Archive for Xuño 27th, 2015

Conserva de bonito do norte

Ingredientes:
• Un bo bonito do norte de 5 kg ou máis
• Aceite de oliva suave
• Sal

Preparación:
1. Sacámoslle a cola xunto con 10-12 cm de carne que logo aproveitaremos para facer unha marmita con patacas. Sacámoslle tamén a ventrecha, e o resto cortámolos en toros dun groso equivalente a altura do tarro de cristal onde o imos meter para conservar.
2. Nunha ola metémo-los toros de bonito, cubrímolos con auga botando unha culler de sal por litro de auga e cocémolos polo decurso de 2 horas, fervendo moi amodiño.
3. Afastámo-los toros e deixámolos arrefriar para poderlles sacar a pel, as espiñas e a parte negra da carne sen esmigallalos.
4. Cun coitelo moi ben afiado facemos anacos alongados de xeito que os podamos manexar ben, para metelos no tarro onde xa lle poramos un chisco de aceite cubrindo o fondo.
5. Enchémo-los tarros con aceite, deixando a parte do colo ceibe, e tapámolos enroscando forte a tapa.
6. Seguido pómolos a esterilizar ó baño maría uns 50 minutos se o facemos nunha ola con tapa; nas olas rápidas o tempo e menor; entre 15 e 25 minutos segundo a clase de ola.
7. Lavámolos e témolos 24 horas boca abaixo sobre un cartón ou papel para ver se perden. Se perderan podemos conservalos na neveira uns días antes de consumilos axiña ou conxelalos.
8. Deixámolos entre 4 a 6 meses de maduración antes de comezar a gastalos.
Notas:
• Esta é a receita clásica que fan nas conserveiras pero podes facelo metendo o bonito limpo sen pel nin arganas e salgado nos tarros con aceite e logo esterilizalos ó baño maría. Inconveniente: a presenza dos tarros non é tan limpa, quedando unha capa de aceite, outra de zumes naturais do bonito e unha especie de burbullas apegadas por fora que son a sangue que zumega ó cocelo. Vantaxe: é máis rápido e o bonito queda menos seco.
• A ventrecha pódese consumir asada, a prancha etc. ou tamén en conserva.

Empanadillas de bonito e ovo

Ingredientes:
Para a masa:
• 100 g de fariña triga
• 2 culleradas de aceite
• 125 ml de auga
• 1 ovo tamaño pequeno
• 1 chisco de sal
Para o recheo:
• ½ cebola
• 1 dente de allo
• 1 ovos cocidos
• 1 pemento italiano verde
• 100 g de bonito en aceite
• 4 culleradas de tomate fritido
• Sal
• Aceite de oliva, para fritilas

Preparación:
1. Facémo-la masa. Nunha cazarola quentámo-la auga xunto co aceite e o sal; cando ferva afastámola do lume, engadímoslle a fariña e remexemos con forza ata que estea ben mesturado todo.
2. Botámo-lo ovo e incorporámolo á masa .
3. Pasámolo a unha cunca enfariñada e logo de tapalo cun pano húmido deixámolo repousando na neveira un par de horas.
4. Pasado o tempo botámo-la masa sobre o mesado enfariñado e estendémolo cun rolo ata deixalo cuns 2 milímetros de groso.
5. Cortámo-la masa cun corta pastas redondo, cun vaso grande ou mesmo cunha cunca
6. Facémo-lo recheo. Picámo-la cebola mailo allo e amolecémolos tapados nunha tixola, a lume maino, con 3 culleradas do aceite do bonito. Cando estea mol engadímo-los pementos picados e deixamos facer uns 5 minutos máis. Afastámolo do lume, pomos no punto de sal e deixámolo arrefriar
7. Cando estea frío, engadímoslle o ovo picado, o bonito esmigallado, o tomate fritido e mesturámolo todo.
8. Facémo-las empanadillas pondo unha culleradiña do recheo nas obleas e, logo de dobralas pola metade, cerrámolas premendo cun garfo ó redor.
9. Fritímo-las empanadillas en aceite ben quente e o sacalas pousámolas sobre un papel absorbente para que perdan o aceite que arrastran

Notas:
• Podes mercar obleas na tenda se non queres facer ti a masa
• Tamén podemos pintalas con ovo batido e facelas ó forno uns 10 minutos a 190 º C ata que douren

Tempo: 20 minutos sen contar o repouso da masa
Comensais: 4

Rolo de bonito fresco

Ingredientes:
• 1 kg de bonito do norte fresco
• 2 ovos cocido
• 1 pemento vermello asado
• 1 cebola nova
• 2 dente de allo
• Miolo de pan
• 2-3 ovos
• Leite
• Perexil
• Aceite de oliva e sal
• Fariña e ovo para rebozar
Para o prebe:
• 2 cebolas
• 1 folla de loureiro
• 2 pementos secos
• 4 dentes de allo
• 1 ½ vaso de caldo de peixe
• 1 vaso de viño branco
• 1 cullerada colme de fariña
• Aceite de oliva e sal

Preparación:
1. Limpámo-lo bonito sacándolle a pel, as arganas e cortámolo miudiño cun coitelo moi afiado.
2. Pomos de mollo os pementos en auga ben quente uns 20 minutos e sacámoslle o miolo.
3. Facémolo prebe e para iso pomos a amolecer nunha tixola con aceite a cebola xunto cos dentes de allo, a polpa dos pementos, sal e a folla de loureiro.
4. Cando a cebola estea mol engadímoslle o viño branco e deixamos facer ata que a cebola estea ben feita. Cando estea consumido case todo o viño, engadímoslle a fariña e o caldo de peixe, que podemos facer coas espiñas e a pel do bonito. Deixamos facer ata que espese un chisco. Triturámolo e reservámolo.
5. Entanto facémolo prebe, botamos nunha cazarola fonda o bonito picado xunto coa cebola amolecida nun chisco de aceite, o dente de allo, os ovos cocidos, o pemento asado, o perexil, todos eles moi picados e o miolo de pan, mollado en leite esmigallado.
6. Imos botándolle á masa os ovos crus incorporándoos un a un e so os que admita.
7. Logo de mesturalo ben facemos 2 rolos que rebozamos con fariña, ovo batido e fritimos en abondoso aceite ben quente
8. Botámo-lo prebe nunha cazarola, quentámolo a fogo maino e pomos nel os rolos de bonito que deixaremos ferver a fogo maino co testo posto para que se fagan por tódolos lado uns 3-5 minutos. Deixamos repousar uns 5 minutos máis fora xa do lume.
9. Para que non esmigallen ó cortalos deixámolos arrefriar e cortámolos en toros duns 2 cm. de groso e servímolos regados co prebe.

Nota:
• O rolo non hai que cocelo moito no prebe, pois se nos pasamos queda seco
• Podemos acompañar o rolo con mazás reinetas peladas, sen carozo, cortadas pola metade e escaldadas uns 2 minutos en auga.

Tempo: 60 minutos
Comensais: 4 ou máis

Albóndegas de bonito fresco

Ingredientes:
Para as albóndegas:
• 700 g de bonito
• 1 cebola nova
• 1 rebanda de pan reseso
• Leite gordo
• 2-3 ovos
• Perexil
• Aceite de oliva e sal
• Fariña e ovo para rebozar
Para o prebe:
• 1 cebola
• 2 dentes de allo
• 3 pementos secos
• 1 tomate maduro
• 2 vasos de caldo de peixe
• Aceite de oliva e sal

Preparación:
1. Facémolas albóndega e para iso comezamos pondo o pan a remollo en leite
2. Amolecémola cebola e o allo nunha tixola con aceite ata que esta un pouco branda. Reservamos.
3. Entanto, sacámoslle ó bonito a pel, as arganas e picamos miúdo a carne.
4. Nunha cunca botámolo bonito picado, o pan escoado, o perexil os ovos maila cebola reservada, mesturámolo todo e pómolo no seu punto de sal.
5. Facémo-las albóndegas e logo de pasalas por fariña e ovo, fritímolas en abondoso aceite quente.
6. Deixámolas escoar sobre papel de cociña e reservámolas nunha tarteira.
7. Facémo-lo prebe. Comezamos pondo a remollo, en auga ben quente, os pementos secos durante uns 20 minutos. pasado o tempo sacámoslle a polpa cun coitelo e reservámola.
8. Entanto, amolecémola cebola picada xunto co mallo e cando estea branda engadímoslle o tomate en anacos e deixamos facerse xuntos uns minutos; logo botámoslle o caldo maila polpa reservada e deixamos que ferva uns 15 minutos.
9. Pasado o tempo triturámolo, pómolo no seu punto de sal e pasámolo polo chino.
10. Botamos o prebe quente por cima das albóndegas e logo de que ferva un minuto apagámolo lume e deixamos repousar outros 5 minutos máis antes de servilas

Nota:
• Quen di bonito, di tamén atún, pescada, xurelo, cabala, etc

Tempo: 40 minutos
Comensais: 4 ou máis

Bonito con prebe negro e luras

Ingredientes:
• 2 toros de bonito (500 g)
• 500 g de luras pequenas (8 luras)
• Fariña
• Ovo
• Aceite de oliva e sal
Para o prebe:
• 3 cebolas
• 1 pemento verde
• 2 dentes de allo
• 1 tomate maduro
• ½ vaso de viño branco
• 3sobres de borra de cefalópodos
• 1 culler de fariña
• Aceite de oliva e sal

Preparación:
1. Limpamos ben a luras separando os corpos das cabezas. Sacámoslles a pel de fora e as tripas maila pluma e logo de darlles a volta limpamos ben o de dentro. Hai que sacarlles ás cabezas a parte dos ollos mailo pico e limpar ben os tentáculos, que metemos dentro do corpo. Reservamos
2. Facémo-lo prebe: Pomos nunha cazarola con aceite a cebola, o pemento mailo allo limpos e picados en xuliana, xunto o tomate pelado e sen pebidas.
3. Pomos enriba as luras recheas e logo de engadir o viño branco, tapamos e cociñamos a fogo medio uns 40 minutos. Remexemos con xeito de cando en vez.
4. Pasado este tempo sacámo-las luras e engadímo-los sobres de borra, mesturados nun vaso cunha culler de fariña e algo de auga, e deixamos cociñar uns 3 minutos máis.
5. Triturámolo co batedor eléctrico e pómolo no seu punto de sal. Reservámolo
6. Sacámoslle a pel, as arganas maila parte negra ó bonito e facemos 4 partes de cada roda. Salgámolos e logo de rebozalos en fariña e ovo fritímolos en aceite un minuto por cada lado.
7. Metémo-lo bonito mailas luras no prebe e deixamos ferver uns 2-3 minutos.
8. Deixémolo repousar uns 15 minutos para que se vai facendo por dentro antes de servilo e non estea cru.

Nota:
• O bonito ó fritilo queda cru por dentro, pero logo ó cocelo no prebe e repousar, o calor vaino pasando e queda feito. Se o fritimos moito para que se faga por dentro logo queda seco e áspero ó comer.

Tempo: 60 minutos
Comensais: 4