Archive for Abril, 2010

Receita: Arroz con bacallau

Ingredientes

  • 400 g de bacallau esmigallado
  • 300 g de arroz
  • Caldo de bacallau
  • 1 cebola
  • 1 pemento verde
  • 1 pemento vermello asado
  • 1 tomate maduro
  • 1 dente de allo
  • 2 poliñas de perexil
  • ½ limón
  • 1 ovo cocido
  • 50 ml de aceite de oliva
  • Sal

Descrición

  1. Desalgámo-lo bacallau durante 12 horas en auga dentro da  neveira cambiando dúas veces de auga.
  2. Limpamos e picámo-las verduras moi miúdas: cebola, pemento verde, allo e tomate.
  3. Nunha paella, pota baixa, ou tixola ampla botámo-lo aceite e refogámo-las verduras a fogo baixo ata que amolezan.
  4. Logo disto engadímo-lo arroz e refogámolo coas verduras.
  5. Engadimos o zume do limón e botamos a caldo de peixe ben quente. (a medida, en volume, de caldo de peixe é o dobre maila metade do volume de arroz)
  6. Engadímo-lo bacallau cortado en anacos pequenos, salgamos e despois de remexer cunha espátula de madeira para repartilo e ordenalo deixámolo cocer a fogo lento polo decurso de 20 minutos.
  7. Pasado ese tempo afastámolo do lume e adornámolo con tiras de pemento vermello e o ovo cocido cortado en cuartos; por último esparexemos un pouco de perexil picadiño por riba.
  8. Tapámolo cun pano de cociña húmido e deixámolo repousar 5-10 minutos antes de servilo.

Tempo: 40 minutos

Comensais: 4

Recipe by on.
Microformatting by hRecipe.

Receita: Arroz á mariñeira

Ingredientes

  • 400 g de arroz bomba
  • 1 cebola
  • ½ pemento vermello
  • 1 pemento verde
  • 1 dente de allo
  • 4 tomates medianos
  • 1 peixe-sapo mediano
  • 150 g de lagostinos pelados
  • 100 g de luras
  • 1 litro de caldo de peixe
  • 2 follas de loureiro
  • 50 ml. de aceite de oliva
  • 1 vaso de viño branco
  • 6 champiñóns pequenos
  • Sal

Descrición

  1. Limpámo-las luras e cortámolas en aneles; limpámo-lo peixe-sapo e cortámolo en anacos do tamaño dunha noz; pelámo-los lagostinos. Reservámo-la parte limpa para botar ó arroz e a cabeza, a espiña do peixe-sapo mailas cascas e cabezas dos lagostinos para face-lo caldo de peixe.
  2. Facemos o caldo de peixe nunha pota con litro e medio de auga mailos restos que reservamos para isto, 1 cenoria, 1 porro, ½ cebola, as follas de loureiro e un bo chorro de aceite.
  3. Lavamos moi ben os champiñóns, secámolos partímolos en cuartos. Reservámolos.
  4. Escaldámo-los tomates, sacámoslles a pel, as pebidas e picámolos miúdo. Reservámolos.
  5. Botámo-los 50 ml. de aceite nunha paella, nunha pota ou nunha tixola ampla e cando o aceite estea quente botámo-lo peixe-sapo para darlle unhas voltas no aceite para selalo e non perda substancia; logo disto sacámolo. Logo facémolo mesmo cos lagostinos que tamén reservamos.
  6. Botamos neste mesmo aceite as verduras limpas e picadas miúdo mailo tomate e deixámolo amolecer a fogo medio polo decurso de 10 minutos tendo coidado que non se nos queime a cebola.
  7. Pasado este tempo engadimos o viño branco e deixamos outro pouco máis para que reduza e perda todo o alcohol.
  8. Neste intre engadímo-los aneles de lura e deixamos que se fagan coa verdura uns 5 minutos mais.
  9. Engadímo-lo arroz e remexemos con coidado para que absorba os sabores da fritura. (2-3 minutos)
  10. Engadímo-lo caldo de peixe ben quente para que ferva de seguido. (3,5 partes de caldo por cada parte de arroz) Pómolo a fogo forte ata que empece a ferver e logo baixámo-lo lume; tapamos para que ferva con pouco lume e non se evapore o caldo. Con 20 minutos é dabondo 11. Cando leve 15 minutos fervendo engadímo-lo peixe-sapo mailos lagostinos, probámolo de sal e engadímoslle caldo ou auga quente se cómpre botarllo.
  11. Toda vez que está cocido deixámolo repousar 10 minutos antes de servilo quente.

Tempo: 40 minutos

Comensais: 4

Recipe by on.
Microformatting by hRecipe.

Receita: Espeto de bacallau

Ingredientes

  • 400 g de bacallau (lombos)
  • 12 lagostinos
  • 1 mañuzo de espárragos trigueiros
  • Aceite de oliva virxe
  • 1 limón
  • Sal
  • 4 espetos de madeira

Descrición

  1. Desalgámo-lo bacallau dentro da neveira durante 48 horas cambiándolle de auga cada 12 horas.
  2. Pasado ese tempo secámolo, sacámoslle a pel mailas arganas e, despois de secalo cun pano de cociña, facemos 12 anacos regulares. Reservamos.
  3. Pelamos os lagostinos e reservamos.
  4. Escollemos a parte tenra dos espárragos, cortámolos ó través pola metade e salteámolos nunha tixola con aceite ata que estean brandos. Reservamos.
  5. Imos espetando nos pauciños intercalando 3 anacos de bacallau e 3 lagostinos.
  6. Logo disto facémolos, ben asados ó forno ou nunha grella á brasa, ben á prancha ou ben fritidos nunha tixola.
  7. Facemos unha vinagreta con aceite cru e zume de limón na seguinte proporción: 3 partes de aceite e 1 parte de zume.
  8. Presentámolo nun prato acompañado polos espárragos e regado todo coa vinagreta.

Notas

En vez de vinagreta fría tamén podemos facer unha vinagreta quente: Pomos á fogo baixo unha tixola con 4 culleres aceite virxe de oliva e 2 dentes de allo moi picadiños. Para que se doure o allo un chisco sen queimalo, afastamos a tixola do lume cando vexamos que empeza a dourarse e despois de que arrefríe un pouco engadimos zume de limón ou bo vinagre e xa está a vinagreta pronta para regar con ela o espeto.

Tempo: 30 minutos

Comensais: 4 persoas

Recipe by on.
Microformatting by hRecipe.

Receita: Pastel de bacallau

Ingredientes

  • 400 g de bacallau esmigallado
  • 4 porros (só a parte branca)
  • 200 g de espinacas ou agrións (berro en castelán)
  • 750 ml de nata líquida
  • 4 ovos
  • Aceite
  • Sal

Descrición

  1. Desalgámo-lo bacallau esmigallado durante 12 horas cambiando 2 veces de auga.
  2. Limpamos e cortámo-los porros á metade o longo e logo en anacos de 1 cm.
  3. Cocémolos nunha pouca auga cun chorro de aceite e sal ata que estean brandos.
  4. Nunha cunca fonda escachámo-los ovos, engadímo-lo bacallau sen arganas e triturámolo.
  5. Engadimos 500ml de nata mailos porros escorregados mesturamos a modo e salgamos se fai falla.
  6. Botamos a mestura en 4 moldes de flan individuais engraxados e enfariñados.
  7. Metémolos ó forno quente ó baño maría polo decurso de uns 30 minutos
  8. Namentres cocen o pasteis facemos a salsa: Cocémo-las espinacas en auga con sal durante uns 5 minutos e logo de escoalas mesturámolas con 250 ml de nata sobrante, trituramos e deixamos reduci-la salsa ó gusto de cada un.
  9. Servímolos quentes pondo no fondo do prato unhas culleres de salsa de espinacas e enriba o pastel desmoldeado.

Tempo: 60 minutos

Comensais: 4 persoas

Recipe by on.
Microformatting by hRecipe.

Receita: Peixe sapo con grelos á galega

Ingredientes

  • 8 rodas de peixe sapo
  • 1 mañuzo de grelos
  • 4 patacas
  • 1 cebola branca
  • 4 dentes de allo
  • 1 póla de perexil
  • 1 culler de pemento doce
  • 100ml (½ vaso) de aceite de oliva
  • Sal

Descrición

  1. Lavámo-los grelos e pómo-los a cocer con auga, sal. Ó romper a ferver cambiámo-la auga e botamos unha pingada de aceite antes de polos a ferver de novo. Se son frescos con 15 minutos teñen de abondo. Logo disto escoámolos e reservámolos.
  2. Nunha pota con auga dabondo e sal botámo-las patacas peladas e cortadas en rodas de 2 cm. de groso, é dicir en cachelos, e pómolas a ferver 15 minutos xunto coa cebola cortada en xuliana, 1 dente de allo mailo perexil.
  3. Pasado este tempo pomos por riba as talladas de peixe sapo e deixámolas facer polo decurso de 5 minutos máis.
  4. Logo disto xa están cociñadas as patacas mailo sapo. Escoamos e botámolo todo nunha bandexa de presentación pondo as patacas por baixo do peixe sapo e os grelos quentes a un lado.
  5. Namentres, facemos un rustrido nunha tixola, botámolo allo picado miúdo no aceite, pómola ó lume tendo conta de non queima-lo allo; afastámo-la tixola do lume e deixamos tempera-lo aceite antes de engadir o pemento doce; remexemos e botamos este rustrido por riba da bandexa.

Tempo: 30 minutos

Comensais: 4

Recipe by on.
Microformatting by hRecipe.

Receita: Garavanzos con mexillóns

Ingredientes

  • 400 g de garavanzos
  • 16 mexillóns
  • 1 cebola
  • 2 cenorias
  • 2 dentes de allo
  • 1 culler rasa de pemento doce
  • 1 culler. de perexil picado
  • Aceite
  • Sal

Descrición

  1. Limpamos os mexillóns e abrímolos cun chisco de auga nunha pota con testo e reservámo-la carne maila auga que soltaron.
  2. Pomos os garavanzos a remollo de véspera en auga fría.
  3. Botámolos garavanzos nunha pota con auga fervendo (nesta auga poremos a auga que soltaron os mexillóns ó coceren) e sal xunto coas cenorias picadas e un chorriño de aceite.
  4. Cocémolos ata que estean tenros (Ollade o tempo que ven indicado no paquete; en pota normal de 2,5 a 3 horas). Sacámoslle a escuma que fan os garavanzos ó coceren.
  5. Nunha pota de barro con aceite, engadímo-la cebola mailos allos picados e deixámolos facer a fogo suave ata que amolezan e collan unha pouca cor.
  6. Logo disto engadimos o pemento doce e mesturamos ( non deixar queimar o pemento.
  7. Escoámo-los garavanzos, reservando medio vaso da auga de coceren, e engadímolos na pota de barro.
  8. Engadímo-la carne dos mexillóns, o medio vaso de auga reservada e deixámolos cocer uns 5 minutos a fogo suave antes de esparexer por riba o perexil picado e servir.

Notas

Os tempos de cocción dos garavanzos son tempos reais pero, dependendo de que clase de garavanzos, estes tempos poden variar, así que aconsello que sigades os tempos marcados, normalmente, nos paquetes.

Tempo: 3 horas

Comensais: 4 persoas

Recipe by on.
Microformatting by hRecipe.