Receita: Cocido de Lalín

Ingredientes

  • 1 Kg. de lacón curado
  • 800 gr. de soán salgada
  • 500 gr. de costela salgada
  • 1 rabo salgado
  • 1 fociño salgado
  • 1 orellas salgadas
  • 2 uñas (patas) salgadas
  • 2 linguas salgadas
  • ½ kg. de galiña
  • 400 gr. de carne de cocer de vitela (tenreira)
  • 50 gr. de unto
  • 4 chourizos do pais
  • 3 chourizos gordos
  • 500 gr. de garavanzos
  • 400 gr. de fabas grandes
  • 2 kg. de patacas
  • 2 mañuzos bos de grelos
  • sal

Instrucións

  1. Tres días antes de facelo cocido, pomos o lacón a desalgar en auga. Cambiamos a auga cada 24 horas.
  2. Dous días antes, pomos tamén a desalgar o resto da carne de porco (soán, costela, rabo, fociño, orella, linguas mailas uñas) en auga, cambiamos a auga cada 24 horas.
  3. Un día antes, pomos a remollar os garavanzos e as fabas, cada cousa pola súa banda.
  4. O día do cocido pola mañá, pomos unha pota grande ó lume con auga abondo e botamos a cocer o lacón e o resto da carne de porco. Deixámolo cocer por 2 horas ou 2 horas e media e imos sacando a carne segundo vexamos que está cocida.
  5. Pomos outra pota ao lume, con auga e un anaco de unto, botamos a galiña maila carne de vitela a cocer polo decurso de unha hora e media. Probámolo e se cómpre bótaselle sal. Ó acabar, reservala carne e coar o caldo que reservamos tamén
  6. Coamos o caldo onde se coceu o porco, e cocemos nel os garavanzos, as fabas e os chourizos. Deixámolos cocer durante unha hora. Retirámola a graxa cun cazo. Reservamos a maior parte dos garavanzos mailas fabas con algo de caldo para quentalos no caso de que arrefríen e o resto, cunhas poucos legumes, pasámolo pola batedoira eléctrica para servilo como unha sopa
  7. Noutra pota, no caldo reservado da carne de vitela e a galiña, pomos a cocer as patacas peladas e enteiras e deixámolas cocer polo decurso de 25 minutos. Dez (10) minutos antes de rematar de cocelas patacas engadimos os grelos. Pasado este tempo sacámolos grelos e escoámolas patacas.
  8. Servimos o caldo dos legumes (garavanzos e fabas) nunha sopeira. En fontes separadas pomos: nunha delas os legumes cos chourizos, noutra as patacas cos grelos e noutra máis ampla o porco maila carne de vitela e galiña.

Número de comensais: 12

Tradición culinaria: Galega

Receita enviada por .
Microformatting by hRecipe.

Notas

A carne do porco debe ter unha cor rosa perlada, de textura fina e firme, sen pegadas de humidade e a graxa visible ten que ser densa e de cor branca

Atopei esta receita na página de Karlos Arguiñano, que traducín e arranxei un pouquiño para entendela mellor.