamos o que sobra polo redor.
  9. Por último, metémola ó forno polo decurso duns 40 minutos ata que doure.
  10. Logo diso quitámola do forno e cando amorne sacámola do molde e empoámola con azucre moído.

Nota:

  • Se tés ocasión e dispós de nata caseira, obtida de ferver ó leite, podes empregala; é moito máis sabedeira que a nata industrial.

 

 

Tempo: 90 minutos                                                  Comensais: 6 ou máis

Torta de castañas

 

Ingredientes:

Para a masa quebrada:

  • 200 g. de fariña
  • 100 g. de manteiga de leite
  • 1 ovo
  • 50 g. de azucre
  • ½ copa de brandy
  • 1 chisco de sal

Para o amoado:

  • 200 ml. de nata para montar
  • 150 g. de azucre moído
  • 4 claras de ovo
  • 20 g. de manteiga de leite
  • 1 cullerada de brandy
  • 250 g de castañas.
  • Un bo xeado

 

Preparación:

  1. Acendémo-lo forno a 180ºC para que vaia quecendo.
  2. Facémo-la masa quebrada e para iso mesturamos tódolos ingredientes e amasámolos coas mans, non ten que quedar moi amasada. Deixámola na neveira coma 30-45 minutos e logo estirámola e forramos con ela un molde redondo (uns 20cm.Ø) baixo e con ondas engraxado e enfariñado. Recortámo-lo sobrante, que reservamos, e metémolo ó forno logo de pica-la masa cun garfo, cuberta con papel de aluminio e cuns legumes secos por enriba. Témolo no forno uns 20 minutos. Logo disto deixámolo arrefriar e reservámolo.
  3. Facémoslle un corte ata a metade ás castañas e cocémolas con auga e sal durante uns 20 minutos e logo de pelalas triturámolas e facemos puré. Reservamos 6 castañas enteiras, cocidas e sen pel para adornar.
  4. Pómo-lo puré de castañas nun cazo xunto co brandy e a manteiga e cociñámolo ó baño maría uns 5 minutos; afastámolo do lume e deixámolo arrefriar.
  5. Metémo-lo puré xa frío nunha manga, facemos unha camada en espiral cubrindo o fondo da masa quebrada alisámola cunha espátula. Reservámolo.
  6. Batémo-la nata, ben fría, xunto con 75 g. azucre moído coas variñas do batedor eléctrico ata que estea ben montada.
  7. Batemos tamén as claras algo mornas e cun chisco de sal coa axuda das variñas eléctricas e cos outros 75 g. de azucre ata ter telas a piques de neve.
  8. Mesturamos cunha espátula a nata montada co merengue e logo de metelas nunha manga pasteleira botamos unha camada por enriba da crema de castañas.
  9. Decorámola coas castañas enteira e cocidas.
  10. Métese no frigorífico para que arrefríe e sérvese acompañada con xeado ó gusto.

 

 

Tempo: 60 minutos                                                   Comensais: 6-8

Biscoito de chocolate con castañas

 

Ingredientes:

  • 250g. de castañas
  • 175g de chocolate negro
  • 100g. de manteiga de leite
  • 200g. de azucre
  • 100g. de fariña
  • 1/2 sobre de fermento en po (8g)
  • 3 ovos
  • Cacao en po
  • 1 chisco de sal

 

Preparación:

  1. En primeiras acendémo-lo forno a 180ºC para que estea quente cando haxa que meter o biscoito
  2. Rachámo-las castañas cun coitelo ata a metade e cocémolas con auga e sal durante uns 20 minutos. Logo diso pelámolas e reservámolas
  3. Logo de esnacalo chocolate e cortala manteiga en dados, desfacémolos nunha cunca ó baño maría ou no microondas, póndoo os poucos para controlalo, sacándoo e remexéndoo cada vez ata que estea desfeito. Ter ollo co microondas non sexa que queime o chocolate.
  4. Nunha cunca fonda batémolo ovos cun batedor de variñas eléctrico , xunto co azucre, ata que dobre ou triplique o volume. Neste intre engadimos un belisco de sal para potenciar o sabor.
  5. Engadimos entón o chocolate desfeito e morno, mesturando cunha espátula e con movementos envolventes para que non baixe.
  6. Seguimos logo engadindo, os poucos, a fariña mesturada co fermento e coados cun coador de arame ó tempo que imos mesturando coa espátula.
  7. Esnacamos as castaña cocidas en anacos non moi pequenos e engadímolos ó amoado mesturando coa espátula.
  8. Botámo-lo amoado nun molde, mellor desmontable, engraxado e empoado con cacao en po
  9. Metémolo o forno a 180ºC polo decurso duns 25 minutos. Este tempo pode parecer pouco pero este biscoito ten que estar cocido pero ó mesmo tempo húmido.

 

Tempo: 45 minutos                                                   Comensais: 6-8

Marmelada de castañas

 

Ingredientes:

  • 1 kg de castañas
  • 300 g de azucre
  • 100 g de leite condensado

 

Preparación:

  1. Facémoslle un corte ás castañas sen chegar a partilas de todo e cocémolas en auga cun chisco de sal polo decurso duns 20 minutos. Logo diso pelámolas ben sen sacalas da auga para que sexa máis doado facelo.
  2. Pasámolas un par de veces polo esmagador de purés e engadímoslle o leite condensado, o azucre xunto con algo de auga para axudar a disolvelo e cocémolo, a fogo maino, ata que o azucre estea disolvido e quede unha crema algo untuosa.
  3. Xa está pronta para comer cando arrefríe ou para metela en tarros de cristal e esterilizala nunha ola a presión por uns 10-20 minutos, dependendo do tipo de ola.

Notas:

  • Hai que pelalas ben sen deixar nada da casca interior pois logo da un sabor áspero.
  • Hai que ter coidado coa auga, e mellor botarmos de menos e logo engadirmos máis, que pasarse

Tempo: 90 minutos

Crumble de mazás

 

Ingredientes:

  • 4-5 mazás golden
  • 1 culleradiña de canela
  • 2 culleradas de azucre
  • 10 g de manteiga
  • 1 copa de brandy
  • Xeado de vainilla

Para a masa crumble:

  • 150 g de fariña triga
  • 70 g de manteiga de leite
  • 70 g de azucre
  • 70 g de fariña de castañas
  • 1 chisco de sal

 

Preparación:

  1. Acendémolo forno a 180 ºC para que vaia quecendo.
  2. Facémo-la masa crumble e para iso mesturamos as dúas fariñas, co azucre; logo engadímo-la manteiga fría e cortada en dados mesturando coas mans ó mesmo tempo que esmagamos a manteiga entre as palmas das man deslizando unha sobre outra de xeito que nos quede unha mestura areosa e solta.
  3. Pelámo-las mazás, sacámoslles o carozo e cortámolas en dados de 1-2 cm.
  4. Nunha tixola botámo-la manteiga xunto coas mazás maila canela, cociñámolas uns 3 minutos a fogo medio, engadímo-lo brandy, pegámoslle fogo e afastamos do lume.
  5. Logo diso botámo-las mazás nun molde redondo (24cm) engraxado con manteiga.
  6. Botamos a mestura crumble por enriba cubrindo ben todo e metémolo ó forno polo decurso duns 35-45 minutos ata que fique dourado.
  7. Servímolo quente acompañado co xeado.

Notas:

  • Podes empregar outra clase de mazás ou outro tipo de froitas coma pexegos, peras, uvas, etc
  • Para facer a fariña de castañas, pélaas ben, cóceas o vapor e cando estean cocidas secas tritúraas co aparello do batedor eléctrico.
  • En troques de fariña de castañas podes empregar améndoas moídas ou sen moer, noces, abelás, etc.
  • Calquera xeado lle vai ben.

Tempo: 60 minutos                                                               Comensais: 6-8

Tronco de castañas

Ingredientes:

  • 1 kg de castañas
  • 250 g de manteiga
  • 250 g de azucre
  • 10 g de azucre vainillado
  • 2 culleradas de augardente, ron ou brandy

Para a cobertura:

  • 200 g de chocolate negro
  • 40 g de manteiga de leite

 

Descrición:

    1. En primeiras temos que pela-las castañas e para iso podemos facer varias cousas; unha delas é coce-las castañas, logo de facerlles un corte, en auga fervendo durante uns 20 minutos e despois pelalas; outra é arrincarlles un anaco de casca, para que non estouren, e asalas nunha tixola a fogo forte, ata que vexamos que as podemos pelar a terceira é sacarlles a casca de fóra, logo polas nunha tixola a lume forte ata que a pel comeza a romper e pelámolas;
    2. Nos dous derradeiros casos, logo de pelalas, cocémolas ó vapor durante uns 30 minutos, e triturámolas co aparello do batedor eléctrico.
    3. Logo diso. Quentámolas no microondas ata que estean algo mornas . engadímoslles a manteiga, ós poucos, os azucres maila augardente e mesturámolo ben ata ter unha masa firme pero branda.
    4. Botamos esta masa nun molde alongado e alto cuberto de papel de enfornar, premémolo, alisámolo e metémolo na neveira durante uns 3. 4 horas.
    5. Entrementres, derretémolo chocolate ó baño maría xunto coa manteiga.
    6. Pasado o tempo da neveira desmoldámolo, sacámoslle o papel e cubrímolo co chocolate facéndolle cun garfo unhas liñas ó longo coma se fose a casca dunha árbore.
    7. Servímolo frío cortado en rebandas.Notas:
    8.  
  • A fariña que se obtén ó tritura-las castañas podes empregala noutras receitas coma biscoitos, ou calquera outra que che apeteza.
  • Tamén as podes cocer en leite ou auga pero deste último xeito perden moito sabor.
  • Podemos acompañalo cunha salsa de amorodos feita con marmelada de amorodos mesturada con auga (metade por metade) ou cun xeado do noso gusto.
  • Con esta mesma mestura de castañas podes presentalo do xeito clásico, é dicir facendo un biscoito delgado sobre unha placa, emborrachalo, enchelo coas castañas e logo cubrilo con chocolate ou con nata montadaTempo: 50 minutos                                                   Comensais: 4-6

 

Páxina seguinte »