A Biblioteca de Fillos de Galicia

Torta de flan

Ingredientes:

• 3 ovos
• 375 g de azucre
• 100 g de fariña
• 1 sobre de flan
• ½ l de leite

Descrición:

1. Batemos ben o azucre mailos ovos cun garfo ou un batedor de variñas.
2. Engadímoslles logo a fariña, o sobre de flan mailo leite.
3. Mesturamos ben, pero devagar, tódolos ingredientes con movementos envolventes de abaixo a arriba.
4. Vertémo-la mestura nun molde baixo e redondo engraxado e enfariñado.
5. Metémolo ó forno a 150 ºC polo decurso de 30 minutos. Probamos que estea feito antes de sacalo
6. Despois de sacalo e antes de servilo frío decóramolo facendo uns cordóns con canela a xeito de rede de rombos.

Tempo: 45 minutos

Comensais: Varios

Roscón con iogur sabor limón

Ingredientes

• 5 Ovos
• 1 Iogur de limón
• ½ limón (o relado)
• 3 vasos  de fariña (vasos do iogur)
• 3 vasos de azucre  (vasos do iogur)
• 1 vasos de aceite (vasos do iogur)
• 1 sobre de fermento en po

Descrición:

1. Primeiro afastámo-las claras das xemas.
2. Batémo-las claras a punto de neve, xunto co  azucre, nun recipiente cun batedor de variñas ou eléctrico. Para sabermos se as claras están a punto de neve dámoslle a volta ao recipiente e se non caen están ben e senón hai que seguir batendo ata logralo
3. Noutro recipiente batémo-las xemas ben batidas.
4. Logo disto engadímo-las claras batidas,as xemas, o iogur, o azucre mailo fermento e a fariña peneirados cun coador de arame e o aceite, mesturándoo todo devagar con movementos envolventes da arriba a abaixo.
5. Botámo-la mestura nun molde de roscón (redondo con burato no medio) engraxado e enfariñado para que non se apegue
6. Metémolo no forno, xa aquecido, a 170º C durante unha hora e media. Ó pasar ese tempo picámolo cun escarvadentes ou unha agulla da calceta se saen limpos xa está, mais se non, deixámolo no forno un cuarto de hora máis.

Tempo: 2 horas

Comensais: Varios

Patacas ó xeito do Cebreiro

Ingredientes:

• 1 Kg de patacas de tamaño medio
• 300g. de queixo fresco
• ¾  l de leite
• 3 ovos
• 20g. de manteiga de leite
• Sal
• Pementa negra moída

Descrición:

1. Lavámo-las patacas e pómolas a cocer coa pel en auga con sal.
2. Pasados uns 20 minutos, escoámolas arrefriámolas e pelámolas.
3. Cotámolas en rodas e sazonámolas con pementa moída.
4. Engraxamos unha fonte de forno coa manteiga e imos pondo nela capa de patacas e capa de queixo fresco rematando con patacas.
5. Batémolos ovos, engadímosllo leite cun  chisco de sal e botámolo por riba das patacas da fonte.
6. Metémolo ó forno quente a 170 ºC ata que calle o ovo e  doure a superficie.

Tempo: 30 minutos

Comensais: 4

Centola

Ingredientes

• 1 Centola
• Auga do mar
• 2 follas de loureiro

Descrición:

1. Para cocermos a centola metémola viva nunha pota con auga fría mailo loureiro (se a temos man empregaremos auga do mar, senón, auga con sal mariño; 25 gramos por litro, 1 culler ben chea por litro de auga).
2. Se a centola está ou morta ou conxelada metémola directamente en auga fervente. Aconsello empregar centolas vivas.
3. Pómo-la pota a lume forte e cando empece a ferver contamos 15 minutos para unha centola mediana e entre 18-20 minutos para unha grande.
4. Sacámo-la da pota, e deixámola arrefriar ben en auga salgada (25g./litro) con xeo denantes de servila.

Notas:

• Vai moi ben acompañada dun bo Albariño, mais, senón temos, un bo viño branco da terra tamén lle vai ben
• Segundo o refraneiro galego a centola hai que comela nos meses do “R” que é cando están máis cheas e saborosas; aínda mellor femia que macho pois aparte de estar máis chea, se cadra pode que teña as ovas; estas son moi gorentosas.

Outro xeito de preparala

1. Toda vez cocida e fría, abrímo-la centola e pomos no prato, sobre unha cama de leituga ou escarola,a cuncha e as patas escachadas ó redor.
2. Dentro da cuncha pómo-las ovas mailos zumes, os restos que fican na cuncha e a carne do corpo esmiuzada e mesturado todo cunha vinagreta feita con:
   • 1 culler pequena de vinagre
   • 2 culleres de aceite de oliva
   • 1 anaquiño de pemento vermello
   • 1 anaquiño de pemento verde
   • ¼ de cebola de ensalada moi picada
   • 1 ovo cocido picado
   • 2 culleres de viño branco.

Comensais: 2 persoas

Tempo: 1 hora

Pudin de mazás e galletas de améndoas

Ingredientes:

• 200 g. de galletas de améndoas
• 100 ml. (½ vaso)de café feito
• 2 culleradas de pan relado
• 3 culleres de mel
• 50 ml. de viño doce (mistela, oporto,etc)
• 2 mazás
• 4 ovos
• Nata montada
• 3 culleres de bagos pasos (sen pebidas)
• 2 culleres de cacao en po
• Manteiga de leite
• Pan relado

Descrición:

1. Pómolos bagos a remollo en auga  morna polo decurso de 1 hora
2. Desfacemos coa man as galletas de améndoas (non deixalas moi moídas) e botámolas nunha cunca fonda
3. Engadímoslle o café, o viño, o pan relado mailo mel e mesturamos.
4. Batémo-los ovos e engadímolos
5. Pelámo-las mazás; logo de relalas cun relador groso engadímolas ó resto e mesturamos todo
6. Untamos con manteiga un molde alongado (tipo cake) e empoámolo con pan relado.
7. Botamos dentro a mestura anterior e tapámolo con papel de aluminio.
8. Metémolo no forno quente a 110ºC polo decurso de 45 minutos ou a 170ºC pero ó baño maría.
9. Sacámolo do forno deixámolo arrefriar; cando estea frío quitámolo do molde.
10. Cortámolo en rebandadas de uns 2cm. de groso e presentámolas nos pratos con nata montada por riba coroada cos bagos  e empoada (coa axuda dun coador) con cacao en po e acompañadas con chocolate quente.

Tempo: 1 hora

Comensais: 4

Sopa de champiñóns e orella de porco

Ingredientes:

• 1 bandexa de champiñóns (250g)
• 1,5 litros de caldo de carne
• 1 cebola mediana
• 1 dente de allo
• Pan para fritir
• 1 orella de porco
• Aceite
• Sal

Descrición:

1. Nunha pota con aceite botámo-la cebola mailo allo picados miúdos e deixámolos amolecer uns 5 minutos a fogo suave.
2. Engadímosllos champiñóns limpos e esnacados, deixamos que se fagan un pouco, logo engadímolo caldo de carne e deixamos que se fagan xunto coa cebola.
3. Triturámolo todo, coamos e pomos a punto de sal.
4. Cocémola orella e cortámola, tamén en cadradiños e reservamos.
5. Cortámo-lo pan en cadradiños, fritímolo en aceite e escorremos en papel de cociña.
6. Servírmolo botando nos pratos cadanseus anacos de orella e uns cazos de sopa
7. Enriba desta botamos un fío de aceite cru para adornar.
8. Acompañamos en pratiño aparte os anacos de pan fritidos para que o comensal os bote por riba da sopa no intre de degustala..

Notas:

• A orella podémola mercar  crúa ou salgada  e cocela logo aparte ou podes mercar orella que ven cocida e prensada en bloques coma friame.
• O caldo de carne podémolo facer con carne de vacún ou de polo
• Os cogomelos axeitados para este prato poden seren champiñóns, seta ostreira, boletos, níscaros, etc. Segundo sexa a variedade de cogomelo será ou seu sabor.

Tempo: 20 minutos

Comensais: 4

Galletas de améndoas e noces

Ingredientes:

Para a base

• 100 g. de fariña
• 100 g. de noces moídas
• 1 ovo
• 100 g. de azucre
• 20 g. de fermento do pan
• 1 vaso de leite
• Sal

Para pór enriba

• 100 g de biscoitos de “soletilla” desfeitos
• 100 g. de améndoas moídas
• 1 xema de ovo
• 50 g. de fariña de millo (maizena)
• Azucre moído
• Canela en po

Descrición:

1. Facemos unha masa mai: desfacémolo fermento en algo de leite e botámoslle un pouco de fariña máis outro de azucre ata ter unha masa de consistencia normal. Deixamos levedar nun sitio morno.
2. Mesturámo-la  fariña restante coa masa xa levedada, engadímoslle o ovo, o azucre restante, as noces moídas e amasamos, botándolle auga se cómpre, ata que a masa non se apegue as mans. Deixamos levedar ½ hora.
3. Namentres, mesturámo-los biscoitos, as améndoas, a maizena maila xema e amasámolos, se cómpre bótaselle algo de leite ou auga para ter unha masa só un pouco espesa Collemos agora a masa levedada e estirámola cun rolo ata deixala de 1 cm. de groso aproximadamente e cun vaso imos cortando círculos (7 cm. de diámetro aprox.).
4. Enriba de estes círculos pomos un montonciño de biscoitos e améndoas.
5. Pómolas galletas nunha bandexa de forno engraxada e deixamos fermentar de novo. (½ hora)
6. Metémolas galletas ó forno quente a 180ºC polo decurso de 20 minutos
7. Ó sacalas do forno empoámolas con azucre moído mesturado coa canela.

Tempo: 1 hora

Comensais: 4 ou máis

Xoubas guisadas

Ingredientes:

• 1 Kg. de xoubas
• 2 pementos verdes
• 3 cebolas
• 2 dentes de allo
• 2 Kg de patacas
• Caldo de peixe (de cocer mexillóns, ameixas, etc.)
• Aceite
• Sal
• 2 pementos vermellos secos
• 1 pola de perexil

Descrición:

1. Pomos a amolecelos pementos secos en auga quente uns 15-20 minutos; pasado ese tempo sacámoslles o miolo cun coitelo e desfacémolo ben.
2. Picámola cebola, o pemento verde mailo allo e amolecémolos un pouco nunha tixola con medio vaso aceite. Engadimos cara o final o miolo do pemento e  o perexil picado; pomos a punto de sal.
3. Nunha bandexa de asar, imos dispondo unha capa de verduras amolecidas e outra capa de patacas cortadas en rodas de medio centímetro de grosas. Salgamos cada capa de patacas que poñamos.
4. Regámolo todo co caldo de mexillóns ata case cubrir, empoámolo con perexil picado e logo tapalo con papel de aluminio, metémolo no forno quente a 180ºC polo decurso de  20 minutos.
5. Namentres, limpámolas xoubas, sacándolles as arganas, salgámolas e facémolas un pouco a prancha pola parte da carne nunha tixola ben quente. Reservamos
6. Logo dos 20 minutos, sacámola bandexa do forno e pomos enriba as xoubas e, agora sen cubrir, metémolo todo no forno outros 5 minutos máis.
7. Servímolo de contado.

Nota:

• Ó botarmos o caldo na bandexa hai que andar con ollo de non botar moito, pois o guiso non ten que quedar augaxento aínda que tampouco seco. Ó tapalo con papel de aluminio case que non perdemos auga e só se perde pola que absorben as patacas ó coceren.
• Se non temos xoubas mercamos sardiñas das máis pequenas que haxa.
• Se non temos pementos secos substituímolos por unha culler de pemento doce.
• Un chisco de picante vaille moi ben.

Tempo: 30 minutos

Comensais: 4

Tellas

Ingredientes:

• 350 g de améndoas moídas en gran
• 3 ovos
• 300 g de azucre
• 75 g de fariña

Descrición:

1. Nunha cunca fonda botámo-las améndoas, o azucre, a fariña, mailos ovos batidos e mesturámolos con espátula de madeira.
2. Untamos unha bandexa do forno con aceite, ou pomos un papel de silicona, pra que non se apeguen as tellas.
3. Botamos unhas culleradas de masa repartidas pola bandexa. (1 por tella)
4. Esmagamos cun garfo os montóns para estendelos, coidando que non se toquen uns os outros.
5. Metémola bandexa ó forno quente a 180ºC polo decurso de 7 minutos,
6. Sacámolas quentes da bandexa, pómolas enriba dun rolo de cociña ou unha botella e dámoslles forma de tella obrigándoas coa man.

Nota:

• Se non se comen logo, gardámolas nunha bolsa de plástico para que non abranden.
• Namentres se fai unha bandexa no forno, podemos ir preparando outra e así a cousa vai máis de seguido.

Tempo: 10 minutos

Comensais: 4 ou máis