Receita: Grelos con chourizos e cachelos

Ingredientes

  • 1ou 2 mañuzos de grelos
  • 4 chourizos do pequenos
  • 1 chourizo gordo
  • 1 Kg de patacas
  • 2 dentes de allo
  • Aceite
  • Sal

Instrucións

  1. Poño auga a quentar e cando ferve engádolle os grelos e espero a que volvan a ferver para engadir o sal e os chourizos. Con 15 ou 20 minutos xa é dabondo.
  2. Logo de escoalos (premelos un pouco para que solten ben a auga), póñense nunha batea. pícanse un ou dous dentes de allo en láminas e acéitanse ben con oliva. Di a miña mai que o gaiteiro (o aceite) ten que tocar ben.
  3. Cozo unhas patacas en cachelos que acompaño cos chourizo e cos grelos.
  4. A min sábenme a gloria ata o amargor dos grelos

Number of servings (yield): 4

Culinary tradition: Galega

Receita enviada por on.
Microformatting by hRecipe.

Notas

(*) Estes chourizos fanse na bisbarra de Verín (Ourense) a súa zorza faise con carne dos chourizos normais e levan a maiores un pouco de cabazo raspado, os bofes e o corazón picados e caldo de cocelos ósos.Métense na tripa gorda e afúmanse algo máis que os chourizos normais. Teñen un sabor especial; a min gústanme moito.

Como sabedes os grelos amargan un pouco; se non vos gustan tan fortes cambiádelles a auga despois do primeiro fervor.

Eu teño grelos todo o ano. para iso mércoos no xaneiro ou febreiro. Hai a vendelos en mañuzos nas feiras ou nas tendas a un prezo razoable.

Logo de escollelos e lavalos, escáldoos en auga fervente ata que bota a ferver de novo; despois de escorregalos métoos en bolsas de conxelar e cando xa esfriaron van ó conxelador.