Carnes


Vitela asada con verduras

 

Ingredientes:

  • 1 peza de “espaldilla” 2 kg.
  • 6 cenorias
  • 1 cabaciño
  • 150 pemento vermello
  • 150 g de pemento verde
  • 200 g de cebola francesa ou “chalotas”
  • 6 patacas medianas
  • Tomiño
  • Pementa negra moída
  • 100 ml de Brandy
  • 100 ml de viño branco
  • 2 culleradas de vinagre branco
  • 300 ml de caldo de ósos
  • Aceite de oliva
  • Sal

Para o adubo

  • Unhas pólas de Perexil
  • 3 dentes de allo

Para o prebe

  • 25 g de queixo azul
  • 20 g de manteiga de leite
  • 250 g de nata de montar
  • Pementa moída

 

Preparación:

  1. En primeiras preparámo-la carne sacándolle cun coitelo moi ben afiado a tea que o cobre por unha das partes.
  2. Preparámo-las verduras e para iso cortámo-las cenorias en rodas, o cabaciño en anacos medianos, os pementos en bastóns, as cebolas en anacos medianos e as patacas pelámolas e cortámolas en cuartos.
  3. Acendémo-lo forno a 200ºC para que vaia quecendo.
  4. Logo diso machucámo-lo perexil xunto co sal e o allo e con iso adubámola carne.
  5. Deseguido, selámola nunha tixola grande cuns 100 ml de aceite de oliva.
  6. Cando a carne estea selada, colocámola na bandexa do forno.
  7. Logo diso, metémo-las verduras na tixola e refogámolas xunto coas patacas.
  8. Botamos agora as verduras xunto coas patacas na bandexa ó redor da carne, empoámolo todo cun chisco de sal e pementa moída; regámolo co brandy, o vinagre, o viño branco máis os 300 ml de caldo de osos e metémo-lo ó forno polo decurso duns 50-60 minutos. Vixiade que non se vos queime se así fora póndelle un papel de aluminio por enriba.
  9. Entrementres asa a vitela, facémo-lo prebe e para iso desfacemos o queixo nunha tixola cuns 20 g de manteiga, logo diso engadímola nata e empoámolo coa pementa moída, ó noso gusto, e deixamos que espese un chico.
  10. O sacala do forno cortámo-la peza en rebandas e servímola coas verduras acompañada co prebe para que cada quen se sirva.

 

Nota:

  • A “espaldilla” e un corte de carne que se atopa na parte alta da pa ou omoplata da res.
  • Un truco para que non seque e meter unha cunca con auga no forno para que deprenda vapor.

 

Tempo: 80 minutos                                                   Comensais: 6 persoas

Coello con castañas

 

Ingredientes:

  • 1 coello
  • 20 castañas cocidas
  • 12 albaricoques secos
  • 1 cebola
  • 1 pemento verde italiano ( 50 g)
  • 2 tomates ben maduriños e pelados
  • 2 cenorias
  • 100 g de touciño entrefebrado
  • Caldo de carne
  • 100 ml de brandy
  • 200 ml de viño branco
  • 2 dentes de allo
  • Perexil
  • Tomiño
  • Aceite e sal

 

Preparación:

  1. En primeiras botamos nunha cunca os albaricoques secos e pómolos a remollo co brandy.
  2. Machucamos allo con perexil e sal e adubámo-lo coello cortado en talladas grandiñas.
  3. Nunha cazarola baixa e ampla con aceite engadímo-las talladas de coello e dourámolo. Cando estea afastámolo da cazarola e reservámolo
  4. Na mesma cazarola engadimos agora a cebola mailo pemento en xuliana, as cenorias picadas xunto co touciño cortado en bastonciños e facémolos a fogo maino En canto estea branda e algo dourada a cebola engadímo-los tomates relados.
  5. Logo dun par de minutos engadímo-lo coello reservado, un pouco de tomiño, o brandy de remolla-los albaricoques, o viño branco e deixamos que evapore o alcohol. Logo botamos caldo de carne ata case cubrilo e deixamos que guise todo xunto uns 25 minutos ou ata que o coello estea feito.
  6. Cinco minutos antes de rematar co guiso engadímo-las castañas mailos albaricoques.
  7. Levámolo á mesa nunha bandexa alongada adornando coas castañas e os albaricoques polo redor.

 

 

Tempo: 60 minutos                                                  Comensais: 4

Albóndegas con ovos agochados

 

Ingredientes:

Para as albóndegas

  • 8 ovos
  • 400 g de carne picada de porco
  • 1 cebola nova (100g)
  • 1 allo porro, a parte branca
  • 1 dente de allo
  • 1 cullerada de perexil picado
  • 1 ovo
  • Pementa branca
  • Fariña, ovo e pan relado para rebozar
  • Aceite de oliva e sal

 

Para o prebe:

  • 1 cebola grande (300g)
  • 1 pemento verde italiano (100g)
  • ½ pemento vermello (150g)
  • 1 allo porro, a parte verde
  • 1 cenoria
  • 2 culleradas de tomate fritido
  • Caldo de carne

 

 

 

Elaboración:

  1. Pomos a cocer os ovos en auga con sal polo decurso duns 8 minutos; logo diso arrefriámolos, sacámoslles a casca e reservámolos.
  2. Namentres, picamos miudiños a cebola nova mailo allo porro e amolecémolos nunha tixola cun fondo de aceite e un chisco de sal.
  3. Logo diso mesturámolos coa carne picada mailo allo sen o xermolo para que non repita mailo perexil moi picadiños, o ovo batido, o sal necesario, pementa ó gusto e amasamos coas mans ben limpas.
  4. Afastamos uns 50 g desta mestura e co resto facemos 16 partes iguais.
  5. Cortámo-los ovos pola metade ó longo, sacámoslle a xema, mesturámola cos 50 g de carne afastada e reenchemos os ocos dos ovos.
  6. Esmagamos os 16 anacos de carne picada que temos reservados, facemos obleas redondas coas que envolvemos os ovos reenchidos e facemos 16 albóndegas
  7. Rebozámolas en fariña, e ovo e fritímolas en aceite ben quente; logo diso botarémoslles o prebe que faremos despois e deixarémolas cocer nel durante uns 5 minutos.
  8. Para facer o prebe, amolecemos, nuns 50 ml do mesmo aceite de fritirmos as albóndegas, a cebola, os pementos verde e vermello, a cenoria e a parte verde do allo porro, todos eles picados; cando estean moles, engadímo-lo tomate mailo caldo e deixamos cocer durante uns 15 minutos; logo diso triturámolo e botámolo nas albóndegas cos ovos agochados. Deixamos que cozan xuntos uns 2 minutos.

 

Nota:

  • Se o prebe ficara pouco espeso podemos espesalo desfacendo maicena en aceite e engadirlla  ó prebe. Tamén podemos botar, sempre coada, fariña desfeita en auga fría.
  • O mellor é comelas logo de darlles unhas horas ou ata 1 día de repouso.
  • Tamén podemos trocar o prebe por unha fritada de cebola e pemento verde italiano cortado en tiras e pemento vermello asado, tamén en tiras e algo de tomate fritido

 

 

  • Tempo: 50 minutos                                       Comensais: 4 persoas

Albóndegas con ovos agochados

 

Ingredientes:

Para as albóndegas

  • 8 ovos
  • 400 g de carne picada de porco
  • 1 cebola nova (100g)
  • 1 allo porro, a parte branca
  • 1 dente de allo
  • 1 cullerada de perexil picado
  • 1 ovo
  • Pementa branca
  • Fariña, ovo e pan relado para rebozar
  • Aceite de oliva e sal

Para o prebe:

  • 1 cebola grande (300g)
  • 1 pemento verde italiano (100g)
  • ½ pemento vermello (150g)
  • 1 allo porro, a parte verde
  • 1 cenoria
  • 2 culleradas de tomate fritido
  • Caldo de carne

Elaboración:

  1. Pomos a cocer os ovos en auga con sal polo decurso duns 8 minutos; logo diso arrefriámolos, sacámoslles a casca e reservámolos.
  2. Namentres, picamos miudiños a cebola nova mailo allo porro e amolecémolos nunha tixola cun fondo de aceite e un chisco de sal.
  3. Logo diso mesturámolos coa carne picada mailo allo sen o xermolo para que non repita mailo perexil moi picadiños, o ovo batido, o sal necesario, pementa ó gusto e amasamos coas mans ben limpas.
  4. Afastamos uns 50 g desta mestura e co resto facemos 16 partes iguais.
  5. Cortámo-los ovos pola metade ó longo, sacámoslle a xema, mesturámola cos 50 g de carne afastada e reenchemos os ocos dos ovos.
  6. Esmagamos os 16 anacos de carne picada que temos reservados, facemos obleas redondas coas que envolvemos os ovos reenchidos e facemos 16 albóndegas
  7. Rebozámolas en fariña, e ovo e fritímolas en aceite ben quente; logo diso botarémoslles o prebe que faremos despois e deixarémolas cocer nel durante uns 5 minutos.
  8. Para facer o prebe, amolecemos, nuns 50 ml do mesmo aceite de fritirmos as albóndegas, a cebola, os pementos verde e vermello, a cenoria e a parte verde do allo porro, todos eles picados; cando estean moles, engadímo-lo tomate mailo caldo e deixamos cocer durante uns 15 minutos; logo diso triturámolo e botámolo nas albóndegas cos ovos agochados

 

Nota:

  • Se o prebe ficara pouco espeso podemos espesalo desfacendo maicena en aceite e engadirlla coada ó prebe. Tamén podemos botar, sempre coada, fariña desfeita en auga fría.
  • O mellor é comelas logo de darlles unhas horas ou ata 1 día de repouso.
  • Tamén podemos trocar o prebe por unha fritada de cebola e pemento verde italiano cortado en tiras e pemento vermello asado, tamén en tiras e algo de tomate fritido

 

Tempo: 50 minutos                                       Comensais: 4

Ás de polo escabechadas con verduras

 

Ingredientes:

  • 12 ás de polo
  • 3 allos porros, só o branco
  • 2 cenorias
  • 100 g. de feixón verde
  • ½ cabaciño
  • 1 berenxena
  • 1 mañuzo de espárragos trigueiros
  • ½ cebola nova
  • 2 dentes de allo
  • 250 ml. de viño branco
  • 200 ml. de vinagre branco
  • 2 follas de loureiro
  • 2 pólas de tomiño
  • 1 culleradiña de pemento doce
  • Aceite de oliva, pementa en gran e sal

 

Preparación:

  1. Limpámo-las ás sacándolles as plumas mailas puntas e cortámolas pola xuntura.
  2. Empoamos con sal e pementa e fritímolas nunha boa cantidade de aceite ata que douren un chisco por fora
  3. Segundo vaiamos fritindo ímolas pasando a unha cazarola, á que lle engadímo-las follas de loureiro, as poliñas de tomiño, a cebola nova en xuliana, o viño, o vinagre, pementa, un chisco de sal, o pemento doce, máis unhas 5 culleradas de aceite limpo e deixámolo cocer todo xunto uns 30 minutos.
  4. Entanto fritímo-las ás, cortámo-las berenxena en rodas, que pomos con sal para que perda auga, o cabaciño en bastóns; o allo porro, as cenorias, mailos feixóns, en xuliana, sacámoslle ós espárragos a parte dura e para iso collémo-los espárragos polo pé e da metade ó mesmo tempo que dobramos para que rompan polo tenro; se fican longos cortámolos pola metade.
  5. Nunha tixola salteámo-las verduras cortadas sen xuliana ou en bastóns uns minutos; a berenxena facémola ó último á prancha, para darlle tempo a que perda toda a auga posible. Tódalas verduras teñen que quedar algo tenras.
  6. Montámo-los pratos pondo nunha banda os espárragos trigueiros e unhas rodas de berenxena; pola outra e montando un chisco por riba delas as ás escabechadas sen mollo e a un lado un montonciño de verduras variadas.

 

Notas:

  • As ás ó fritilas salpican dabondo e para evitalo ou que salpique menos podemos envorcalas nunha pouca fariña.

 

 

Tempo: 45 minutos

Comensais: 4

Costeletas con guarnición


Ingredientes:

  • 4 costeletas grandes de vitela (1/2 Kg ou máis cada unha)
  • 400 gr. de feixóns verdes
  • 400 gr. de chícharos frescos
  • 2 cebolas
  • 2 dentes de allo
  • 2 cenorias
  • ½ vaso de viño branco
  • Aceite de oliva virxe extra
  • Sal mariño ou sal Maldon

Descrición:

  1. Picámo-las cebolas e os dentes de allo finamente e pómolos a refogar nunha cazola ancha cun pouco de aceite.
  2. Pelámo-las cenorias e cortámolas en rodas finas; despois de engadilas, refogamos un chisco e botámo-los os chícharos  e os feixóns.
  3. Vertemos un pouco de viño branco e cociñámolo todo durante 15-20 minutos máis.
  4. Quentamos ben a placa da cociña (mellor sería facelas a grella cunhas boas brasas, se non temos facémola a prancha nunha tixola a fogo forte e con pouco aceite)  e pomos enriba as costeletas. Teñen que quedar algo torradas polas dúas caras pero no punto de feitura desexado.
  5. Cando estea feita, sacámoslle o óso e cortámola en anacos grandes.
  6. Esparexemos  sal groso por riba e servímolas nos pratos quentados no forno.
  7. Acompañámo-la  costeleta coa guarnición de verduras

Notas:

  • Hai uns pratos de barro grosos (uns 2 cm) e chairos que se quentan no forno e se poñen no centro da mesa diante dos comensais que serven como asador se a carne quedou pouco feita As costeletas sérvese nese prato  e a guarnición no prato normal. A xente corta a carne e se está pouco feita déixaa que se faga máis no prato de barro e cómea ó seu gusto.
  • As costeletas tamén se poden acompañar cunha boa ensalada de leituga tomate e cebola e unhas patacas fritidas.
  • Se coidas que  a carne vai quedar dura, fai primeiro unha mestura de aceite e vinagre a partes iguais, mollas a carne nela e déixala repousar dúas horas, Non teñas medo, non dará ó  vinagre.

Tempo: 30 minutos

Comensais: 4 persoas

Caldeirada de año

Ingredientes:

  • 1 ½ Kg de año
  • 2 cebola
  • 2 cenoria
  • 1 porro ( só o branco)
  • 3 dentes de allo
  • ½ vaso de viño branco
  • 4 pementos chouriceiros secos
  • 2 tomates maduros
  • 3 patacas medianas
  • Pementa negra
  • Aceite
  • Sal

Descrición:

  1. Cortámo-lo o año en anacos e botámolo nunha pota ampla con 6 culleres de aceite quente para dourar e sela-la carne.
  2. Engadímo-la cebola, o porro mailos allos picados miúdo, a cenoria cortada en rodiñas, o viño branco e deixamos que coza.
  3. Namentres sacámoslle o miolo ós pementos secos que puxemos a remollo en auga quente 1 hora antes, esmiuzámolo e de seguido botámosllo ó año xunto co tomate picado, pelado e sen pebidas.
  4. Botámoslle auga xusto a cubrir, salgamos, engadimos a pementa moída ó gusto e cociñamos tapado a fogo medio ata que estea feito, remexendo de cando en vez para que non se apegue pero que tampouco se desfaga. Estar ó tanto para que non quede sen caldo.
  5. Pelámo-las patacas, cortámolas en tacos de 2×2 cm. que salgamos e fritimos en abondoso aceite quente.
  6. Cando estean fritidas engadímolas ó año cando estea a piques de rematar o guiso.

Tempo: 1 hora

Comensais: 4

Polo á prancha con prebe de iogur

Ingredientes:

  • 4 coxas

Para o prebe

  • 3 iogures de leite enteiro
  • 2 culleres de perexil picado
  • ½ culler de pemento doce
  • 125 g de queixo azul

Descrición:

  1. Pomos tódolos ingredientes do prebe nun vaso do batedoiro agás o perexil que pomos a metade e triturámolo todo ata mesturalo ben.
  2. Pasámolo a unha cunca e reservamos. Sacámoslles os osos as coxas ou mandámosllo facer ó carniceiro se nós non sabemos.
  3. Salgamos un chisco e facémolas a prancha polo decurso de 4 minutos por cadanseu lado.
  4. Servímolas nos pratos con un pouco de prebe por riba e a maior parte pómola a un lado para ir untando segundo comemos. Adornamos cun chisco de perexil, picadiño miúdo, por riba do prebe.

Tempo: 30 minutos

Comensais: 4 persoas

Capón de Vilalba en pepitoria

Ingredientes:

  • 1 capón en anacos
  • Fariña
  • 2 cebolas
  • 1 porro (a parte branca)
  • 2 cenorias
  • 2 dentes de allo
  • 20 améndoas crus
  • 1 culler de piñóns
  • 1 vaso grande de viño branco
  • Caldo de ave
  • Azafrán
  • Perexil
  • 3 xemas de ovo cocido
  • Aceite
  • Sal

Descrición:

1        Salgámo-los anacos de capón, envolvémolos en fariña e fritímolos nunha tixola en abundante aceite quente. Logo de fritilos pasámolos a unha pota con testo.

2        Sacamos parte do aceite da tixola e botamos nela a cebola, a cenoria, o porro, o perexil mailo allo picados e deixamos facer ata que estean brandos. Logo engadímolos á pota co capón.

3        Torramos un chisco as améndoa os piñóns mailo azafrán , pasámolos polo morteiro e engadímolos tamén á pota.

4        Botámo-lo viño branco e deixamos a cocer uns minutos, antes de engadírmo-lo caldo, xusto ata cubrir

5        Deixamos cocer todo a fogo baixo, co testo posta para que non evapore, polo decurso de 1 hora ou ata que o capón estea tenro.

6        Sacámo-las talladas, engadímo-las xemas, triturámo-la salsa e coámola cun chino ou un coador de arame.

7        Engadimos de novo as talladas e deixamos cocer un chisco, remexendo, ata que espese a salsa.

Tempo: 90 minutos

Comensais: 4

Receita: Carne ó caldeiro

Ingredientes

  • 2 kg de carne de pote (faldra sen costela)
  • 8 patacas
  • 100gr de unto
  • 1 dente de allo
  • Pemento doce ou picante
  • Sal mariño

Descrición

  1. Cortámola carne en anacos grandes, (aprox. 100 gr.) e metémolos nunha pota grande con auga, o unto, un pouco de sal mariño e pómolo a cocer de vagar.
  2. Cando a carne estea case cocida (picámola cun garfo para sabelo), engadímolas patacas peladas e cortadas en cachelos (ó través en anacos grandes) e deixámolas ferver. Con 20 minutos teñen dabondo para estaren cocidas.
  3. Escoamos todo e botámolo nunha fonte, esparexemos pemento por riba, un dente de allo picado miúdo, un pouco de sal groso e regámolo con aceite cru.
  4. Servímolo quente

Notas

 Se ó cocela carne non temos unto podemos botar manteiga de porco ou touciño branco curado. Non sabe igual pero…

Duración: 80 minutos

Comensales: 8 persoas

Recipe by on.
Microformatting by hRecipe.

Páxina seguinte »