Receita: Barrigas de Monxa

Ingredentes da Masa de Follado

  • 200 g. de fariña
  • 50 g. de manteiga de porco
  • 100 g. de manteiga
  • 1 ovo
  • 1 chorriño de vinagre
  • 1 chisco de sal

Ingredentes do Cabelo de Anxo

  • 1 cabazo cabelo de anxo
  • Azucre ao gusto
  • Azucre moído
  • Canela en po ou vainilla

Descrición

  1. Primeiro de todo, pomos a cocer o cabazo. Partímolo en 4 anacos, quitámoslle cunha culler as pebidas, e metémola nunha pota exprés polo decurso de 30 minutos. Compre que o cabazo estea cuberto de auga.
  2. Namentres, preparamos a masa de follado. Botámola fariña enriba da mesa, facemos un niño, botamos nel o ovo, un chisco de sal e amasamos.
  3. Engadímola manteiga de porco mailo vinagre para darlle elasticidade e amasámolo todo durante 30 minutos.
  4. Unha vez feita esta masa, dámoslle un corte en forma de cruz e, abríndoa por este corte, estirámola co rolete.
  5. Pómoslle a manteiga no medio e tapamola manteiga coa masa por unha banda e pola outra e estirámola co rolete, volvemos dobrar e estirar, así por 3 veces, ata que vexamos que a manteiga xa non se sae polos lados.
  6. Deixámola na neveira durante 30 minutos para que arrefríe.
  7. Collemos o cabazo cocido, escoado e frío, sacámoslle a parte mol, e pesámolo para sabermos canta cantidade de azucre hai que botarlle. (Tanto azucre coma o peso do mol de cabazo)
  8. Métese o cabazo mailo azucre nunha pota e déixase cocer polo decurso de 10 minutos sen pararmos de remexer.
  9. Sacamos a masa da neveira xa fría e estirámola co rolete, coma de 5 milímetros de groso. Cortámola en cadrados grandes (15×15 cm.), pómoslles enriba unhas culleres de cabelo de anxo e enrolamos.
  10. Colocamos os rolos nunha bandexa de forno engraxada e pintámolos con ovo e espolvorexámolos de azucre.
  11. Antes de metelas ó forno a 180º polo decurso de 20 minutos, facémoslles un burato na parte de arriba para que poidan respirar e que o cabelo de anxo non se bote fora.
  12. Unha vez no seu punto, retíranse a unha fonte, empóanse con azucre moído mesturado con canela en po ou vainilla e sérvense mornas ou frías.

Notas

Este doce de orixe portuguesa, que non deixa de ser unha empanada doce, recibe o curioso nome de barrigas de monxa polo buratiño que se lle fai no medio que simula o embigo.

Pódese facer tamén fritidas. Entón empregase pasta crebada en vez da masa de follado

O recheo pode ser tamén crema pasteleira ou froitas confeitadas cortadas en anaquiños pequenos e remolladas en almibre e licor ó gusto (Ollade a receita de Casadielles)

Comensales: 6